ডিব্ৰুগড় : ৰাজ্যত পঞ্চায়ত নিৰ্বাচনৰ প্ৰস্তুতি অব্যাহত আছে । ইতিমধ্যে প্ৰথম পৰ্যায়ৰ নিৰ্বাচনৰ প্ৰাৰ্থীসকলৰ মনোনয়ন পৰ্বও সমাপ্ত হৈছে । ৰাজনৈতিক দলবোৰৰ মাজতো ব্যাপক তৎপৰতা দেখা গৈছে । শুকুৰবাৰে প্ৰথম পৰ্যায়ৰ পঞ্চায়ত নিৰ্বাচনৰ মনোনয়ন দাখিলৰ অন্তিম দিনা প্ৰতিটো দলৰ প্ৰাৰ্থীয়ে নিজৰ সমৰ্থকক লৈ মনোনয়ন দাখিল কৰিছে । ডিব্ৰুগড়ৰ প্ৰতিটো সমষ্টিতে বিজেপি মিত্ৰজোঁটৰ সমান্তৰালভাৱে বিৰোধী দলসমূহেও প্ৰাৰ্থী প্ৰক্ষেপ কৰিছে । ইতিমধ্যে প্ৰতিটো সমষ্টিতে বহু প্ৰাৰ্থী বিনা প্ৰতিদ্বন্দ্বিতাৰে জয়ী হৈছে । বিশেষকৈ শাসকীয় দলৰ সমৰ্থিত প্ৰাৰ্থীৰ জয়ী হোৱাৰ সংখ্যাই বেছি দেখিবলৈ পোৱা গৈছে ।
নিৰ্বাচনী আচৰণ বিধি উলংঘন তেৰছ গোৱালাৰ !
অৱশ্যে তাৰ মাজতে পঞ্চায়ত নিৰ্বাচনক লৈ নিশা টেঙাখাত খণ্ড উন্নয়ন কাৰ্যালয়ত উত্তপ্ত পৰিস্থিতিৰ সৃষ্টি হয় । প্ৰাৰ্থীৰ মনোনয়ন নিৰীক্ষণ চলি থকাৰ সময়ত নিৰীক্ষণ কক্ষৰ ভিতৰত বিধায়ক তেৰছ গোৱালাৰ উপস্থিতিক লৈ উত্তপ্ত পৰিস্থিতিৰ সৃষ্টি হয় । স্থানীয় বিধায়কগৰাকীয়ে অকৰ্তৃত্বশীলভাৱে নিৰীক্ষণ কক্ষত প্ৰৱেশ কৰাৰ অভিযোগ কৰে একাংশ লোকে । যাক লৈ বিভিন্নজনে বিধায়কগৰাকীক উভতি ধৰে । নিৰ্বাচনৰ বিধি ভংগ কৰাৰ অভিযোগ উত্থাপন কৰি বিৰোধী দলৰ নেতা-কৰ্মীসকলে বিধায়কগৰাকীক জবাবদিহি কৰাৰ লগতে উত্তপ্ত পৰিস্থিতিৰ সৃষ্টি কৰে ।
জানিব পৰা মতে দুলীয়াজান বিধানসভা সমষ্টিৰ অন্তৰ্গত ১৬ টা গাঁও পঞ্চায়তৰ ১৬০ টা ৱাৰ্ডৰ ভিতৰত ভাৰতীয় জনতা পাৰ্টীৰ সমৰ্থিত ৩২ জন ৱাৰ্ড সদস্য, ২ জন আঞ্চলিক পঞ্চায়তৰ সদস্যৰ বিনা প্ৰতিদ্বন্দ্বিতাৰে জয় লাভ কৰে । এই ফলাফলক লৈ টেঙাখাত খণ্ড উন্নয়ন কাৰ্যালয়ৰ চৌহদত বিধায়ক তেৰছ গোৱালাৰ লগতে শ শ ভাৰতীয় জনতা পাৰ্টীৰ সমৰ্থকে বিজয় উল্লাস কৰে । ইয়াতেই ক্ষুণ্ণ হৈ পৰে বিৰোধী দলসমূহ । লগতে মনোনয়ন পুনৰীক্ষণৰ সময়ত নিৰীক্ষণ কক্ষৰ ভিতৰত বিধায়ক তেৰছ গোৱালাই বাৰে বাৰে প্ৰৱেশ কৰা কাৰ্যত ক্ষুণ্ণ হৈ বিৰোধীয়ে উত্তপ্ত পৰিস্থিতিৰ সৃষ্টি কৰে । বহু প্ৰাৰ্থীৰ মনোনয়ন বাতিলৰ পাছতে কেইবাটাও পঞ্চায়তৰ প্ৰাৰ্থীয়ে বিধায়ক তেৰছ গোৱালাৰ বিৰুদ্ধে গুৰুত্বৰ অভিযোগ উত্থাপন কৰি খণ্ড উন্নয়ন কাৰ্যালয়ৰ চৌহদত জবাবদিহি কৰে । ইয়াৰ পাছতে দলীয় সমৰ্থকসকলক লৈ আঁতৰি যায় বিধায়কগৰাকী ।
বিধায়কৰ কৰ্মকাণ্ডত ক্ষুণ্ণ একাংশ নেতাই কয়,"যিহেতু ৱাৰ্ডসমূহত এইবাৰ কোনো দলৰ হৈ প্ৰাৰ্থী অৱতীৰ্ণ নহয় গতিকে তেওঁ সকলোৰে বিধায়ক । কিন্তু বিধায়কগৰাকীয়ে টেঙাখাত খণ্ড উন্নয়ন কাৰ্যালয়ৰ চৌহদত বিজেপিৰ সমৰ্থনত কথা কৈ ফটকা ফুটাইছে । বিধায়কগৰাকীয়ে পুনৰীক্ষণৰ সময়ত নিৰীক্ষণ কক্ষৰ ভিতৰত বহু সময় আছে । তেওঁ ৰাইজৰ মাজত কংগ্ৰেছ, বিজেপিক ভাগ ভাগ কৰিছে । প্ৰাৰ্থীসমূহ জয়ী হোৱা বুলি ঘোষণা কৰাৰ পূৰ্বে কাৰ্যালয়ৰ চৌহদত তেওঁ গামোচা পিন্ধাইছে ।"
লগতে পঢ়ক :তিনি গগৈ একলগ হ'লে অসমৰ ৰাজনীতিত মেজিক সৃষ্টি হ'ব : অখিল গগৈ - RAIJOR DAL JOINING PROGRAMME
