দোতাৰা-একতাৰা-ডগৰ-চাৰিণ্ডা কি নাসাজে তেওঁ ! লোকবাদ্যৰ প্ৰসাৰৰ বাবে নিৰলস চেষ্টা এগৰাকী শিল্পীৰ
তেওঁ বাদ্যবোৰ বিক্ৰী নকৰে । তাৰ পৰিৱৰ্তে লোকসংগীতৰ চৰ্চা কৰা যুৱশিল্পীক উৎসাহ যোগাবলৈ সেইবিলাক উপহাৰ দি আহিছে ।
Published : March 2, 2025 at 3:03 PM IST
বৰপেটা: অসমৰ লোকবাদ্যৰ প্ৰসাৰ আৰু সংৰক্ষণৰ কামত নীৰৱে আত্মনিয়োগ কৰি আহিছে বৰপেটাৰ সুন্দৰীদিয়াৰ বাসিন্দা ভূপেন্দ্ৰ নাথ দাসে । সৰুৰে পৰাই তেওঁ লোকবাদ্য বজোৱাৰ চৰ্চা কৰি আহিছিল । পৰৱৰ্তী সময়ত জীৱন-জীৱিকাৰ ব্যস্ততাত সোমাই পৰে যদিও চৰ্চা এৰি দিয়া নাছিল । আৰক্ষী বিভাগত চাকৰি কৰিছিল লোকশিল্পীগৰাকীয়ে । আৰক্ষী জীৱনৰ অতি ব্যস্ততাৰ মাজতো তেওঁ যতি পৰিব দিয়া নাছিল সেই চৰ্চাক ।
লোকবাদ্য বজোৱাৰ চৰ্চাৰ মাজতে তেওঁ মন মেলে লোকবাদ্য তৈয়াৰ কৰা কামটোলৈ । দাসে জনাই যে তেওঁ এনে বাদ্য তৈয়াৰ কৰিবলৈ ক'তো প্ৰশিক্ষণ লোৱা নাই । বাদ্যবোৰ চাই চাই নিজে নিজেই সেইবিলাক তৈয়াৰ কৰা কামত হাত দিয়ে । এনেদৰেই তেওঁ বহু দোতাৰা, ডগৰ, চাৰিণ্ডা, নাগাৰা, একতাৰা আদি তৈয়াৰ কৰি উলিয়াইছে ।
উল্লেখযোগ্য যে তেওঁ বাদ্যবোৰ বিক্ৰী নকৰে । তাৰ পৰিৱৰ্তে লোকসংগীতৰ চৰ্চা কৰা যুৱশিল্পীক উৎসাহ যোগাবলৈ সেইবিলাক উপহাৰ দি আহিছে । লোকসংগীতৰ প্ৰতিযোগিতাৰ পুৰস্কাৰ স্বৰূপেও এনে বাদ্য বিজয়ী প্ৰতিযোগীক প্ৰদান কৰি আহিছে ।
বৰ্তমান একেলগে কেবাবিধো বাদ্য সাজি থকা দাসে ধৰ্মীয় নাটক, ভাওনা আদিত ব্যৱহাৰ হোৱা সামগ্ৰীও প্ৰস্তুত কৰে । নিজৰ ঘৰত লোকবাদ্যৰ এটা সংগ্ৰহালয় স্থাপনৰ আশা পুহি ৰখা দাসে ইয়াৰ বাবে এপদ-দুপদকৈ তেনে বাদ্য সাজি উলিওৱাৰ কামো অব্যাহত ৰাখিছে ।
এই সন্দৰ্ভত ই টিভি ভাৰতৰ সৈতে হোৱা এক বাৰ্তালাপত লোকশিল্পীগৰাকীয়ে কয়, "মই সৰুকালৰে পৰাই লোকসংগীতৰ প্ৰতি আকৃষ্ট । পঢ়ি থকা দিনত মই লোকগীত গাইছিলো । তেতিয়া আমাৰ দোতাৰা বা দগৰ এইবোৰ নাছিল । আগতে দা, কটাৰী বটালিৰেই কাটি সাজি লৈছিলোঁ । তেনেকৈয়ে বজাই বজাই শিকিলো আৰু তাৰ পিছৰ পৰাই বিভিন্ন অনুষ্ঠানত লোকগীত পৰিৱেশন কৰিছিলো ।"
