গুৱাহাটী: এতিয়াৰে পৰা গুৱাহাটী মহানগৰৰ ৰাজপথত উলিয়াব নোৱাৰিব কোনো ধৰণৰ সমদল বা শোভাযাত্ৰা । মহানগৰীৰ ৰাজপথত দেখা নাযাব কোনো শিক্ষানুষ্ঠানৰে বাৰেৰহণীয়া সাংস্কৃতিক শোভাযাত্রা, ৰাজনৈতিক, অ-ৰাজনৈতিক দল-সংগঠনৰ প্রতিবাদী কাৰ্যসূচী বা সমদল । কিয়নো গুৱাহাটী মহানগৰীত নিষিদ্ধ কৰা হৈছে সমদল-শোভাযাত্রা । এই নিৰ্দেশনা জাৰি কৰিছে মহানগৰ আৰক্ষীয়ে ।
গুৱাহাটী মহানগৰত যান-বাহনৰ স্বাভাৱিক গতি সুনিশ্চিত কৰাৰ লগতে জনসাধাৰণে যাতে অসুবিধাৰ সন্মুখীন নহয়, তাৰ বাবে শুকুৰবাৰে গুৱাহাটী মহানগৰ আৰক্ষী আয়ুক্তৰ কাৰ্যালয়ে জাৰি কৰিছে এক নিৰ্দেশনা । এই নিৰ্দেশনাত উল্লেখ কৰা অনুসৰি মহানগৰীত যান-বাহনৰ স্বাভাৱিক গতি চলাচল কৰাৰ ক্ষেত্ৰত সমদল, শোভাযাত্ৰা আদিয়ে তীব্ৰ যানজঁটৰ সৃষ্টি কৰে । ইয়াৰ ফলত নাগৰিক আৰু জৰুৰী সেৱা ব্যৱস্থা ব্যাহত হয় ।
তেনে পৰিস্থিতি নিয়ন্ত্ৰণৰ বাবে ২০২৩ চনৰ ভাৰতীয় নাগৰিক সুৰক্ষা সংহিতা ধাৰা ১৬৩ অনুসৰি, গুৱাহাটীৰ উপ-আৰক্ষী আযুক্ত (প্রশাসন) ইমদাদ আলী স্বাক্ষৰিত এক জাননীযোগে মহানগৰত সকলোধৰণৰ সমদলত নিষেধাজ্ঞা আৰোপ কৰিছে ।
এই নিৰ্দেশত সকলো ধৰণৰ সমদল, ৰেলী, দৌৰ, মাৰাথন, ৱাকাথন আদিৰ ওপৰত গুৱাহাটী মহানগৰীত নিষেধাজ্ঞা আৰোপ কৰা হৈছে । এই নিৰ্দেশনা তাৎক্ষণিকভাৱে প্ৰযোজ্য হ’ব । নিৰ্দেশ উলংঘা কৰিলে ২০২৩ চনৰ "ভাৰতীয় ন্যায় সংহিতা" ৰ ধাৰা ২২৩ অনুসৰি দণ্ডনীয় হ’ব বুলি আৰক্ষীয়ে জানিবলৈ দিয়ে ।
উল্লেখ্য যে, চলিত বৰ্ষৰ ১০ ফেব্ৰুৱাৰীতো মহানগৰ আৰক্ষীয়ে এক নিৰ্দেশনাযোগে মহানগৰীত সমদল শোভাযাত্ৰা উলিয়াৰ ক্ষেত্ৰত নিষেধাজ্ঞা জাৰি কৰিছিল । কিন্তু মহানগৰ আৰক্ষীৰ এনে নিৰ্দেশনা কিদৰে যান-জঁট নিয়ন্ত্ৰণ কৰাত সফল হ’ব, সেয়া লাহে লাহে পৰিলক্ষিত হ’ব ৷
লগতে পঢ়ক: ৮ জুনত ৭টা বর্ষ সম্পূৰ্ণ হ’ব নীল-অভি হত্যাকাণ্ডৰ, কিন্তু আজিও ন্যায়ৰ আসাত পণবন্দী দুটা পৰিয়াল
