গুৱাহাটী : ৰাজ্য়ৰ বিভিন্ন ঠাইত এতিয়া শুষ্ক পৰিৱেশ । বৰষুণৰ অভাৱত শুকাইছে কৃষিভূমি । দীৰ্ঘদিনৰ বিৰতিৰ পিছত কাইলৈ অৰ্থাৎ শনিবাৰে গুৱাহাটীৰ লগতে অসমৰ বিভিন্ন ঠাইত বৰষুণ হোৱাৰ সম্ভাৱনা আছে । এই কথা সদৰী কৰিছে বৰঝাৰৰ আঞ্চলিক বতৰ বিজ্ঞান কেন্দ্ৰৰ জ্য়েষ্ঠ বিজ্ঞানী সঞ্জয় শ্ব'নিলে । তেওঁ সদৰী কৰা মতে,২৫ ফেব্ৰুৱাৰীলৈ অসমৰ বিভিন্ন ঠাইত বৰষুণ হোৱাৰ সম্ভাৱনা আছে ।
আঞ্চলিক বতৰ বিজ্ঞান কেন্দ্ৰৰ জ্য়েষ্ঠ বিজ্ঞানীগৰাকীয়ে কয়," নাগালেণ্ডত ১.৫ কিলোমিটাৰ বেগত সাগৰীয় ধুমুহাৰ প্ৰৱেশৰ বাবে বতৰ কিছু সলনি হ'ব । লগতে বাংলাদেশৰ উত্তৰ দিশৰ পৰা তেলেংগানা দিশলৈ ১.৫ কিলোমিটাৰ বেগত হোৱা সাগৰীয় ধুমুহাই গতি কৰিছে । আঞ্চলিক বতৰ বিজ্ঞান কেন্দ্ৰৰ তথ্য মতে, ২২ ফেব্ৰুৱাৰীৰ পৰা ২৫ ফেব্ৰুৱাৰীলৈ অসম তথা উত্তৰ-পূৰ্বাঞ্চলৰ অন্য ৰাজ্যসমূহত বৰষুণ হ'ব। মাত্ৰ ত্ৰিপুৰাত বতৰ শুকান থাকিব ।"
উল্লেখ্য় যে আঞ্চলিক বতৰ বিজ্ঞান কেন্দ্ৰৰ তথ্য মতে,অসমত ডিচেম্বৰ আৰু জানুৱাৰীত শুকান শীতৰ বতৰ হৈছে । বৰষুণৰ যথেষ্ট ঘাটি হৈছে । স্বাভাৱিক বৰষুণতকৈ যথেষ্ট ঘাটি বৰষুণ হৈছে । বহুত জিলাত এটোপাল বৰষুণ পৰ্যন্ত নপৰিলে । অসমৰ ৯০ শতাংশ জিলাত ঘাটি বৰষুণ হৈছে । ইয়াৰে ৫০ শতাংশ জিলাত উদ্বেগজনক ঘাটি বৰষুণ হৈছে ।
অসমত ঘাটি বৰষুণে কৃষিত বিৰূপ প্ৰভাৱ পেলাইছে । মন কৰিবলগীয়া যে আঞ্চলিক বতৰ বিজ্ঞান কেন্দ্ৰৰ তথ্য মতে, অসমত যোৱা নৱেম্বৰত-৫৮ শতাংশ ঘাটি বৰষুণ হৈছিল । আকৌ অসমত যোৱা ডিচেম্বৰত-৮৩ শতাংশ যথেষ্ট ঘাটি বৰষুণ হৈছিল । আকৌ জানুৱাৰীত-৭৪ শতাংশ ঘাটি বৰষুণ হৈছে ।
