বড়োলেণ্ডবাসীৰ বাবে 'ভিজন ডকুমেণ্ট' নৱবৰ্ষৰ উপহাৰ: প্ৰমোদ বড়ো

গুৱাহাটী : বড়োলেণ্ড অঞ্চলৰ শান্তি, অখণ্ডতা আৰু প্ৰগতিৰ বাবে বড়োলেণ্ড টেৰিটৰিয়েল কাউন্সিলে (বি টি চি) এক পুংখানুপুংখ ভিজন ডকুমেণ্ট প্ৰকাশ কৰিছে ।

বি টি চি অঞ্চলত বাস কৰা 26 টা থলুৱা আৰু জনজাতীয় সম্প্ৰদায়ৰ ভাষা, সংস্কৃতি আৰু পৰিচয় সুৰক্ষিত আৰু সংৰক্ষণ তথা সংবৰ্ধনৰ বাবে এক ভিজন ডকুমেণ্ট প্ৰস্তুত কৰিছে । বি টি চিৰ মুৰব্বী তথা এন ডি এৰ সহযোগী দল ইউনাইটেড পিপ'লছ পাৰ্টী লিবাৰেল (ইউ পি পি এল)ৰ সভাপতি প্ৰমোদ বড়োৱে কয়, "ভিজন ডকুমেণ্ট হৈছে বড়োলেণ্ড টেৰিটৰিয়েল ৰিজিঅ'ন (বি টি আৰ) চৰকাৰৰ এটা সপোনৰ প্ৰকল্প ।"

এ এন আইৰ সৈতে বাৰ্তালাপত বিটিচিৰ মুৰব্বী তথা ইউ পি পি এলৰ সভাপতি প্ৰমোদ বড়োৱে কয়, "এই বছৰৰ শেষৰ ফালে আমি নতুন বছৰৰ উপহাৰ হিচাপে এই ভিজন ডকুমেণ্টৰ জৰিয়তে বড়োলেণ্ড টেৰিটৰিয়েল ৰিজিঅ'ন (বি টি আৰ)ৰ লোকসকলক কিবা এটা দিবলৈ গৈ আছোঁ । আমি কেৱল তেওঁলোকৰ পৰাহে এই ভিজন ডকুমেণ্ট সংগ্ৰহ কৰিছো, যিসকলে পূৰ্বৰ সময়ছোৱাত বহু স্মাৰক-পত্ৰ দাখিল কৰিছিল । আমি কিছুমান সৰু সৰু গোটো গঠন কৰিছিলো আৰু এই গোটবোৰ নিৰ্দিষ্ট সম্প্ৰদায়বোৰৰ মাজলৈ গৈছিল আৰু বিভিন্ন পৰ্যায়ত তেওঁলোকৰ সাক্ষাৎকাৰ লৈ তেওঁলোকৰ সমস্যাবোৰ সংগ্ৰহ কৰিছিল । ইয়াৰ ভিতৰত আছে মহিলা, কৃষক, শিক্ষক আৰু যুৱক-যুৱতী ।"

"এই গোটবোৰে বিভিন্ন সংগঠন আৰু সম্প্ৰদায়ৰ নেতাসকলৰ সৈতেও বাৰ্তালাপ কৰিছিল । বিশেষজ্ঞ গোটে এই ভিজন ডকুমেণ্টখন ডিজাইন কৰিছে আৰু চৰকাৰে ইয়াৰ সমৰ্থন আগবঢ়াইছে । যিবোৰ সমস্যা বড়োলেণ্ড টেৰিটৰিয়েল কাউন্সিল পৰ্যায়ত সমাধান কৰিব নোৱাৰি; সেই বিষয়বোৰ ৰাজ্য আৰু কেন্দ্ৰলৈ প্ৰেৰণ কৰা হ'ব ।" তেওঁ লগতে কয় ।

প্ৰমোদ বড়োৱে লগতে কয় যে বিশেষজ্ঞ সমিতিয়ে বড়োলেণ্ড টেৰিটৰিয়েল অঞ্চলৰ ২৬ টা সম্প্ৰদায়ৰ বাবে এই ভিজন ডকুমেণ্টখন প্ৰস্তুত কৰিছে ।

"এই ভিজন ডকুমেণ্টত বিশেষজ্ঞ সমিতিয়ে উক্ত সম্প্ৰদায়বোৰৰ সকলো সমস্যা আৰু কাৰকবোৰ বিচাৰি উলিয়াইছে । কিছু লোকে তেওঁলোকৰ ভাষা আৰু সংস্কৃতি, পৰম্পৰা আৰু পৰিচয় সুৰক্ষিত কৰিব বিচাৰে; কিছুমানে তেওঁলোকৰ ভূমি সুৰক্ষিত কৰিব বিচাৰে, তেওঁলোকৰ ভূমিৰ অধিকাৰ উপভোগ কৰিব বিচাৰে আৰু শিক্ষা আৰু অৰ্থনৈতিক দিশত বিকাশ কৰিব বিচাৰে । এইবোৰ ভিজন ডকুমেণ্টত লিখা হৈছে । কিছু লোকে তেওঁলোকৰ সম্প্ৰদায়ৰ স্বীকৃতি আৰু অধিসূচনা বিচাৰে, কিয়নো সাংবিধানিক গাঁথনিত তেওঁলোকৰ কোনো স্বীকৃতি নাই ।" প্ৰমোদ বড়োৱে এ এন আইক কয় ।

বি টি চি প্ৰধানজনে লগতে কয়, "সৰ্বাধিক লোকে মানুহৰ মাজত শান্তি আৰু অখণ্ডতা বিচাৰে । কিয়নো বড়োলেণ্ডত বিগত কেইবা দশকত সম্প্ৰদায়সমূহৰ মাজত সংঘৰ্ষ হৈছে । সেয়েহে তেনেধৰণৰ পৰিস্থিতি বড়োলেণ্ড অঞ্চলৰ পৰা স্থায়ীভাৱে আঁতৰ কৰিব লাগে ।"

মানুহে বড়োলেণ্ড অঞ্চলত বাস কৰা সম্প্ৰদায়সমূহৰ মাজত বহনক্ষম শান্তি আৰু অখণ্ডতা বিচাৰে । উক্ত সমস্যাবোৰো ভিজন ডকুমেণ্টত আহিব । প্ৰতিটো সম্প্ৰদায়ে মানসম্পন্ন শিক্ষা বিচাৰে আৰু বহুতো ক্ষেত্ৰত মানৱ সম্পদ বিকাশ কৰিব বিচাৰে ।

প্ৰমোদ বড়োৱে কয়, "ভিজন ডকুমেণ্ট হৈছে বড়োলেণ্ড অঞ্চলৰ লোকসকলৰ বাবে নতুন বছৰৰ এক উপহাৰ আৰু তেওঁলোকে এক ভাল ভিজন ডকুমেণ্ট লাভ কৰিব । ইয়াৰ জৰিয়তে তেওঁলোকে তেওঁলোকৰ নিজৰ সম্প্ৰদায়ৰ বিকাশৰ বাবে এক ৰোডমেপ প্ৰস্তুত কৰিব পাৰিব ।"

"এইটো মোৰ তিনি দশকৰ সামাজিক কাৰ্যকলাপৰ পৰা ওলাই আহিছে । যেতিয়া মই বি টি আৰ অঞ্চলত আৰু কেতিয়াবা অসম, উত্তৰ-পূৰ্বাঞ্চল আৰু দেশৰ কিছু অংশত ঘূৰি ফুৰা কৰ্মী আছিলোঁ, তেতিয়া মই অনুভৱ কৰিছিলো যে দেশৰ দুখীয়া লোকসকলে যথেষ্ট সমস্যাৰ সন্মুখীন হৈছিল । বহুতো কাৰণত আমোলাতন্ত্ৰ আৰু জনপ্ৰতিনিধিসকলে তেওঁলোকৰ অভিযোগবোৰ সমাধান কৰিবলৈ তেওঁলোকৰ ওচৰলৈ যাব নোৱাৰে । কেতিয়াবা তেওঁলোক হতাশ আৰু বঞ্চিত হৈছিল আৰু তেওঁলোকে আন্দোলনৰ পথ লৈছিল । স্বাধীনতাৰ বিগত 70 বছৰত দেশৰ বিভিন্ন প্ৰান্তত বিভিন্ন থলুৱা সম্প্ৰদায়ৰ আন্দোলন হৈছে । অসম আৰু উত্তৰ-পূব ভাৰতত আমি হৈছো অতি সৰু জাতি, জনজাতি আৰু থলুৱা সম্প্ৰদায় । আৰু সেয়েহে যেতিয়া আমৰ গণতান্ত্ৰিক অধিকাৰৰ কথা নুশুনে, তেতিয়া কিছু লোকে হাতত অস্ত্ৰ তুলি লয় । আৰু সেয়া হৈছে দেশৰ উত্তৰ-পূব অংশত অস্ত্ৰ বিপ্লৱৰ কাহিনী ।" প্ৰমোদ বড়োৱে লগতে কয় ।