৮ ছেপ্টেম্বৰত অসমলৈ আহিব প্ৰধানমন্ত্ৰী নৰেন্দ্ৰ মোদী

গুৱাহাটী: শনিবাৰে দিল্লীত প্রধানমন্ত্রী নৰেন্দ্ৰ মোদীক সাক্ষাৎ কৰে মুখ্যমন্ত্রী ড৹ হিমন্ত বিশ্ব শৰ্মাই ৷ ড৹ ভূপেন হাজৰিকাৰ জন্ম-জয়ন্তীৰ বছৰজোৰা কাৰ্যসূচীৰ শুভাৰম্ভণিৰ অনুষ্ঠানলৈ প্ৰধানমন্ত্ৰীক নিমন্ত্রণ জনাই মুখ্যমন্ত্ৰীগৰাকীয়ে ৷

অহা ৮ ছেপ্টেম্বৰত সুধাকণ্ঠৰ বছৰজোৰা জন্ম-জয়ন্তী পালন অনুষ্ঠানলৈ আহিব বুলি নিশ্চিতি দিছে প্ৰধানমন্ত্ৰী নৰেন্দ্ৰ মোদীয়ে । মুখ্যমন্ত্ৰী ড৹ হিমন্ত বিশ্ব শৰ্মাই সামাজিক মাধ্যমযোগে সদৰী কৰিছে এই তথ্য ৷

“সুধাকণ্ঠৰ জন্ম-জয়ন্তীৰ বছৰজোৰা কাৰ্যসূচীৰ শুভাৰম্ভণি কৰাৰ লগতে ৫,৭০০ কোটি টকাৰ গুৱাহাটী ৰিং ৰোডৰ লগতে মঙলদৈ চিকিৎসা মহাবিদ্যালয় আৰু হাস্পতালৰ আধাৰশিলা স্থাপন কৰিব প্রধানমন্ত্রী মোদীয়ে।”

শনিবাৰে মুখ্যমন্ত্ৰী ড° শৰ্মাই সামাজিক মাধ্যম Xত উল্লেখ কৰিছে, “ ভাৰত ৰত্ন ড৹ ভূপেন হাজৰিকাৰ জন্ম শতবাৰ্ষিকী বছৰজোৰা উদযাপনৰ উদ্বোধনী অনুষ্ঠানত তেওঁক মুখ্য অতিথি হিচাপে অসমলৈ নিমন্ত্ৰণ কৰাৰ গৌৰৱ লাভ কৰিলো ।”

”লগতে, ৩০০ কে টি পি এ বাঁহক ফিডষ্টক হিচাপে ব্যৱহাৰ কৰি ৪৯ কে টি পি এ ইথানল উৎপাদন ক্ষমতাৰে অসম বায়’-ইথানল প্লাণ্ট উদ্বোধনৰ বাবে তেওঁৰ সদয় উপস্থিতিৰ বাবে অনুৰোধ জনালো ।” এই বুলি উল্লেখ কৰে মুখ্যমন্ত্ৰী ড৹ শৰ্মাই ।

লগতে মুখ্যমন্ত্ৰীগৰাকীয়ে উল্লেখ কৰে, “ইয়াৰ উপৰিও ৫,৭০০ কোটি টকাৰ গুৱাহাটী ৰিং ৰোড প্ৰকল্প আৰু দৰং মেডিকেল কলেজ আৰু হাস্পতাল - দুটা প্ৰধান আন্তঃগাঁথনি প্ৰকল্পৰ আধাৰশিলা স্থাপন কৰিবলৈও অনুৰোধ জনালো ।”

মুখ্যমন্ত্ৰীগৰাকীয়ে লগতে প্ৰকাশ কৰে যে প্ৰধানমন্ত্ৰীগৰাকীয়ে চলিত বছৰৰ ৮ ছেপ্টেম্বৰত এই গুৰুত্বপূৰ্ণ অনুষ্ঠানসমূহৰ শোভা বঢ়াবলৈ সন্মত হৈছে। অৰ্থাৎ ৮ ছেপ্টেম্বৰত অসমলৈ আহিব প্ৰধানমন্ত্ৰী নৰেন্দ্ৰ মোদী ।

উল্লেখ্য় যে সৰ্বকালৰ এজন অন্যতম শ্ৰেষ্ঠ অসমীয়া গণশিল্পী ড৹ ভূপেন হাজৰিকাৰ জন্ম শতবাৰ্ষিকী বছৰজোৰা বিভিন্ন কাৰ্যসূচীৰে পালনৰ সিদ্ধান্ত গ্ৰহণ কৰিছে অসম চৰকাৰে । যোৱা ১৩ এপ্ৰিলত হোৱা অসম চৰকাৰৰ কেবিনেটত এই সিদ্ধান্ত গ্ৰহণ কৰা হৈছিল । সেই অনুসৰি ড৹ ভূপেন হাজৰিকাৰ জন্ম শতবাৰ্ষিকী এই বৰ্ষৰ ৮ ছেপ্টেম্বৰত আৰম্ভ হৈ ২০২৬ চনৰ ৮ ছেপ্টেম্বৰত সামৰণি পৰিব ।

আনহাতে, ২০২৬ৰ মাৰ্চৰ পৰা এপ্ৰিলৰ ভিতৰত অসমত অনুষ্ঠিত হ’ব অসম বিধানসভাৰ নিৰ্বাচন। নিৰ্বাচনৰ কেইমাহমান পূৰ্বে প্ৰধানমন্ত্ৰীৰ অসম আগমনে অসমত যে নিৰ্বাচনী বতাহ বলাব সেয়া সহজেই অনুমেয় ।