ডিব্ৰুগড় : পঞ্চায়ত নিৰ্বাচনলৈ মাত্ৰ ৪ দিন থকা সময়তে ডিব্ৰুগড়ত একেদিনাই মুকলি হ'ল দুখনকৈ উৰণ সেতু । অসমৰ দুগৰাকী স্বনামধন্য ব্যক্তিৰ নামেৰে দুখনকৈ উৰণ সেতু মুকলি কৰে অসমৰ মুখ্যমন্ত্ৰী ড৹ হিমন্ত বিশ্ব শৰ্মাই । নিবাৰ্চনী প্ৰচাৰৰ বাবে অহা মুখ্যমন্ত্ৰীয়ে দেওবাৰে সন্ধিয়া দুয়োখন উৰণ সেতু আনুষ্ঠানিকভাৱে ৰাইজৰ বাবে মুকলি কৰে । প্ৰথমে থানা চাৰিআলিত 'বাগ্মীবৰ নীলমণি ফুকন উৰণ সেতু' মুকলি কৰা হয় । ৬০.১৩ কোটি টকা ব্যয়েৰে নিৰ্মাণ কৰা হৈছে ৪৫০ মিটাৰ দৈৰ্ঘৰ এই ৰে'লৱে উৰণ সেতুখন ।
ইয়াৰ পিছতে মুখ্যমন্ত্ৰীয়ে আনুষ্ঠানিকভাৱে 'ড৹ লীলা গগৈ উৰণ সেতু' মুকলি কৰে । কনভয় ৰোডক ৩৭ নং ৰাষ্ট্ৰীয় ঘাইপথৰ সৈতে সংযোগ কৰি ৬১৫.৪০ মিটাৰ দৈৰ্ঘৰ এই উৰণ সেতুখনৰ লগতে ১.৫৮ কিলোমিটাৰ দৈৰ্ঘৰ সেৱা পথৰ কাম ৫৬.৬৯ কোটি টকা ব্যয়েৰে সম্পূৰ্ণ কৰা হৈছে । অসমৰ দুগৰাকী স্বনামধন্য ব্যক্তিৰ নামত উৎসৰ্গিত উৰণ সেতু দুখনে ডিব্ৰুগড় চহৰৰ যান-জঁটৰ সমস্যা বহু পৰিমাণে লাঘৱ কৰিব বুলি আশা প্ৰকাশ কৰিছে ৰাইজে ।
উৰণ সেতু উদ্বোধনী অনুষ্ঠানত প্ৰাক্তন মুখ্যমন্ত্ৰী তথা কেন্দ্ৰীয় মন্ত্ৰী সৰ্বানন্দ সোণোৱাল, ৰাজ্যসভাৰ সাংসদ ৰামেশ্বৰ তেলী, অসম চৰকাৰৰ মন্ত্ৰী প্ৰশান্ত ফুকন, ডিব্ৰুগড় জিলাৰ কেইবাজনো বিধায়কৰ লগতে বহুকেইজন বিশিষ্ট ব্যক্তি উপস্থিত থাকে ।
ডিব্ৰুগড়ক লৈ নতুন পৰিকল্পনা মুখ্যমন্ত্ৰীৰ :
ডিব্ৰুগড় চহৰত মুখ্যমন্ত্ৰী ড৹ হিমন্ত বিশ্ব শৰ্মাই একেইদিনাই দুখন গুৰুত্বপূৰ্ণ উৰণ সেতু উদ্বোধন কৰি কয়, "ডিব্ৰুগড়ত ৰাইজৰ ব্যাপক উছাহ উদ্দীপনাৰ মাজত দুখন উৰণ সেতু উদ্বোধন কৰিবলৈ সক্ষম হ'লো । এখন উৰণ সেতু ড৹ লীলা গগৈৰ নামত উছৰ্গা কৰিছো আৰু এখন বাগ্মীবৰ নীলমণি ফুকনৰ নামত উছৰ্গা কৰিছো । ইয়াৰ সমান্তৰালভাৱে ডিব্ৰুগড়ত আৰু দুখন উৰণ সেতু হ'ব । দুখনৰ নিবিদা ইতিমধ্যে সম্পূৰ্ণ হৈছে । কাম আৰম্ভ হ'ব খুব সোনকালে ।"
মুখ্যমন্ত্ৰী শৰ্মাই লগতে কয়, "ডিব্ৰুগড়ৰ মানকটা খেলপথাৰত ৩৫ হাজাৰ আসন থকা এখন খেলপথাৰ হ'ব । ডিব্ৰুগড় বিধানসভা, বিধানসভাৰ চৌহদত এটা আটকধুনীয়া প্ৰেক্ষাগৃহও নিৰ্মাণ কৰা হ'ব, বিধায়কৰ আবাস গৃহ নিৰ্মাণ কৰা হ'ব । ছেপ্টেম্বৰত উপ-ৰাষ্ট্ৰপতিয়ে এইসমূহ নিৰ্মাণৰ বাবে আধাৰশিলা স্থাপন কৰিব ।"
উল্লেখ্য যে, গুৱাহাটীৰ পিছতে ৰাজ্যৰ আগশাৰীৰ চহৰ হিচাপে বিবেচিত হৈ আহিছে ডিব্ৰুগড় । ডিব্ৰুগড় চহৰে ইতিমধ্যে অসমৰ দ্বিতীয় মহানগৰ হিচাপে স্বীকৃতি লাভ কৰিবলৈ সক্ষম হৈছে । অসম চিকিৎসা মহাবিদ্যালয়, ডিব্ৰুগড়ৰ বিশ্ববিদ্যালয়, মোহনবাৰী বিমানবন্দৰ, গেছ ক্ৰেকাৰ প্ৰকল্পৰ লগতে শেহতীয়াকৈ মুখ্যমন্ত্ৰীৰ সচিবালয় আৰম্ভ হোৱাত ডিব্ৰুগড় চহৰখন পৰ্যটন, ব্যৱসায়, বাণিজ্য আদিৰ প্ৰাণকেন্দ্ৰ হৈ উঠিছে । অৱশ্যে ডিব্ৰুগড় চহৰত সৃষ্টি হোৱা যান-জঁটৰ সমস্যাই দীৰ্ঘদিন ধৰি জ্বলা-কলা খুৱাই আহিছে ডিব্ৰুগড়ৰ ৰাইজৰ লগতে ডিব্ৰুগড়লৈ অহা লোকসকলক । এই যান-জঁটৰ সমস্যা দূৰ কৰাৰ উদ্দেশ্যে ডিব্ৰুগড়ত নিৰ্মাণ কৰা হৈছে ইখনৰ পিছত সিখন উৰণ সেতু ।
লগতে পঢ়ক :কংগ্ৰেছৰ নেতাসকলে য'তে মিটিং কৰিব গৈছে তাতে খেদি ফুৰিছে : মুখ্যমন্ত্ৰী - PRADYUT BORDOLOI ATTACK
