গোলাঘাট : অহা ৮ ডিচেম্বৰত অসমলৈ আহিব আমেৰিকাৰ বিশিষ্ট কণ্ঠশিল্পী পোষ্ট মেলোনে । আন্তঃৰাষ্ট্ৰীয় পৰ্যায়ৰ বিশ্ববিখ্যাত কণ্ঠশিল্পীগৰাকীয়ে গুৱাহাটীত অনুষ্ঠান পৰিৱেশন কৰিব । দেৰগাঁৱত অনুষ্ঠিত অসম চৰকাৰৰ কেবিনেট বৈঠকৰ পিছতে এই কথা ঘোষণা কৰে অসমৰ মুখ্যমন্ত্ৰী ড৹ হিমন্ত বিশ্ব শৰ্মাই । কনচাৰ্ট ইক'নোমিৰ ক্ষেত্ৰত অসমক আগবঢ়াই লৈ যোৱাৰ বাবে এই সিদ্ধান্ত গ্ৰহণ কৰিছে অসম কেবিনেটে । ইয়াৰ উপৰিও দেৰগাঁৱৰ লাচিত বৰফুকন পুলিচ একাডেমীত অনুষ্ঠিত কেবিনেট বৈঠকত কেইবাটাও গুৰুত্বপূৰ্ণ সিদ্ধান্ত গ্ৰহণ কৰা হয় ।
তাৰ ভিতৰত অন্যতম হৈছে পিএছঅ'ৰ খৰচ । এতিয়াৰে পৰা ব্যক্তিগত পিএছঅ'ৰ খৰচ বহন কৰিব লাগিব আবেদন কৰা ব্যক্তিয়ে । মুখ্যমন্ত্ৰীয়ে কয়, "চৰকাৰে আজি এটা সিদ্ধান্ত লৈছে যে কোনোবা ব্যক্তিৰ যদি ভাবুকিৰ ধাৰণা থাকে তেওঁ আমাক পিএছঅ'ৰ বাবে আবেদন কৰিব পাৰিব । কিন্তু পিএছঅ'জনৰ সম্পূৰ্ণ দৰমহা সেই ব্যক্তিজনে দিব লাগিব । আমি পিএছঅ' দিম কিন্তু মাহত ৭৫ হাজাৰ টকা চৰকাৰক দিব লাগিব ।" অৱশ্যে জীৱনৰ প্ৰতি ভাবুকি থকা লোকেহে পিএছঅ' পাব বুলি মুখ্যমন্ত্ৰীয়ে স্পষ্ট কৰি দিয়ে ।
৮ ডিচেম্বৰত গুৱাহাটীলৈ আহিব পোষ্ট মেলোনে
অসম চৰকাৰৰ কনচাৰ্ট পলিচীৰ কথা উল্লেখ কৰি মুখ্যমন্ত্ৰীয়ে কয় যে অহা ডিচেম্বৰ মাহত গুৱাহাটীত এক বৃহৎ কনচাৰ্ট অনুষ্ঠিত হ'ব । কনচাৰ্ট ইক'নোমিৰ ভৱিষ্যতৰ স্থান হিচাপে গুৱাহাটী, ডিব্ৰুগড় আৰু যোৰহাটক কেবিনেটত অনুমোদন দিয়া হয় । অৰ্থাৎ যি কোম্পানীয়ে অসমত কনচাৰ্ট অনুষ্ঠিত কৰিবলৈ আহিব তেওঁলোকে এই তিনিটা স্থানত কৰিব পাৰিব । মুখ্যমন্ত্ৰীৰ মতে কনচাৰ্ট ইক'নোমিৰ ক্ষেত্ৰত অসম ইমান দিনে বাদ পৰি আছিল । ইয়াৰ প্ৰথম পদক্ষেপ হিচাপে আমেৰিকাৰ বিশিষ্ট কণ্ঠশিল্পী পোষ্ট মেলোনে অহা ডিচেম্বৰৰ ৮ তাৰিখে গুৱাহাটীত অনুষ্ঠান পৰিৱেশেন কৰিব বুলিও মুখ্যমন্ত্ৰীয়ে ঘোষণা কৰে ।
চাহ শ্ৰমিকৰ দৈনিক মজুৰি বৃদ্ধি
ইয়াৰ উপৰিও অসমৰ চাহ বাগিচাৰ কৰ্মচাৰীৰ বাবেও কেবিনেটে দিলে ভাল খবৰ । মুখ্যমন্ত্ৰীয়ে উল্লেখ কৰা মতে চাহ বাগিচাৰ শ্ৰমিকসকলৰ দৈনিক মজুৰি ২৫০ টকা প্ৰতিদিনে হ'ব লাগে । কিন্তু অসম চৰকাৰৰ চাহ বাগিচাসমূহক চৰকাৰে ২২০ টকা দি আছিল । কিন্তু ১ অক্টোবৰৰ পৰা অসম চৰকাৰৰ অধীনৰ চাহ বাগিচাসমূহৰ কৰ্মচাৰীক ২৫০ টকাকৈ দিয়াৰ সিদ্ধান্ত গ্ৰহণ কৰা হয় ।
কেবিনেটৰ আন এক সিদ্ধান্ত সন্দৰ্ভত মুখ্যমন্ত্ৰীয়ে কয়, "নুমলীগড় শোধনাগাৰত আমাৰ ২৬ শতাংশ অংশীদাৰ আছে । তাৰ বিভিন্ন উন্নয়নমূলক কামৰ বাবে অসম চৰকাৰে ২০৫ কোটি টকা দিয়াৰ সিদ্ধান্ত গ্ৰহণ কৰিছে ।"
চৃড়ান্ত হ'ল কাজিৰঙাৰ ষষ্ঠ সংযোজন
একেদৰে কেবিনেটত কাজিৰঙা ৰাষ্ট্ৰীয় উদ্যানৰ ষষ্ঠ সংযোজন চূড়ান্ত কৰা হয় । মুখ্যমন্ত্ৰীয়ে কয়, "১৯৮৫ চনত কাজিৰঙাৰ ষষ্ঠ সংযোজনৰ খচৰা প্ৰস্তুত কৰা হৈছিল কিন্তু আজিলৈকে তাৰ চৃড়ান্ত ৰূপ দিয়া হোৱা নাছিল কিন্তু আজি কেবিনেটত কাজিৰঙা ষষ্ঠ সংযোজন চৃড়ান্ত কৰা হৈছে । ৪৭,২৯১ হেক্টৰ ভূমিত আমি চৃড়ান্ত কৰিছো । যাৰ বাবে বিশ্বনাথৰ বিভিন্ন ঠাই কাজিৰঙাৰ ষষ্ঠ সংযোজনৰ পৰা বাদ দিয়া হৈছে ।"
ইয়াৰ উপৰিও কেবিনেটত লাচিত বৰফুকন পুলিচ একাডেমীৰ বিভিন্ন উন্নয়নমূলক কামৰ বাবেও ২৩৯ কোটি টকা অনুমোদন জনোৱা হয় । ডিব্ৰুগড়ত অসম বিধানসভা নিৰ্মাণ কৰিবলৈও কেবিনেটে ২৮৪ কোটি টকাৰ অনুমোদন জনাইছে ।
ডিব্ৰুগড়ত হ'ব ৰাজ্যৰ সৰ্ববৃহৎ ষ্টেডিয়াম
ইয়াৰ উপৰিও ডিব্ৰুগড়ৰ ৰাইজৰ বাবে এক বৃহৎ ঘোষণা কৰে মুখ্যমন্ত্ৰীয়ে । তেওঁ উল্লেখ কৰা মতে ডিব্ৰুগড়ত অসমৰ ভিতৰত আটাইতকৈ বৃহৎ ষ্টেডিয়াম নিৰ্মাণৰ সিদ্ধান্ত গ্ৰহণ কৰা হয় । তেওঁ কয়, "ডিব্ৰুগড় খনিকৰ খেলপথাৰত ৫০০০ মানুহে একেলগে খেল উপভোগ কৰে । কিন্তু এতিয়া অসমৰ সৰ্ববৃহৎ খেলপথাৰলৈ ইয়াক উন্নতকৰণৰ বাবে ২০৯ কোটি টকা অনুমোদন দিয়া হৈছে । য'ত ৩৫ হাজাৰ লোকে একেলগে খেল উপভোগ কৰিব পাৰিব ।"
লগতে পঢ়ক :অসমত হ’ব আমূলৰ বৃহৎ গাখীৰ উদ্যোগ; কেবিনেটে জনালে ২০ বিঘা ভূমিৰ অনুমোদন - AMUL
