এইবাৰ কংগ্ৰেছে কংগ্ৰেছক জিকাব : প্ৰদেশ কংগ্ৰেছৰ সভাপতি গৌৰৱ গগৈ
ৰাজীৱ ভৱনত নিশালৈ ১২ঘণ্টীয়া বৈঠক । ৩৫খন জিলালৈ প্ৰেৰণ কৰা মুঠ ৮৮গৰাকী জিলা পৰ্যবেক্ষকৰ সৈতে ৰুদ্ধদ্বাৰ বৈঠক । গৌৰৱ গগৈয়ে ল'লে তৃণমূলৰ বাৰ্তা ৷
Published : June 21, 2025 at 11:38 AM IST
গুৱাহাটী : প্ৰদেশ কংগ্ৰেছৰ সভাপতি হিচাপে দায়িত্ব লাভৰ পাছতে থমকি ৰোৱা নাই যোৰহাট সমষ্টিৰ সাংসদ গৌৰৱ গগৈ । দিন-ৰাতি একাকাৰ কৰি দলটোক শক্তিশালী কৰি ২০২৬ৰ বাবে জোৰদাৰ প্ৰস্তুতি চলাইছে গৌৰৱ গগৈয়ে । দলটোক নতুন ৰূপ দি ২০২৬ত যুঁজ দিয়াৰ বাবে পৰিকল্পনাৰে আগবাঢ়িছে সভাপতিগৰাকী ।
এঘণ্টা-দুঘণ্টা নহয় শুকুৰবাৰে নিশালৈ ১২ ঘণ্টাৰ এক গুৰুত্বপূৰ্ণ বৈঠকত মিলিত হয় গৌৰৱ গগৈ । ৩৫ খন জিলালৈ প্ৰেৰণ কৰা মুঠ ৮৮ গৰাকী জিলা পৰ্যবেক্ষকৰ সৈতে শুকুৰবাৰে নিশা প্ৰায় ১১ বজালৈকে প্ৰায় ১২ ঘণ্টাৰ বৈঠক কৰে সভাপতি গৌৰৱ গগৈয়ে । গুৱাহাটীৰ ৰাজীৱ ভৱনত অনুষ্ঠিত জিলাভিত্তিক এই পৰ্যালোচনা সভাত বহুকেইটা দিশত আলোচনা কৰা হয় ।
দীঘলীয়া বৈঠকৰ অন্তত সাংবাদিকৰ আগত গৌৰৱ গগৈয়ে কয়, "আমি আমাৰ বিষয়ববীয়াক ক'ব বিচাৰিছো যে ৰাজীৱ ভৱনতকৈ ফিল্ডত থাকক, গাঁৱত থাকক । মোৰ ওচৰত থকাৰ বিপৰীতে গাঁৱৰ ৰাইজৰ ওচৰত থাকক । তেতিয়াহে তেওঁলোকৰ ৰাজনৈতিক ভৱিষ্যত শক্তিশালী হৈ থাকিব ।’’
‘‘সকলোৰে ওপৰত, প্ৰত্যেক ব্লকৰ ওপৰত আমাৰ চকু থাকিব । প্ৰতিটো ব্লক আমাৰ বাবে গুৰুত্বপূৰ্ণ । বাৰ ঘণ্টীয়া মিটিঙত আমি তৃণমূল কৰ্মীসকলৰ সকলো বাৰ্তা লাভ কৰিছো । এতিয়া আমাৰ দলৰ জ্যেষ্ঠসকলৰ দায়িত্ব যে আমি আমাৰ তৃণমূল কৰ্মীসকলৰ লাভ তথ্য অনুসৰি কাম কৰাটো । পৰ্যবেক্ষকৰ যোগেদি তৃণমূলৰ কৰ্মীসকলে আমাক সকলো কথা জনালে । এতিয়া আমি কাম কৰিব লাগিব ।" গগৈয়ে কয় ৷
সাংবাদিকৰ প্ৰশ্নৰ উত্তৰত গৌৰৱ গগৈয়ে কয়, "আমি ৮৮ গৰাকী পৰ্যবেক্ষক নিযোগ কৰিছো । পঞ্চায়ত নিৰ্বাচনত কোনে কষ্ট কৰিছিল সেইখিনি কথা আমি জানিবলৈ বিচাৰিছিলো । আগন্তুক নিৰ্বাচনত আমাক সকলোকে লাগিব । কাকো আঁতৰত ৰাখি আমি একো কৰিব বিচৰা নাই ।’’
‘‘আমাৰ কংগ্ৰেছ দলটো এখন সুন্দৰ বাগিচাৰ দৰে । সকলো ৰঙৰ ফুল আমাৰ বাগিচাত দেখা পাব । আমাৰ বিধায়কসকলে নিজৰ নিজৰ সমষ্টিত সুন্দৰভাৱে কাম কৰি আছে। আমি বিজেপি হ'বলৈ বিচৰা নাই । আমি কংগ্ৰেছ হ'বলৈ বিচাৰো । কংগ্ৰেছে কেনেদৰে নিৰ্বাচন জিকিব লাগে, কেনেদৰে শাসন কৰিব লাগে, কেনেদৰে ৰাইজৰ সেৱা কৰিব লাগে সেয়া ভালদৰে জানে ।’’ গগৈয়ে কয় ৷
‘‘কংগ্ৰেছ এটা আন্দোলনৰ পৰা জন্ম হোৱা দল । স্বাধীনতা সংগ্ৰামৰ পৰা জন্ম হোৱা দল কংগ্ৰেছ । আমি এটা পৰিয়াল । কোৱা হয় যে কংগ্ৰেছে কংগ্ৰেছক পৰাজিত কৰে । এইবাৰ আমাৰ চেষ্টা আৰু উদ্দেশ্য যে এইবাৰ কংগ্ৰেছেহে কংগ্ৰেছক জিকাব ।" গৌৰৱ গগৈয়ে কয় ৷
