সুৰক্ষাৰ দোহাই দি জেল কৰ্তৃপক্ষই দিয়া আহাৰ গ্ৰহণ কৰাৰ পৰা বিৰত অমৃতপাল সিং আৰু সহযোগীসকল

মৰাণ, 1 মাৰ্চ: বৰ্তমানেও ডিব্ৰুগড়ৰ কেন্দ্ৰীয় কাৰাগাৰত আৱদ্ধ হৈ আছে ৱাৰিছ পঞ্জাৱ দেৰ অমৃতপাল সিং সহ আন 10 খালিস্তানী নেতা ৷ শেহতীয়া জানিব পৰা মতে ডিব্রুগড় কাৰাগাৰ কৰ্তৃপক্ষই যোগান ধৰা খাদ্য গ্ৰহণ কৰা নাই খালিস্তানপন্থী নেতা অমৃতপাল সিং আৰু তেওঁৰ কাৰাবন্দী সহযোগীসকলে ৷ প্ৰাপ্ত তথ্য মতে সুৰক্ষাৰ দোহাই দি জেল কৰ্তৃপক্ষই দিয়া আহাৰ গ্ৰহণ কৰাৰ পৰা বিৰত আছে অমৃতপাল সিং আৰু সহযোগীসকল ৷

ইয়াৰ বিপৰীতে জেল কৰ্তৃপক্ষৰ এক সূত্ৰ মতে নিজে তৈয়াৰ কৰা খাদ্য খাই আছে কাৰাবন্দী খালিস্তানী নেতাকেইজনে ৷ গ্ৰহণ কৰা নাই ডিব্রুগড় কাৰাগাৰ কৰ্তৃপক্ষই যোগান ধৰা খাদ্য ৷ ইয়াৰ বিপৰীতে জেল কৰ্তৃপক্ষৰ এক সূত্ৰ মতে নিজে তৈয়াৰ কৰা খাদ্য খাই আছে কাৰাবন্দী খালিস্তানী নেতাকেইজনে ৷

শেহতীয়াকৈ অমৃতপাল সিঙক ৰখা NSA চেলত নিষিদ্ধ সামগ্ৰী জব্দ হোৱাৰ পাচতেই ডিব্ৰুগড় কাৰাগাৰত উপস্থিত হয় অমৃতপাল সিঙৰ অধিবক্তা তথা প্ৰাক্তন সাংসদ ৰাজদেৱ সিং খালছা । ডিব্ৰুগড় কেন্দ্ৰীয় কাৰাগাৰত অমৃতপাল সিংসহ তেওঁৰ সহযোগীক সাক্ষাৎ কৰিবলৈ অহা জ‍্যেষ্ঠ অধিবক্তা ৰাজদেৱ সিং খালছাই সংবাদ মাধ‍্যমৰ আগত অমৃতপাল সিঙৰ লগতে 9 কাৰাবন্দীৰ বিৰুদ্ধে ষড়যন্ত্ৰ কৰাৰ অভিযোগ তুলি তেওঁলোকক পঞ্জাৱলৈ প্ৰত‍্যাৱৰ্তন কৰাৰ দাবী তুলিছিল ৷

এই দাবী উত্থাপন হোৱাৰ পাচৰে পৰা অমৃতপাল সিঙৰ লগতে 9 কাৰাবন্দীয়ে জেল কৰ্তৃপক্ষই যোগান ধৰা খাদ্য গ্ৰহণ কৰা নাই বুলি জানিব পৰা গৈছে । আনহাতে জেল কৰ্তৃপক্ষই দিয়া খাদ্য গ্ৰহণ নকৰিলেও তেওঁলোকে নিজেই বনোৱা ৰুটী আৰু পাউৰুটী ফল-মূল আদি খাই আছে বুলি কাৰাগাৰ কৰ্তৃপক্ষৰ এক বিশেষ সূত্ৰই জানিবলৈ দিছে ।

উল্লেখ কৰা প্ৰয়োজন যে, জেল কৰ্তৃপক্ষই অমৃতপাল সিঙৰ লগতে দহ কাৰাবন্দীক নিজে ৰান্ধি খাব পৰা ব্যৱস্থা কৰি দিছিল পূৰ্বৰ পৰাই । চলিত বৰ্ষৰ 17 ফেব্ৰুৱাৰীত ডিব্ৰুগড়ৰ কেন্দ্ৰীয় কাৰাগাৰৰ অমৃতপাল সিং থকা NSA চেলত জব্দ হৈছিল বৃহৎ পৰিমাণৰ চিম কাৰ্ড, টিভি ৰিম’ৰ্ট, দুটা ম'বাইল, স্পাই কেম পেইন, ব্লুটুথ হেডফোন । খালিস্তানী উগ্ৰপন্থীক ৰখা কক্ষত নিষিদ্ধ সামগ্ৰী উদ্ধাৰ হোৱা ঘটনাই ৰাজ্যজুৰি ৰহস্যৰ সৃষ্টি কৰিছিল ।

অৱশ্যে এই ঘটনাক লৈ আজি পৰ্যন্ত মুখ খোলা নাই ডিব্রুগড় কাৰাগাৰ কৰ্তৃপক্ষৰ লগতে ৰাজ্যৰ গৃহ বিভাগে । ঘটনা সন্দৰ্ভত জেল কৰ্তৃপক্ষই তদন্ত অব্যাহত ৰাখিছে আৰু এই ঘটনাৰ পাচতে ডিব্ৰুগড় কাৰাগাৰত বৃদ্ধি কৰা হৈছে নিৰাপত্তা বেষ্টনী । পৰিয়ালৰ লোকক জেলত সাক্ষাৎ কৰা ক্ষেত্ৰত বিশেষ ব্যৱস্থা কৰা হৈছে ।

উল্লেখ্য যে, বিগত বৰ্ষৰ 23 ফেব্ৰুৱাৰীত পঞ্জাৱত অজনালাকাণ্ড সংঘটিত হোৱাৰ পিছৰে পৰা পলাতক অৱস্থাত আছিল অমৃতপাল সিং । এটা মাহ ধৰি পঞ্জাৱ আৰক্ষীক প্ৰত্যাহ্বান জনাই আত্মগোপন কৰি আছিল অমৃতপাল সিঙে । বিভিন্ন সময়ত বেশভূষা সলনি কৰি পলাই ফুৰিছিল খালিস্তানী নতাজনে ।

এই ঘটনাৰ পাচতেই অমৃতপাল সিঙক পঞ্জাৱৰ মোগা জিলাত আৰক্ষীয়ে গ্ৰেপ্তাৰ কৰে ৷ ইয়াৰ পাচতেই ডিব্ৰুগড় কেন্দ্ৰীয় কাৰাগাৰলৈ লৈ অহা হয় সিঙৰ লগতে 9 সহযোগীক ।

লগতে পঢ়ক: ডিব্ৰুগড় কেন্দ্ৰীয় কাৰাগাৰত উপস্থিত ৱাৰিছ পাঞ্জাৱ দে’ৰ মুৰব্বী অমৃতপাল সিঙৰ অধিবক্তা