প্ৰকৃত কৃষকক বঞ্চিত কৰি বিধায়কপুত্ৰক চৰকাৰী আঁচনিৰ সুবিধা প্ৰদানৰ অভিযোগ - Allegation of Irregularities

কৰিমগঞ্জ, 17 আগষ্ট : হাইলাকান্দি জিলা কৃষি বিভাগৰ বিৰুদ্ধে অনিয়মৰ অভিযোগ ৷ জিলা কৃষি বিভাগৰ চৰম গাফিলতি তথা অনিয়মৰ বাবে প্ৰকৃত কৃষক চৰকাৰী আঁচনিৰ সুবিধা লাভৰ পৰা বঞ্চিত হোৱাৰ অভিযোগ উত্থাপন হৈছে ৷ অভিযোগ অনুসৰি চৰকাৰী আঁচনিৰ পাৱাৰটিলাৰ লাভৰ পৰা প্ৰকৃত কৃষকক বঞ্চিত কৰি বিধায়কৰ পুত্ৰক প্ৰদান কৰিছে এই আঁচনিৰ সুবিধা ৷

অভিযোগ অনুসৰি প্ৰকৃত কৃষকক বঞ্চিত কৰি চৰকাৰী আঁচনিৰ পাৱাৰটিলাৰ বিতৰণৰ তালিকাত নাম আহিছে হাইলাকান্দি সমষ্টিৰ বিধায়ক জাকিৰ হুছেইন লস্কৰৰ পুত্ৰ জাহাংগীৰ আলাহি লস্কৰৰ ৷ বিলাসী গাড়ী তথা বিলাসী জীৱন-যাপন কৰা এইজন বিধায়কপুত্ৰ জাহাংগীৰ আলাহি লস্কৰে কেনেকৈ এই আঁচনিৰ সুবিধা লাভ কৰিছে তাকে লৈ প্ৰশ্ন উত্থাপন কৰিছে বঞ্চিত কৃষকে ৷

ইফালে হাইলাকান্দি জিলা কৃষি বিষয়া আব্দুল বাতেনৰ ভাইৰেল হোৱা এটা বিশেষ ফোন ৰেকৰ্ডিঙে আৰু অধিক ৰহস্যৰ সৃষ্টি কৰিছে ৷ হাইলাকান্দি জিলাৰ কৃষি বিষয়া আব্দুল বাতেনৰ ফোন কল ৰেকৰ্ডিঙক লৈ ইতিমধ্যে চাঞ্চল্যৰ সৃষ্টি হৈছে জিলাখনত ৷ জানিব পৰা মতে এইজন বিধায়কপুত্ৰ জাহাংগীৰ আলাহি লস্কৰে মাটিজুৰি য়ুথ ফার্মাৰ প্ৰডিউছাৰ কোম্পানী লিমিটেড নামেৰে চৰকাৰী আঁচনি অধীনত পাৱাৰটিলাৰৰ অনুমোদন পায় ৷ ইতিমধ্যে এই ঘটনাক লৈ ক্ষোভিত হৈ পৰিছে জিলাখনৰ বঞ্চিত কৃষক তথা প্ৰকৃত হিতাধিকাৰী ৷ সেয়েহে এই ঘটনাৰ এক উচ্চ পৰ্যায়ৰ তদন্তৰ দাবী কৰিছে তেওঁলোকে ৷ এই ঘটনাক লৈ বিধায়ক আৰু জিলা কৃষি বিষয়াৰ বিৰুদ্ধে উপযুক্ত আইনী ব্যৱস্থা গ্ৰহণৰো দাবী কৰিছে ক্ষোভিত কৃষকসকলে ৷

লগতে পঢ়ক : প্ৰৱঞ্চকক গ্ৰেপ্তাৰৰ পিছতে হাহাকাৰ লাগিল ভুক্তভোগী গ্ৰাহকৰ মাজত - Fraudster in Assam