বাংলাদেশী পণ্য এসপ্তাহৰ ভিতৰত বিক্ৰী কৰি শেষ কৰাৰ দাবী

লখিমপুৰ: লখিমপুৰত জ্বলিল বাংলাদেশৰ পতাকা, ইউনুছৰ পুত্তলিকা । বাংলাদেশত হিন্দুৰ ওপৰত চলা নিৰ্যাতনৰ বিৰুদ্ধে সোমবাৰে সদৌ অসম হিন্দু যুৱ পৰিষদে লখিমপুৰ নগৰৰ মাজমজিয়াত বাংলাদেশৰ পতাকাৰ লগতে মহম্মদ ইউনুছৰ পুত্তলিকা দাহ কৰি প্ৰতিবাদ সাব্যস্ত কৰে । বাংলাদেশ চৰকাৰ হায় হায় ধ্বনিৰে লখিমপুৰত উত্তাল প্ৰতিবাদ কৰে পৰিষদে । ইস্কন মন্দিৰৰ মহাৰাজ চিন্ময়কৃষ্ণ দাসৰ মুক্তিৰ দাবীত উত্তাল প্ৰতিবাদ সাব্যস্ত কৰে সদৌ অসম হিন্দু যুৱ পৰিষদ লখিমপুৰ জিলা সমিতিয়ে ।

প্ৰতিবাদ সাব্যস্ত কৰি পৰিষদৰ নেতৃত্বই কয়,"বহু হিন্দুৰ তেজৰ বিনিময়ত যিখন বাংলাদেশে স্বাধীনতাৰ সোৱাদ পাইছিল সেইখন বাংলাদেশত এতিয়া হিন্দুক নিৰ্যাতন চলোৱা হৈছে । চৰম নিৰ্যাতন চলোৱা হৈছে হিন্দুৰ ওপৰত ।" ইয়াৰোপৰি তেওঁলোকে বাংলাদেশৰ সকলো পণ্য সামগ্রী এসপ্তাহৰ ভিতৰত শেষ কৰিবলৈ ব্যৱসায়ীসকলক আহ্বান জনায় । এসপ্তাহৰ পাছত বাংলাদেশৰ সামগ্রীৰ বিৰুদ্ধে পৰিষদে প্ৰতিবন্ধক অভিযান চলাব বুলি সকীয়াই দিয়ে ।

আনহাতে বাংলাদেশৰ বিৰুদ্ধে সকলো হিন্দু ঐক্যবদ্ধ হোৱাৰ উপৰি কেন্দ্রীয় চৰকাৰক বিশ্বজুৰি বাংলাদেশৰ বিৰুদ্ধে জনমত গঠনৰ উদ্যোগ ল'বলৈ আহ্বান জনায় । বাংলাদেশত হিন্দুৰ ওপৰত চলা নিৰ্যাতন বন্ধ নহ'লে পৰিষদে সীমান্ত ভাঙি বাংলাদেশত প্ৰৱেশ কৰি হিন্দু সুৰক্ষাৰ হকে যুঁজ দিব বুলি জংগী মন্তব্য প্ৰকাশ কৰে ।

এই প্ৰতিবাদী কাৰ্যসূচীত সম্ভু সিংহ, দীপাঞ্জল সোণোৱালকে ধৰি পৰিষদৰ ভালেকেইগৰাকী নেতা-কৰ্মীয়ে অংশগ্রহণ কৰে । পৰিষদৰ কৰ্মীসকলৰ প্ৰতিবাদী শ্ল'গানেৰে উত্তাল হৈ পৰে লখিমপুৰ চহৰ । শীঘ্ৰে কেন্দ্ৰীয় চৰকাৰক পদক্ষেপ গ্ৰহণ কৰিবলৈ আহ্বান জনাই প্ৰতিবাদকাৰীসকলে ।