ভাষা আন্দোলনৰ প্ৰথমগৰাকী ছহিদক স্মৰণ আছুৰ - Assamese Language Movement

গুৱাহাটী, ৪ জুলাই : ভাষা আন্দোলনৰ প্ৰথমগৰাকী ছহিদ ৰঞ্জিত বৰপূজাৰীৰ আজি মৃত্যু দিৱস । ১৯৬০ চনৰ ভাষা আন্দোলনৰ সময়ত ৪ জুলাইৰ দিনটোতেই কটন কলেজৰ চৌহদতে নিৰ্বিচাৰ গুলীচালনাৰে ৰঞ্জিত বৰপূজাৰীক হত্যা কৰা হৈছিল । কটন কলেজত উচ্চশিক্ষা গ্ৰহণৰ বাবে আহি ভাষাৰ বাবে প্ৰাণ আহুতি দিয়া ৰঞ্জিত বৰপূজাৰীৰ ত্যাগে আজিও উচিত বা প্ৰকৃত মূল্য পালেনে তাক লৈ বিভিন্ন সময়ত প্ৰশ্নৰ অৱতাৰণা হৈ আহিছে ।

সেইগৰাকী ৰঞ্জিত বৰপূজাৰীৰৰ মৃত্যুৰ দিনটোত সদৌ গুৱাহাটী ছাত্ৰ সন্থা আৰু কটন বিশ্ববিদ্যালয়ৰ আছু গোটৰ উদ্যোগত আৰু অসমীয়া ভাষা ছহিদ স্মৃতিৰক্ষা সমিতিৰ সহযোগত কটন‌ বিশ্ববিদ্যালয়ৰ চৌহদত এক শ্ৰদ্ধাঞ্জলি অনুষ্ঠান অনুষ্ঠিত হয় । অনুষ্ঠানত ৰঞ্জিত বৰপূজাৰীৰ প্ৰতিচ্ছবিৰ ওচৰত বন্তি প্ৰজ্বলন কৰি শ্ৰদ্ধাঞ্জলি জ্ঞাপন কৰা হয় । শ্ৰদ্ধাঞ্জলি অনুষ্ঠানত অংশ লৈ সদৌ গুৱাহাটী ছাত্ৰ সন্থাৰ সাধাৰণ সম্পাদক প্ৰাঞ্জল ডেকাই কয় যে চিৰ চেনেহী মোৰ ভাষা জননীৰ বাবে নিৰ্ভীকভাৱে প্ৰাণ আহুতি দি যুগ-যুগান্তৰলৈ অতুলনীয় ত্যাগ আৰু মাতৃভাষা প্ৰেমৰ নিদৰ্শন দেখুৱাই যোৱা ছহিদ ৰঞ্জিত বৰপূজাৰী প্ৰতিগৰাকী অসমীয়াৰ হৃদয়ত সজীৱ হৈ ৰ'ব ।

তেওঁ উল্লেখ কৰা মতে সুৱদি সুৰীয়া অসমীয়া ভাষাৰ অস্তিত্ব ৰক্ষাৰ স্বাৰ্থত ১৯৬০ চনৰ ৪ জুলাইৰ দিনটোতে সাহসেৰে মৃত্যুক আঁকোৱালি লোৱা মহান শ্বহীদগৰাকীৰ স্মৃতি দিৱসত আছুৱে গভীৰ শ্ৰদ্ধাৰে সোঁৱৰণ কৰে । তেওঁ কয় যে যেতিয়ালৈকে অসমীয়া ভাষা জীয়াই থাকিব অসমীয়া জাতি জীয়াই থাকিব । তেওঁৰ ত্যাগ কেতিয়াও অথলে নাযায় বুলিও আছু নেতাগৰাকীয়ে উল্লেখ কৰে ।

ইফালে কেন্দ্ৰীয় মন্ত্ৰী সৰ্বানন্দ সোণোৱালেও সামাজিক মাধ্যমৰ জৰিয়তে মহান ছহিদগৰাকীৰ স্মৃতি দিৱসত গভীৰ শ্ৰদ্ধাৰে সুঁৱৰি কয়,"চিৰ চেনেহী মোৰ ভাষা জননীৰ বাবে নিৰ্ভীকভাৱে প্ৰাণ আহুতি দি যুগ-যুগান্তৰলৈ অতুলনীয় ত্যাগ আৰু মাতৃভাষা প্ৰেমৰ নিদৰ্শন দেখুৱাই যোৱা ছহিদ ৰঞ্জিত বৰপূজাৰী প্ৰতিজন অসমীয়াৰ হৃদয়ত সজীৱ হৈ ৰ'ব । সুৱদি সুৰীয়া অসমীয়া ভাষাৰ অস্তিত্ব ৰক্ষাৰ স্বাৰ্থত ১৯৬০ চনৰ আজিৰ দিনটোতে সাহসেৰে মৃত্যুক আঁকোৱালি লোৱা মহান ছহিদগৰাকীক আজি স্মৃতি দিৱসত গভীৰ শ্ৰদ্ধাৰে সুঁৱৰিছো ।"