মন্ত্ৰী যোগেন মোহনৰ ঘৰ ঘেৰাও কৰাৰ হুংকাৰ আটাছুৰ - Atasu Central Foundation Day

তিনিচুকীয়া, 18 জুন : সোমবাৰে সদৌ টাই আহোম ছাত্ৰ সন্থা তিনিচুকীয়া জিলা সমিতিৰ কাৰ্যালয়ত সদৌ টাই আহোম ছাত্ৰ সন্থা কেন্দ্ৰীয় সমিতিৰ এখনি সাধাৰণ সভা সম্পন্ন কৰা হয় ৷ তাৰ পিচতে সদৌ টাই আহোম ছাত্ৰ সন্থাৰ সম্পাদক ভাস্কৰ বৰগোঁহাই, কাৰ্যকৰী সভাপতি দেৱজিৎ গগৈ আৰু সভাপতি মিলন বৰগোঁহাইৰ উপস্থিতিত অনুষ্ঠিত হোৱা সাধাৰণ সভাখনৰ অন্তত এখন সংবাদমেল সম্বোধন কৰে ৷

সাধাৰণ সভাৰ সিদ্ধান্তসমূহ সংবাদমেলত অৱগত কৰি কয় যে অহা 14 আৰু 15 জুলাইত সংগঠনটোৰ 36 সংখ্যক কেন্দ্ৰীয় প্ৰতিষ্ঠা দিৱস তিনিচুকীয়া জিলা সমিতিৰ অন্তৰ্গত বৰলাইপুলিত আয়োজন কৰা হ’ব ৷ তাৰ পিচতে আহোম জনগোষ্ঠীৰ জনজাতিকৰণৰ ক্ষেত্ৰত নিৰৱ ভূমিকা লোৱা আহোম জনগোষ্ঠীৰ মন্ত্ৰী, বিধায়ক, সাংসদৰ ঘৰ ঘেৰাও কাৰ্যসূচী ঘোষণা কৰা হ’ব ৷ এই কাৰ্যসূচী অনুসৰি, অহা 20 আগষ্টত প্ৰথম মন্ত্ৰী যোগেন মোহনৰ ঘৰ ঘেৰাও কৰা হ’ব ৷

পৰৱৰ্তী সময়ত জনজাতিকৰণৰ দাবীত জিলাই জিলাই এলানি কাৰ্যসূচী ঘোষণা কৰা হৈছে ৷ প্ৰয়োজন অনুসৰি এই কাৰ্যসূচী দিছপুৰ আৰু দিল্লীৰ স্বাৰস্থ কৰা হ’ব ৷ সমান্তৰালকৈ এই বৰ্ষৰ প্ৰতিষ্ঠা দিৱসৰ পৰাই প্ৰতিবছৰে আটাছুৰ কেন্দ্ৰীয় প্ৰতিষ্ঠা দিৱসত অসমৰ এগৰাকী সাংবাদিকক আটাছুৰ প্ৰাক্তন সভাপতি ডামচাও অশ্বিনী কুমাৰ চেতিয়াৰ সোঁৱৰণিত "ব্ৰজকণ্ঠ" বঁটা প্ৰদান কৰাৰ সিদ্ধান্ত গ্ৰহণ কৰা হয় ৷ ইতিমধ্যে এই বৰ্ষৰ বঁটা প্ৰদানৰ বাবে এখন কমিটী গঠন কৰি দিছে সংগঠনটোৱে ৷

ইফালে, আটাছুৰ নতুন কেন্দ্ৰীয় সমিতি গঠন হোৱাৰ পৰাই সংগঠনৰ নিস্ক্ৰিয় ভূমিকাৰ বাবে যুটায়া সম্পাদক অচ্যুত বুঢ়াগোহাঁইৰ পদ কৰ্তন কৰা হয় ৷ এতিয়াৰে পৰা সংগঠনটোত এগৰাকীয়ে সম্পাদক থাকিব আৰু মুখ্য উপদেষ্টা দুলাল বৰুৱাকো সময় দিব নোৱাৰাৰ বাবে স-সন্মানে অৱসৰ প্ৰদান কৰে সংগঠনটোৱে ৷

লগতে পঢ়ক: জখলাবন্ধাৰ হেমপ্ৰভাৰ দোকানত চাহৰ জুতি ল'লে স্বাস্থ্যমন্ত্ৰীয়ে - Subhadras Spiral Potato