দিল্লী কেপিটেলছৰ স্বপ্ন ভংগ কৰি দ্বিতীয়বাৰৰ বাবে WPL ৰ খিতাপ দখল মুম্বাই ইণ্ডিয়ানছৰ
মুম্বাই ইণ্ডিয়ানছৰ অধিনায়ক হৰমনপ্ৰীত কৌৰে পুনৰবাৰ তাৰকাময় প্ৰদৰ্শন আগবঢ়াই দিল্লী কেপিটেলছৰ বিৰুদ্ধে সংগ্ৰামৰত অৱস্থাৰ পৰা দলটোক ৰক্ষা কৰে ।
Published : March 16, 2025 at 8:54 AM IST
মুম্বাই: ডব্লিউ পি এলৰ তৃতীয় ছিজনৰ ফাইনেলত অধিনায়ক হৰমনপ্ৰীত কৌৰৰ চমৎকাৰ বেটিঙে শনিবাৰে মহিলা প্ৰিমিয়াৰ লীগৰ খিতাপ দখল কৰাত মুম্বাই ইণ্ডিয়ানছক সহায় কৰাৰ বিপৰীতে দিল্লী কেপিটেলছ একেৰাহে তৃতীয়বাৰৰ বাবে পৰাজয়ৰ সন্মুখীন হয় । হৰমনপ্ৰীতে তৃতীয় উইকেটৰ বাবে নাটালি স্কাইভাৰ ব্ৰুণ্টৰ সৈতে ৮৯ ৰাণৰ অংশীদাৰিত্ব গঢ়ি দলটোক বিপদৰ পৰা উদ্ধাৰ কৰিছিল যদিও যুটিটো আউট হোৱাৰ পিছত মুম্বাইয়ে মাত্ৰ ১৪৯ ৰাণহে সংগ্ৰহ কৰিবলৈ সক্ষম হৈছিল ।
এই সময়ছোৱাত দিল্লী কেপিটেলছৰ হৈ মাৰিজান কেপ, জেছ জোনাছন আৰু চৰণীয়ে দুটাকৈ উইকেট দখল কৰে । প্ৰত্যুত্তৰত দিল্লী কেপিটেলছৰ দলে ২০ অভাৰত ৯টা উইকেট হেৰুৱাই ১৪১ ৰাণ সংগ্ৰহ কৰিব পাৰে । এই খেলখনত মুম্বাইয়ে ৮ ৰাণত জয়লাভ কৰে । ডব্লিউ পি এলত মুম্বাইৰ এয়া দ্বিতীয়টো জয় । ইয়াৰ পূৰ্বে মুম্বাইয়েও প্ৰথম ছিজনত জয়লাভ কৰিছিল । আনহাতে দিল্লী কেপিটেলছে একেৰাহে তৃতীয়বাৰৰ বাবে ফাইনেলত প্ৰৱেশ কৰাৰ পাছতো খিতাপ দখল কৰিব নোৱাৰিলে ।
এলিমিনেটৰৰ তাৰকা হেলী মেথিউছ (৩) আৰু ইয়াষ্টিকা ভাটিয়া (৩)ৰ উইকেট পতন ঘটাৰ পাছত মুম্বাই ইণ্ডিয়ানছ ককবকাবলৈ ধৰে যদিও অধিনায়ক হৰমনপ্ৰীতে (৬৬) নাটালি স্কাইভাৰ ব্ৰুণ্টৰ (৩০) সৈতে তৃতীয় উইকেটৰ বাবে ডাঙৰ অংশীদাৰিত্ব গঢ়ি দলটোক ১০০ ৰাণৰ সীমা অতিক্ৰম কৰে ।
ইয়াৰ পিছতে নাটালি আউট হৈছিল যদিও অধিনায়ক হৰমনপ্ৰীতে দিল্লীৰ বলাৰসকলক থ্ৰেছ কৰি থাকিল । ৪৪ বলৰ ইনিংছত হৰমনপ্ৰীতে ৯টা চাৰি আৰু দুটা ছয় কৰে । হৰমনপ্ৰীত ক্ৰীজত থকা সময়ৰ লৈকে মুম্বাই ইণ্ডিয়ানছক সহজেই ১৫০ ৰাণ অতিক্ৰম কৰিবলৈ সাজু হোৱা যেন লাগিছিল । কিন্তু তেওঁ আউট হোৱাৰ পিছত স্ক’ৰ মাত্ৰ ১৪৯ হে হয় ।
মুম্বাই কেপিটেলছে নিৰ্ধাৰণ কৰি দিয়া ১৫০ ৰাণৰ লক্ষ্য অনুসৰণ কৰি খেলপথাৰত অৱতীৰ্ণ হোৱা দিল্লী কেপিটেলছৰ আৰম্ভণি বেয়া আছিল । ১৭ ৰাণ সংগ্ৰহ কৰি দলটোৱে দুটা বিপৰ্যয়ৰ সন্মুখীন হৈছিল । অধিনায়ক মেগ লেনিঙে ১৩ ৰাণ আৰু শ্বেফালী বাৰ্মাই ৪ ৰাণ সংগ্ৰহ কৰে । পাৱাৰ প্লে’ৰ একেবাৰে পিছৰ অভাৰত তৃতীয়টো বিপৰ্যয়ৰ সন্মুখীন হ’বলগীয়া হয় দলটো । জেছ জোনাচেনে ১৫টা বলত ১৩ ৰাণ সংগ্ৰহ কৰে ।
ইয়াৰ পিছত দিল্লীয়ে সুস্থ হোৱাৰ সুযোগ নাপালে । এনাবেল চাথাৰলেণ্ডে মাত্ৰ ২ ৰাণহে কৰিব পাৰিছিল । জেমিমাহ ৰড্ৰিগেছে বিস্ফোৰক বেটিং কৰিছিল যদিও ডাঙৰ ইনিংছ খেলিব নোৱাৰিলে । জেমিমাই ৪টা চাৰিৰ সহায়ত ২১টা বলত ৩০ ৰাণ সংগ্ৰহ কৰে । উইকেটকীপাৰ চাৰা ব্ৰাইছে ৫ ৰাণ সংগ্ৰহ কৰি ৰাণ আউট হয় । তেওঁ ৫টা বলৰ সন্মুখীন হৈছিল । ইয়াৰ পিছত নেট স্কাইভাৰ-ব্ৰুণ্টে একেৰাহে দুটা আঘাত দিয়ে দিল্লীক ।
নেট স্কাইভাৰ-ব্ৰুণ্টে প্ৰথমে মাৰিজান কেপক হেলীৰ হাতত ধৰা পেলায় । কাপে ২৬টা বলত ৪০ ৰাণ সংগ্ৰহ কৰে । তাৰ পিছৰ বলত ব্ৰুণ্টে শিখা পাণ্ডেক বল্ড কৰে । শিখা কোনো ৰাণ নকৰাকৈ পেভেলিয়নমুখী হয় । মিন্নু মণিয়ে ৪ ৰাণ সংগ্ৰহ কৰে । নিকি প্ৰসাদে ২৫ ৰাণ আৰু নল্লপুৰেড্ডী চৰণীয়ে ৩ ৰাণত অপৰাজিত হৈ থাকে । নেট স্কাইভাৰ-ব্ৰাণ্টে ৩টা উইকেট দখল কৰে । লগতে আমেলিয়া কেৰে ২টা সফলতা লাভ কৰে ।
লগতে পঢ়ক: মুম্বাই আৰু দিল্লীৰ মাজত উইমেনছ প্ৰিমিয়াৰ লীগৰ ফাইনেল
