টি-২০ ক্ৰিকেটলৈ প্ৰত্যাৱৰ্তন কৰিব নেকি বিৰাটে ? ভংগ কৰিলে মৌনতা

বেংগালুৰু: শনিবাৰে ভাৰতৰ তাৰকা বেটছমেন বিৰাট কোহলীয়ে ৰয়েল চেলেঞ্জাৰ্ছ বেংগালুৰু দলত যোগদান কৰে । কাৰণ ২২ মাৰ্চৰ পৰা আই পি এলৰ ১৮ সংখ্যক ছিজন আৰম্ভ হ’ব ৷ এই ছিজনতো বিৰাটক আৰ চি বিৰ হৈ খেলা দেখা যাব ।

কিন্তু ২০২৪ চনৰ টি-২০ বিশ্বকাপ জয় কৰাৰ পিছৰে পৰা আৰম্ভ কৰি চেম্পিয়নছ ট্ৰফী জয় কৰালৈকে টীম ইণ্ডিয়াৰ তাৰকা খেলুৱৈ বিৰাটে অৱসৰৰ কথা ঘোষণা কৰিব বুলি প্ৰচাৰ হৈছিল উৰাবাতৰি ।

কিন্তু অৱসৰৰ কোনো কথা ঘোষণা নকৰি কোহলীয়ে নিজৰ অনুৰাগীক দিছে বৃহৎ সকাহ ৷ শেহতীয়াকৈ বিৰাটে অৱসৰৰ সন্দৰ্ভত পুনৰবাৰ নিজৰ মৌনতা ভংগ কৰিছে ।

বেংগালুৰুত অনুষ্ঠিত আৰ চি বি ইন’ভেচন লেব ইণ্ডিয়ান স্প’ৰ্টছ ছামিটত ঈশা গুহাই আঁতধৰা অনুষ্ঠানত অংশগ্ৰহণ কৰি কোহলীয়ে নিজৰ ক্ৰিকেটৰ ভৱিষ্যত আৰু অৱসৰৰ পিছত কি কৰিব, সেই বিষয়ে আলোচনা কৰে ।

ইয়াৰ উপৰিও তেওঁ ক্ৰিকেটক অলিম্পিকৰ অংশ হিচাপে গঢ়ি তোলা আৰু ভাৰতত মহিলা ক্ৰিকেটৰ বিকাশৰ দৰে বিষয়তো নিজৰ মতামত ব্যক্ত কৰে ।

অৱসৰৰ পিছত কি কৰিব কোহলীয়ে ?

এই প্ৰশ্নৰ উত্তৰত কোহলীয়ে কয় যে, ক্ৰিকেটৰ পৰা অৱসৰ লোৱাৰ পিছত তেওঁ কি কৰিব বিচাৰে সেই বিষয়ে এতিয়াও স্পষ্ট হোৱা নাই । কোহলীয়ে কয় যে, তেওঁ যেতিয়া নিজৰ এজন সহকৰ্মীক একেটা প্ৰশ্ন সুধিছিল, তেতিয়া তেৱো একে উত্তৰ পাইছিল । অৱশ্যে ক্ৰিকেটৰ পাছত ভ্ৰমণ তেওঁৰ জীৱনৰ এক গুৰুত্বপূৰ্ণ অংগ হৈ পৰিব পাৰে বুলি কোহলীয়ে সম্ভাৱনা ব্যক্ত কৰে ৷

এয়া মোৰ শেষৰটো শৃংখলা হ’ব পাৰে !

অষ্ট্ৰেলিয়া ভ্ৰমণৰ সময়ত শেহতীয়াকৈ অনুষ্ঠিত বৰ্ডাৰ-গাভাস্কাৰ টেষ্ট শৃংখলাত বিৰাটে ৰাণ সংগ্ৰহৰ বাবে যথেষ্ঠ সংগ্ৰাম কৰা দেখা গৈছিল । ক্ৰিকেটাৰগৰাকীয়ে কয় যে, তেওঁ উক্ত শৃংখলাত ২৩.৭৫ গড়ে ৯ ইনিংছত মাত্ৰ ১৯০ ৰাণহে সংগ্ৰহ কৰিছিল ।

বিৰাটে লগতে কয়, ‘‘মই হয়তো মোৰ কেৰিয়াৰত আৰু কেতিয়াও অষ্ট্ৰেলিয়া ভ্ৰমণ কৰিব নোৱাৰিম । কিন্তু এতিয়ালৈকে যি হৈছে, তাত মই সন্তুষ্ট’’ । ছ’চিয়েল মিডিয়াত শেহতীয়াকৈ তেওঁৰ অনুৰাগীসকলে বিৰাটে টেষ্টকো বিদায় দিয়াৰ কথা ভবা বুলি চৰ্চা অব্যাহত ৰাখিছে ৷

টি-২০ ক্ৰিকেটত পুনৰ উভতিব নেকি বিৰাট কোহলী ?

২০২৪ চনৰ টি-২০ বিশ্বকাপৰ পিছত ক্ৰিকেটৰ সৰ্বাধিক চুটি ফৰ্মেটক বিৰাট কোহলীয়ে বিদায় দিছিল ৷ সম্প্ৰতি এই ফৰ্মেটৰ ক্ৰিকেটত প্ৰত্য়াৱৰ্তন ঘটোৱাৰ ইংগিত দিছে বিৰাটে ৷

দৰাচলতে অলিম্পিকত ক্ৰিকেটৰ অন্তৰ্ভুক্তিৰ কথা সোধাত তেওঁ নিজৰ সুখ প্ৰকাশ কৰি ক্ৰিকেটৰ ইতিহাসৰ এক বৃহৎ সুযোগ বুলি অভিহিত কৰে ।

যদি টীম ইণ্ডিয়াই অলিম্পিকৰ ফাইনেলত প্ৰৱেশ কৰে, তেন্তে সেই এখন মেচৰ বাবে তেওঁ টি-২০ ৰ পৰা অৱসৰ প্ৰত্যাহাৰ কৰিব । তেওঁ কয় যে, অলিম্পিকত পদক লাভ কৰাটো আচৰিত হ’ব আৰু ভাৰতৰ সেই সুযোগ আছে ।

লগতে পঢ়ক: দিল্লী কেপিটেলছৰ স্বপ্ন ভংগ কৰি দ্বিতীয়বাৰৰ বাবে WPL ৰ খিতাপ দখল মুম্বাই ইণ্ডিয়ানছৰ - WPL 2025 FINAL