টাইগাৰ শ্ৰফৰ সৈতে মাৰ্চিয়েল আৰ্টছৰ প্ৰশিক্ষণ লোৱা ত্ৰিশূল ভূঞা ওলাইছে কাজাখস্তানলৈ

কলিয়াবৰ : নৱবৰ্ষৰ প্ৰথমটো দিনতে কলিয়াবৰবাসীৰ বাবে ভাল খবৰ । আন্তঃৰাষ্ট্ৰীয় মিক্সড মাৰ্চিয়েল আৰ্টছ প্ৰতিযোগিতালৈ নিৰ্বাচিত হৈছে কলিয়াবৰৰ ত্ৰিশূল ভূঞা । ভাৰতৰ মিক্সড মাৰ্চিয়েল আৰ্টছ জগতত ত্ৰিশূল ভূঞা এক চিনাকী নাম । এতিয়া ত্ৰিশূল ভূঞাই আন্তঃৰাষ্ট্ৰীয় পৰ্যায়তো ভূমুকি মাৰিবলৈ যাব কাজাখস্তানলৈ ।

কলিয়াবৰৰ ত্ৰিশূল ভূঞাই বলীউড অভিনেতা টাইগাৰ শ্ৰফৰ সৈতে মাৰ্চিয়েল আৰ্টছৰ প্ৰশিক্ষণ লৈ কেইবাখনো বলীউড ৱেব ছিৰিজত মাৰ্চিয়েলৰ প্ৰশিক্ষণ দিছিল । ইতিমধ্যে কলিয়াবৰত 'বিগ ব্ৰাডাৰ্ছ ফাইট ক্লাব'ৰ জৰিয়তে কলিয়াবৰৰ বহু ছাত্ৰ-ছাত্ৰীক মিক্সড মাৰ্চিয়েল আৰ্টছৰ প্ৰশিক্ষণ দি আহিছে ত্ৰিশূলে ।

সমৰ কলাৰ জৰিয়তে সফলতা

অসম দুৰ্যোগ ব্যৱস্থাপনা আৰু প্ৰশমন বিভাগত কৰ্মৰত ত্ৰিশূল ভূঞাই অসম আৰক্ষীয়ে আয়োজন কৰা সমৰ কলা প্ৰতিযোগিতাতো সফলতা লাভ কৰিবলৈ সক্ষম হৈছে । আন্তঃৰাষ্ট্ৰীয় ক্ৰীড়াত অংশগ্ৰহণৰ বাবে পূৰ্ণগতিত অনুশীলন কৰিছে কলিয়াবৰৰ ত্ৰিশূল ভূঞাই । ইফালে নতুন বছৰৰ বিভিন্ন পৰিকল্পনাৰ কথাও ত্ৰিশূল ভূঞাই উল্লেখ কৰে ।

নতুন পৰিকল্পনা

ত্ৰিশূল ভূঞাই জনোৱা মতে তেওঁ অসম আৰক্ষীক প্ৰতিনিধিত্ব কৰি ২০২৩-২৪ বৰ্ষত উশ্বু, বক্সিং আৰু কাৰাটেৰ কেইবাটাও প্ৰতিযোগিতাত পদক লাভ কৰিবলৈ সক্ষম হৈছে । তেওঁ কয়,"২০২৫ চনত মিক্সড মাৰ্চিয়েল আৰ্টছত আন্তঃৰাষ্ট্ৰীয় পৰ্যায়ৰ কেইবাটাও প্ৰতিযোগিতাত অংশগ্ৰহণ কৰাৰ কথা আছে । নেপাল আৰু কাজাখস্তানৰ দুখন খেলৰ অফাৰ মোৰ হাতলৈ আহিছে । সেয়ে মাৰ্চ-এপ্ৰিলত সম্ভৱতঃ মই বাহিৰলৈ ৰাওনা হম । বৰ্তমান মই কলিয়াবৰত বক্সিং, কাৰাটে, মিক্সড মাৰ্চিয়েল আৰ্টছ আদি বিভিন্ন ধৰণৰ প্ৰশিক্ষণ প্ৰদান কৰি আছো । নগাঁও জিলাৰ মই প্ৰথম এম এম এ খেলুৱৈ । মই বৰ্তমান দল গঠন কৰি আছো । মোৰ ছাত্ৰ-ছাত্ৰীসকলেও খেলিবলৈ আৰম্ভ কৰিছে ।"

লগতে পঢ়ক :ৰোহিত-বিৰাটৰ অৱসৰৰ বাবে সাজুনে ভাৰতীয় ক্ৰিকেট দল ? - ROHIT VIRAT RETIREMENT