নতুন দিল্লী: ক্ৰিকেটৰ খবৰ ৰখা ব্যক্তিসকলে নিশ্চয়কৈ জানে যে টীম ইণ্ডিয়াক টি-২০ বিশ্বকাপ আৰু চেম্পিয়নছ ট্ৰফীত জয়ৰ সোৱাদ দিয়া দলটোৰ অধিনায়ক ৰোহিত শৰ্মাই ইতিমধ্যে টি-২০ আন্তঃৰাষ্ট্ৰীয় আৰু টেষ্ট ক্ৰিকেটৰ পৰা অৱসৰ গ্ৰহণ কৰিছে ।
এতিয়া মাথো ৰোহিত শৰ্মাক ভাৰতৰ হৈ এদিনীয়া ফৰ্মেটত খেলা দেখা যাব । ৰোহিত শৰ্মাই সম্প্ৰতিও ভাৰতৰ হৈ বগা বলৰ ফৰ্মেটত (কেৱল এদিনীয়া) অধিনায়কৰ দায়িত্ব পালন কৰি আছে ।
কিন্তু এদিনীয়া মেচত অধিনায়ক হিচাপে ৰোহিতৰ স্থান অটুট থাকিবনে ? হিটমেনক ৰখা হ’বনে এদিনীয়া দলত ? এই সন্দৰ্ভতো অনুৰাগীৰ মনত প্ৰশ্ন উত্থাপন হৈছে ।
দৰাচলতে একাংশ সংবাদ মাধ্যমৰ বাতৰি অনুসৰি ৰোহিতে টেষ্ট ক্ৰিকেটহে বেছিকৈ খেলিব বিচাৰিছিল । ইংলেণ্ড ভ্ৰমণত অধিনায়ক হিচাপে খেলি থকাৰ মাজভাগতে অৱসৰ লোৱাৰ কথাও কৈছিল ৰোহিত শৰ্মাই ৷
অৱশ্যে নিৰ্বাচকসকলে তেওঁক এগৰাকী নিয়মীয়া খেলুৱৈ হিচাপে সমগ্ৰ শৃংখলাটোত খেলিবলৈ পৰামৰ্শ প্ৰদান কৰিছিল । ইয়াৰ পিছতে আকস্মিকভাৱে টেষ্ট ক্ৰিকেটৰ পৰা অৱসৰ গ্ৰহণ কৰিছিল ৰোহিত শৰ্মাই ।
ৰোহিতৰ পিছত কোন হ'ব ভাৰতৰ এদিনীয়া অধিনায়ক ?
ৰেডবল ক্ৰিকেটৰ প্ৰতি থকা আকৰ্ষণৰ কথা ৰোহিতে বহুবাৰ মুকলিকৈ প্ৰকাশ কৰিছে । আনকি তেওঁৰ পিতৃয়েও টেষ্ট ক্ৰিকেট ভালপায় আৰু ৰোহিতৰ অৱসৰত তেওঁ যেন হতাশ হৈ পৰিছিল ।
এক সাক্ষাৎকাৰত এই কথা কৈছিল ৰোহিতে । এনে পৰিস্থিতিত বি চি চি আই আৰু নিৰ্বাচকসকলে ৰোহিত শৰ্মাক এদিনীয়া দলৰ পৰা ওলাই অহাৰ পথ দেখুৱাব পাৰিবনে, সেয়া এই মুহূৰ্তত এক ডাঙৰ প্ৰশ্ন হৈ পৰিছে ।
খবৰ অনুসৰি, ২০২৭ চনৰ এদিনীয়া বিশ্বকাপ খেলিব বিচাৰিছে ৰোহিত শৰ্মাই । বৰ্তমান ৰোহিতৰ বয়স ৩৮ বছৰৰ ওপৰত আৰু বিশ্বকাপ ২০২৭ ৰ বাবে এতিয়াও ২ বছৰতকৈও অধিক সময় বাকী আছে ৷ তেতিয়ালৈকে ৰোহিতৰ বয়স ৪০ বছৰৰ ওপৰত হ’ব । এনে পৰিস্থিতিত বি চি চি আই আৰু নিৰ্বাচকসকলে ক্ৰিকেটাৰগৰাকীক ধৰি ৰাখিব বিচাৰিবনে ? এয়া আটাইতকৈ ডাঙৰ প্ৰশ্ন ।
এদিনীয়া দলৰ পৰা বাদ পৰিব পাৰে ৰোহিত শৰ্মা
এইটোও সম্ভৱ যে টেষ্টৰ দৰেই নিৰ্বাচকসকলেও ৰোহিত শৰ্মাক এদিনীয়াৰ পৰা বাদ দি এদিনীয়া বিশ্বকাপ ২০২৭ ৰ বাবে এটা নতুন দল গঢ়ি তোলাৰ কথা চিন্তা কৰিব পাৰে । ৰোহিতৰ পিছত ভাৰতে টেষ্টত শুভমন গিলৰ ৰূপত লাভ কৰিছে নতুন অধিনায়ক ।
টি-২০ ৰ পৰা অৱসৰ লোৱাৰ পিছত ৰোহিতৰ উত্তৰাধিকাৰী হিচাপে নিযুক্তি দিয়া হৈছে সূৰ্যকুমাৰ যাদৱক । এতিয়া মাত্ৰ বাকী আছে এদিনীয়া ফৰ্মেট ৷ গতিকে ৰোহিতক যদি অধিনায়ক পদৰ পৰা আঁতৰোৱা হয়, তেন্তে বি চি চি আই আৰু নিৰ্বাচকসকলে আন খেলুৱৈ বিচাৰিবলৈ বাধ্য হ’ব ।
চৰ্চালৈ আহিছে এইগৰাকী ক্ৰিকেটাৰৰ নাম
একাংশ সংবাদ মাধ্যমৰ খবৰ অনুসৰি ইণ্ডিয়ান প্ৰিমিয়াৰ লীগ (আই পি এল) ত নিজৰ অধিনায়কত্বৰে সকলোকে আপ্লুত কৰা শ্ৰেয়ছ আয়াৰক ভাৰতীয় ক্ৰিকেট দলৰ বগা বলৰ অধিনায়ক হিচাপে বিবেচিত কৰা হৈছে ৷ যদি বি চি চি আই আৰু নিৰ্বাচকসকলে ৰোহিত শৰ্মাক এদিনীয়া ক্ৰিকেট দলৰ অধিনায়ক পদৰ পৰা আঁতৰাই পেলায়, তেন্তে শ্ৰেয়ছ আয়াৰক অধিনায়ক হিচাপে দায়িত্ব দিব পৰা যাব ।
🚨 SHREYAS IYER AS INDIA'S WHITE BALL CAPTAIN 🚨
— Tanuj (@ImTanujSingh) June 8, 2025
- Shreyas Iyer now officially Joined India's white ball Captaincy race. (The Indian Express). pic.twitter.com/6z97rX1Ipd
২০২৩ চনৰ এদিনীয়া বিশ্বকাপত ভাৰতৰ হৈ মিডল অৰ্ডাৰত বেটিং কৰাৰ সময়ত দুটা শতক আৰু তিনিটা অৰ্ধশতকৰে ১১ খন মেচত ৫৩০ ৰাণ সংগ্ৰহ কৰিছিল আয়াৰে । এদিনীয়া বিশ্বকাপ খেলাৰ অভিজ্ঞতাও আছে ক্ৰিকেটাৰগৰাকীৰ ।
নিজৰ অধিনায়কত্বৰে আয়াৰে আই পি এল ২০২৪ ত কলকাতা নাইট ৰাইডাৰ্ছক জয়ৰ দিশত আগবঢ়াই নিছিল ৷ বিপৰীতে আই পি এল ২০২৫ ত ফাইনেল খেলি ৬ ৰাণত পৰাস্ত হয় । ইয়াৰ সমান্তৰালকৈ তেওঁ দিল্লী কেপিটেলছকো আই পি এলৰ ফাইনেলত উপনীত কৰোৱাইছিল ৷
ONE OF INDIAN CRICKET'S INFLUENTIAL DECISION MAKERS SAID:
— Tanuj (@ImTanujSingh) June 8, 2025
- " right now shreyas iyer just plays odis, but after this ipl we can't keep him out of t20i international and even india's test team. plus, he also now officially joined the white ball captaincy race". (indian express). pic.twitter.com/S3SxYEs7dj
ভৱিষ্যতে এজন সফল অধিনায়ক হোৱাৰ সকলো লক্ষণ আছে আয়াৰৰ । এনে পৰিস্থিতিত বি চি চি আই আৰু নিৰ্বাচকসকলে ভৱিষ্যতে অধিনায়কৰ পদৰ বাবে আয়াৰৰ নাম বিবেচনা কৰাৰ সম্ভাৱনা আছে ৷
লগতে পঢ়ক: বেংগালুৰুৰ পদপিষ্টৰ ঘটনা: বিৰাট কোহলীৰ বিৰুদ্ধে এজাহাৰ
