স্পৰ্টছ ডেস্ক, 10 আগষ্ট : পেৰিছ অলিম্পিক 2024ত বিতৰ্কৰ মাজতে আলজেৰিয়াৰ ইমান খলিফে স্বৰ্ণ পদক লাভ কৰিছে ৷ ইমানে 2024 চনৰ পেৰিছ গেমছত চীনৰ বক্সাৰ বিশ্ব চেম্পিয়ন ইয়াং লিউক 66 কেজি শাখাত 5-0 ব্যৱধানত পৰাস্ত কৰি অলিম্পিক মহিলা বক্সিঙৰ স্বৰ্ণ পদক লাভ কৰে ৷ স্বৰ্ণ জয় কৰাৰ পিচত ইমানে কান্দিছিল, তাৰ পিচত তেওঁৰ সহায়কাৰী কৰ্মচাৰীয়ে খলিফক কান্ধত তুলি লয় ৷
Imane Khelif crying after getting her gold medal 🥹 She deserves it so much pic.twitter.com/K62irrJRsb
— Women Posting W's (@womenpostingws) August 10, 2024
ইমান খলিফৰ বৰ্তমান বয়স 25 বছৰ ৷ বিগত 8 বছৰ ধৰি তেওঁ অলিম্পিক পদকৰ বাবে অক্লান্তভাৱে সংঘৰ্ষ কৰি আছিল ৷ এই সময়ছোৱাত তেওঁ বহু কঠিন পৰিস্থিতিৰ সন্মুখীন হ’বলগীয়া হৈছিল ৷ চূড়ান্ত খেলখনৰ পিচত প্ৰতিক্ৰিয়া প্ৰকাশ কৰি মহিলা বক্সাৰগৰাকীয়ে কয় যে, ‘যোৱা 8 বছৰে এইটো মোৰ সপোন আছিল আৰু এতিয়া মই এগৰাকী অলিম্পিক চেম্পিয়ন আৰু স্বৰ্ণ বিজয়ী ৷ মোৰ সফলতাই মোক আৰু অধিক শান্তি দিছে ৷'
শেহতীয়াকৈ তেওঁৰ লিংগ সন্দৰ্ভত হোৱা বিতৰ্ক সন্দৰ্ভত বক্সাৰগৰাকীয়ে কয়, ‘আমি অলিম্পিকত খেলুৱৈ হিচাপে প্ৰদৰ্শন কৰিবলৈ আহিছো আৰু মই আশা কৰিছো যে ভৱিষ্যতে অলিম্পিকত এনে বিতৰ্ক আমি দেখা নাপাম ৷'
পেৰিছ অলিম্পিকলৈ যাত্ৰা কঠিন আছিল :
ইমান খলিফৰ বাবে পেৰিছ অলিম্পিকৰ যাত্ৰা অতি কঠিন আছিল ৷ সমগ্ৰ অলিম্পিকৰ সময়ছোৱাত তেওঁক পুৰুষৰ দৰে হোৱাৰ বাবে বহুত ট্ৰ’ল কৰা হৈছিল ৷ তেওঁৰ বিৰোধিতা হৈছিল, আনকি তেওঁক অযোগ্য ঘোষণাৰ দাবীও উত্থাপন হৈছিল ৷ এই সকলোবোৰ বিৰোধৰ সন্মুখীন হৈ খলিফে নিজৰ মেচবোৰত মনোনিৱেশ কৰি থাকিল ৷ অৱশ্যে ফাইনেলত তেওঁ যথেষ্ট সমৰ্থন লাভ কৰিছিল ৷ চূড়ান্ত খেলখনৰ সময়ত বহু অনুৰাগীয়ে তেওঁৰ নামত শ্লোগান দি চিঞৰিছিল ৷ বিজয়ৰ পিচত খলিফে সকলোকে সহায়ৰ বাবে ধন্যবাদ জ্ঞাপন কৰে ৷ এই সময়ছোৱাত তেওঁক যথেষ্ট আৱেগিক যেন লাগিছিল ৷
লগতে পঢ়ক : পেৰিছ অলিম্পিকৰ সামৰণি অনুষ্ঠানত মনু ভাকৰ-শ্ৰীজেশ হ'ব ভাৰতৰ ধ্বজাবাহক - Paris Olympics 2024
খলিফে ইতিহাস সৃষ্টি কৰিলে :
ইমানে সকলো বিচাৰকৰ সৰ্বসন্মতিক্ৰমে বক্সিং ফাইনেলত জয়ী হৈ ইতিহাসৰ সৃষ্টি কৰিছে ৷ কাৰণ তেওঁ আফ্ৰিকা আৰু আৰব বিশ্বৰ পৰা বক্সিংত অলিম্পিকৰ স্বৰ্ণ পদক লাভ কৰা প্ৰথমগৰাকী মহিলা হিচাপে পৰিগণিত হৈছে ৷ খলিফে আৰম্ভণিতে আগ্ৰাসী মনোভাৱেৰে প্ৰতিদ্বন্দ্বিক নিয়ন্ত্ৰণ কৰি প্ৰথম দুটা ৰাউণ্ডত অগ্ৰগতি লাভ কৰে ৷
সকলো বিচাৰকে খলিফৰ সপক্ষে ৰায় দিলে :
খেলখন আগবাঢ়ি যোৱাৰ লগে লগে চীনৰ বক্সাৰ ইয়াঙে স্ক’ৰৰ পাৰ্থক্য হ্ৰাস কৰাৰ চেষ্টা কৰে ৷ ইয়াৰ লগতে তেওঁ নিজৰ আক্ৰমণাত্মকতা বৃদ্ধি কৰিবলৈ চেষ্টা কৰিছিল যদিও খলিফৰ উচ্চমানৰ কৌশল আৰু দৃঢ়তাক অতিক্ৰম কৰাটো তেওঁৰ বাবে অতি কঠিন বুলি প্ৰমাণিত হৈছিল ৷ অন্তিম ৰাউণ্ডত খলিফে পুনৰবাৰ দৰ্শনীয় ঘোচা মাৰি পাঁচোজন বিচাৰকৰ স্ক’ৰ কাৰ্ডত প্ৰতিটো ৰাউণ্ডতে জয়লাভ কৰে ৷
খলিফৰ বাবে এই অলিম্পিক বিজয় কেৱল ব্যক্তিগত জয় নহয়, প্ৰতীকী জয়ো আছিল ৷ লিংগ যোগ্যতাৰ বিতৰ্কৰ বাবে এবছৰ পূৰ্বে বিশ্ব চেম্পিয়নশ্বিপৰ পৰা অযোগ্য ঘোষণা কৰা হৈছিল বক্সাৰগৰাকীক ৷ এবাৰ ইটালীৰ খেলুৱৈগৰাকীৰ বিৰুদ্ধে খেলৰ সময়ত তেওঁ বিতৰ্কৰ সন্মুখীন হৈছিল আৰু ছ’চিয়েল মিডিয়াত তেওঁৰ বিৰুদ্ধে গালি-গালাজ কৰা হৈছিল ৷ ইটালীৰ খেলুৱৈগৰাকীয়ে মাত্ৰ এটা বা দুটা ঘোচা মাৰিয়ে মেচখনৰ পৰা আঁতৰি যায় আৰু আঁতৰি যোৱাৰ পিচত ইমান খলিফক বিজয়ী ঘোষণা কৰা হয় ৷
লগতে পঢ়ক : কুস্তিত ব্ৰঞ্জ অৰ্জনেৰে অলিম্পিক পদক বিজয়ী সৰ্বকনিষ্ঠ ভাৰতীয়ত পৰিণত অমন চেহৰাৱত - Paris Olympics 2024
