চেন্নাই চুপাৰ কিংছৰ বিৰুদ্ধে আজীৱন নিষেধাজ্ঞা আৰোপৰ দাবী

চেন্নাই: দেওবাৰে মুম্বাই ইণ্ডিয়ানছক ৪ উইকেটত পৰাস্ত কৰি আই পি এল ২০২৫ ৰ অভিযান আৰম্ভ কৰে চেন্নাই ছুপাৰ কিংছে । বেট আৰু বল দুয়োটা দিশতে দলটোৱে উন্নত প্ৰদৰ্শন দাঙি ধৰে ৷

মেচখনত ৰাচিন ৰবীন্দ্ৰ আৰু ৰুতুৰাজ গাইকোৱাড়ে অৰ্ধশতক অৰ্জন কৰাৰ বিপৰীতে নুৰ আহমেদ আৰু খলিল আহমেদৰ যুটীয়ে বলিং ধুমুহা প্ৰদৰ্শন কৰে ৷

স্পিনাৰৰ বাবে অনুকূল পৰিস্থিতিৰ সুযোগ লৈ নুৰ আহমেদে ৪ টা উইকেট আৰু বাওঁহতীয়া ফাষ্ট বলাৰ খলিল আহমেদে ৩ টা উইকেট দখল কৰি সংবাদ শিৰোনাম দখল কৰে ।

ৰুতুৰাজ আৰু খলিলৰ বিৰুদ্ধে বল টেম্পাৰিঙৰ অভিযোগ

এই মেচখনত খলিলে বলিং কৰাৰ কথাটোৱে ছ’চিয়েল মিডিয়াত ব্যাপক সমালোচনাৰ সন্মুখীন হৈছে ৷ কাৰণ অনুৰাগীয়ে তেওঁক ৰুতুৰাজ গাইকোৱাড়ৰ সৈতে হোৱা এটা বাৰ্তালাপৰ ভিডিঅ’ প্ৰত্যক্ষ কৰাৰ পিছত বল টেম্পাৰিঙৰ অভিযোগ উত্থাপন কৰিছিল ।

ইণ্টাৰনেটত ভাইৰেল হোৱা এটা ক্লিপত খলিলে আনখন হাতত বল লৈ পকেটৰ পৰা কিবা এটা উলিয়াই লোৱা দেখা গৈছে । এনে লাগে যেন তেতিয়া তেওঁ বস্তুটো কেপ্তেইন ৰুতুৰাজৰ হাতত তুলি দিছে । ঘটনাৰ ভিডিঅ’ প্ৰত্যক্ষ কৰাৰ পিছত অনুৰাগীয়ে দুয়োৰে বিৰুদ্ধে বল টেম্পাৰিঙৰ অভিযোগ উত্থাপন কৰে ।

কেভিন নামৰ এজন সামাজিক মাধ্যম ব্যৱহাৰকাৰীয়ে পুনৰবাৰ ফ্ৰেঞ্চাইজিটোক আই পি এলত নিষেধাজ্ঞা আৰোপ কৰাৰ দাবী জনায় ৷ লগতে সকলোকে সোঁৱৰাই কয় যে, ২০১৬ আৰু ২০১৭ চনত দলটোৰ স্বত্বাধিকাৰীৰ ওপৰত নীতি-বহিৰ্ভূত কামত জড়িত থকাৰ বাবে দুবছৰৰ নিষেধাজ্ঞা আৰোপ কৰা হৈছিল ।

আন এজন ‘এক্স’ ব্যৱহাৰকাৰী জ’নাছ কানৱাল্ডে বি চি চি আইক এই বিষয়টোৰ তদন্ত কৰিবলৈ কয় ।

মেচখনত এম আইয়ে প্ৰথমে বেটিং কৰি মুঠ ১৫৫/৯ ৰাণ সংগ্ৰহ কৰে, য’ত খলিল আহমেদ আৰু নূৰ আহমেদৰ বলিং যুটীয়ে চি এছ কেৰ হৈ ক্ৰমে ৩ আৰু ৪ টাকৈ উইকেট দখল কৰে । শেষৰ অভাৰত ৰাচিন ৰবীন্দ্ৰই অৰ্ধশতক অৰ্জন কৰি দলটোক জয়ী কৰোৱাত গুৰুত্বপূৰ্ণ ভূমিকা পালন কৰিছিল । মুম্বাই ইণ্ডিয়ানছৰ যুৱ স্পিনাৰ বিগনেশ পুথুৰে মেচখনত ৩ টা উইকেট দখল কৰি আন এক কৃতিত্ব গঢ়ে ৷

লগতে পঢ়ক: আই পি এল ২০২৫ ৰ পৰা বাহিৰ লক্ষ্ণৌ চুপাৰ জায়েণ্টছৰ পেচাৰ মহছিন খান - IPL 2025