সংবাদ শিৰোনামত ভাৰতৰ এগৰাকী তাৰকা ক্ৰিকেটাৰ ! ভাইৰেল হৈ পৰিছে এক বিশেষ ভিডিঅ'

নতুন দিল্লী : ৪৪ বছৰীয়া হ'ল এগৰাকী ভাৰতীয় ক্ৰিকেটাৰ । এইগৰাকী ক্ৰিকেটাৰে বীৰদৰ্পে ইনিংছ খেলি ভাৰতক কেইবাবাৰো নিশ্চিত পৰাজয়ৰ পৰা ৰক্ষা কৰাই নহয়,বিশ্ব চেম্পিয়নৰ খিতাপো আজুৰি আনিছে । 'কেপ্টেইন কুল' নামেৰে পৰিচিত অধিনায়কগৰাকীৰ নেতৃত্বতেই ভাৰতে দখল কৰিছিল প্ৰথম টি ২০ বিশ্বকাপৰ খিতাপ ।

উইকেটৰ পিচফালে অতন্দ্ৰ প্ৰহৰীৰ দৰে থিয় দি এসময়ত প্ৰতিপক্ষৰ ত্ৰাসৰ কাৰণ হোৱা এইগৰাকী উইকেটকীপাৰ বেটছমেনে আজি উদযাপন কৰিলে ৪৪ সংখ্যক জন্মদিন । প্ৰাক্তন অধিনায়কগৰাকীৰ জন্মদিনৰ কেক কাটি থকা এটা ভিডিঅ’ সামাজিক মাধ্য়মত ভাইৰেল হৈ পৰিছে । তেওঁৰ অনুৰাগীসকলে এই ভিডিঅ’টো দেখাৰ পিচতেই আনন্দ প্ৰকাশ কৰিছে । ৪৪ সংখ্যক জন্মদিন উদযাপন কৰা এইগৰাকী জনপ্ৰিয় ক্ৰিকেটাৰ হৈছে এম এছ ধোনী ।

ধোনীৰ ৪৪ সংখ্যক জন্মদিন :

সোমবাৰে (৭ জুলাই) গৃহ চহৰ ৰাঁচীত ঘনিষ্ঠ বন্ধু-বান্ধৱী আৰু পৰিয়ালৰ লোকৰ সৈতে ধোনীয়ে ৪৪ সংখ্যক জন্মদিন উদযাপন কৰে । ইয়াৰ মাজতে ধোনীৰ কেক কটা অনুষ্ঠানটোৰ এটা ভিডিঅ’ সামাজিক মাধ্য়মত দ্ৰুতগতিত ভাইৰেল হৈ পৰিছে । এই ভিডিঅ'টোত ধোনীয়ে ক'লা স্লীভলেছ টি-ছাৰ্ট পৰিধান কৰা দেখা গৈছে ।

ভিডিঅ’টোত ধোনীয়ে বন্ধু-বান্ধৱীৰ সৈতে কেক কাটি খুৱাই থকা দেখা গৈছে । কেক কাটোতেই এজন ব্যক্তিয়ে ভিডিঅ’ বনাই এই ব্যক্তিগত মুহূৰ্তবোৰ কেমেৰাত বন্দী কৰি সেইবোৰ সামাজিক মাধ্য়মত পোষ্ট কৰিছে । অতি কম সময়ৰ ভিতৰতে ভাইৰেল হৈ পৰিছে এই ভিডিঅ'টো ।

ঝাৰখণ্ডৰ পৰা ভাৰতীয় ক্ৰিকেটত যাত্ৰা আৰম্ভ কৰা ধোনী পাৱাৰ হিটাৰ হিচাপে পৰিচিত । ধোনীয়ে এগৰাকী ভাল ফিনিশ্বাৰ উইকেটকীপাৰ-বেটছমেন হিচাপে আন্তঃৰাষ্ট্ৰীয় ক্ৰিকেটত যথেষ্ট সফলতা অৰ্জন কৰিছে । তেওঁ ২০০৪ চনত এদিনীয়া ক্ৰিকেটত ভাৰতৰ হৈ অভিষেক ঘটায় । ইয়াৰ পিছত তেওঁ ২০০৫ চনত টেষ্টত অভিষেকৰ সুযোগ লাভ কৰে । ২০০৬ চনত টি-২০ত টিম ইণ্ডিয়াৰ হৈ অভিষেক ঘটাৰ পিছত তেওঁৰ নেতৃত্বতেই ভাৰতে ২০০৭ চনত টি-২০ বিশ্বকাপৰ খিতাপ দখল কৰিবলৈ সক্ষম হয় ।

ভাৰতক বিশ্ব চেম্পিয়ন কৰোৱালে ধোনীয়ে :

২০০৭ চনত ভাৰতীয় ক্ৰিকেট দলৰ অধিনায়ক হিচাপে নিযুক্তি লাভ কৰা ধোনীয়ে ২০০৭ চনৰ টি-২০ বিশ্বকাপ, ২০১১ চনৰ এদিনীয়া বিশ্বকাপ আৰু ২০১৩ৰ চেম্পিয়নছ ট্ৰফী খিতাপ দখল কৰিবলৈ সক্ষম হয় । তেওঁৰ অধিনায়কত্বতে টিম ইণ্ডিয়াই আই চি চিৰ ৰেংকিঙত শীৰ্ষ স্থানো দখল কৰিছিল।

কেনে আছিল ধোনীৰ কেৰিয়াৰ ?

ধোনীয়ে ৯০খন টেষ্ট মেচত ৬টা শতক আৰু ৩৩টা অৰ্ধশতকৰে ৩৮.০৯ গড়ে ৪,৮৭৬ ৰাণ সংগ্ৰহ কৰিছে । ৩৫০খন এদিনীয়া খেলত ১০টা শতক আৰু ৭৩টা অৰ্ধশতকৰে ১০,৭৭৩ ৰাণ সংগ্ৰহ কৰিছে । এই সংস্কৰণটোত তেওঁ গড়ে ৫০.৫৮ ৰাণ সংগ্ৰহ কৰিছে । আনহাতে ৯৮ খন টি-২০ মেচত ২ টা অৰ্ধশতকসহ ধোনীয়ে সংগ্ৰহ কৰিছে ১৬১৭ ৰাণ ।