ষ্টোকছৰ কঁকালৰ বিষ, ঋষভে দুখ পালে আঙুলিত: দ্বিতীয় দিনৰ খেলত দেখা যাবনে দুয়োকে ?

নতুন দিল্লী : লৰ্ডছত চলি থকা ভাৰত-ইংলেণ্ড টেষ্ট শৃংখলাৰ তৃতীয় টেষ্টত দুয়োটা দলৰ বাবেই দুঃখবৰ । মেচৰ প্ৰথমদিনা দুগৰাকীকৈ গুৰুত্বপূৰ্ণ খেলুৱৈৰ আঘাতে দুয়োটা দলকে মোক্ষম আঘাত দিয়ে । প্ৰথমে ভাৰতীয় উইকেটৰক্ষক-বেটছমেন ঋষভ পণ্ট আঘাতপ্ৰাপ্ত হয় । ইয়াৰ পিছত ইংলেণ্ডৰ অধিনায়ক বেন ষ্টোকছো আঘাতপ্ৰাপ্ত হয় । অৱশ্যে দুয়োটা দলেই আশা কৰিব যে খেলুৱৈ দুজনৰ আঘাত গুৰুতৰ নহওক আৰু দ্বিতীয়দিনা খেলপথাৰলৈ উভতি আহক ।

বেন ষ্টোকছৰ আঘাত সন্দৰ্ভত শেহতীয়া তথ্য

প্ৰথমদিনা বেটিং কৰাৰ সময়ত ষ্টোকছক কঁকালৰ বিষত ভোগা পৰিলক্ষিত হয় । কঁকালত লগা আঘাতৰ বাবে বেটিঙত সমস্যাৰ সৃষ্টি হোৱা ষ্টোকছক খেলপথাৰতে চিকিৎসা সাহায্য গ্ৰহণ কৰা পৰিলক্ষিত হয় । আনহাতে, পূৰ্বৰ অধিনায়ক জো ৰুটৰ সৈতে ক্ৰিজত থকাৰ সময়ত তেওঁক যথেষ্ট কষ্টত থকা যেন অনুমান হৈছিল ।

দিনটোৰ খেল শেষ হোৱাৰ সময়ত ষ্টোকছ ৩৯ ৰাণত আৰু ৰুট ৯৯ ৰাণত অপৰাজিত হৈ আছে । আনহাতে, ইংলেণ্ডৰ স্ক'ৰ হৈছে ৪ উইকেটত ২৫১ ৰাণ । ইয়াৰ উপৰি তেওঁৰ সংগী অলি পোপে আশা ব্যক্ত কৰিছে যে তেওঁলোকৰ অধিনায়কৰ আঘাত গুৰুতৰ নহওক আৰু শুকুৰবাৰে পুনৰ খেল আৰম্ভ হোৱাৰ সময়ত তেওঁ ক্ৰিজলৈ আহক । ষ্টোকছ সন্দৰ্ভত পোপে কয়, "আশা কৰিছোঁ তেওঁ কোনো যাদুৰ বিনিময়ত শক্তিশালীভাৱে উভতি আহিব ।"

তেওঁ লগতে কয়, "মই তেওঁক তেতিয়াৰ পৰা দেখা পোৱা নাই আৰু আশা কৰিছোঁ যে আঘাত বিশেষ গুৰুতৰ নহয় । কিন্তু নিশ্চিতভাৱে আগন্তুক চাৰিটা দিনত আমি এক ডাঙৰ টেষ্ট মেচ খেলিব লাগিব আৰু দুখন ডাঙৰ মেচ (অ'ল্ড ট্ৰেফ'ৰ্ড আৰু অভেল) অনুষ্ঠিত হ'বলগীয়া আছে । সেয়ে ইয়াক চম্ভালিবলৈ চেষ্টা কৰাটো প্ৰয়োজনীয় ।"

ঋষভ পণ্টৰ আঘাত সম্পৰ্কীয় তথ্য

ইফালে ভাৰতীয় শিবিৰতো আঘাতে জোকাৰিছে । কিয়নো যশপ্ৰীত বুমৰাহৰ লেগ ছাইডৰ এটা বল ৰখাবলৈ যাওঁতে পণ্টে আঙুলিত আঘাত পায় । যাৰ ফলত তেওঁ প্ৰথম দিনৰ খেলৰ মাজতে খেলপথাৰ ত্যাগ কৰিবলগা হয় । অৱশ্যে প্ৰথমাৱস্থাত এই ঘটনা সাধাৰণ যেন লাগিছিল যদিও পণ্টে চিকিৎসা গ্ৰহণৰ পিছত খেলপথাৰৰ পৰা বাহিৰলৈ যায় আৰু তেওঁৰ স্থানত পৰিৱৰ্ত খেলুৱৈ হিচাপে ধ্ৰুৱ জুৰেলে দিনটোৰ বাকী সময়ৰ বাবে ষ্টাম্পৰ পিছত কৰ্তব্য পালন কৰে ।

ইয়াৰ পিছত ভাৰতে নিজৰ ছ'চিয়েল মিডিয়া হেণ্ডেলৰ জৰিয়তে আঘাতৰ কথা উল্লেখ কৰে যদিও আঘাতৰ গম্ভীৰতা সন্দৰ্ভত কোনো তথ্য প্ৰকাশ কৰা নাই । প্ৰথমদিনা খেলৰ সমাপ্তিৰ পিছত সংবাদমেলত নীতিশ কুমাৰ ৰেড্ডীৰ পৰা অধিক তথ্য বিচৰাত তেওঁ কয় যে শুকুৰবাৰে পুৱা এই সন্দৰ্ভত অধিক তথ্য প্ৰদান কৰা হ'ব ।

ৰেড্ডীয়ে কয়, "সঁচাকৈ ক'বলৈ হ'লে মই এইমাত্ৰ খেলপথাৰৰ পৰা আহিছোঁ আৰু এই সম্পৰ্কে মই একো নাজানো । মই এতিয়ালৈকে একো শুনা নাই, কিন্তু কাইলৈ পুৱা আমি পুনৰ উভতি অহাৰ সময়ত অধিক তথ্য লাভ কৰিম ।"