১২ বছৰৰ পিছত ভাৰতে দখল কৰিলে চেম্পিয়নছ ট্ৰফী

ডুবাই: আই চি চি চেম্পিয়নছ ট্ৰফী ২০২৫ৰ বিজয় মুকুট পিন্ধিলে ৰোহিত বাহিনীয়ে । ফাইনেলত দেওবাৰে নিশা নিউজীলেণ্ডক ৪ উইকেটত পৰাজিত কৰি ভাৰতে খিতাপ দখল কৰিবলৈ সক্ষম হয় । ডুবাই ষ্টেডিয়ামত অনুষ্ঠিত এই খেলখনত ভাৰতীয় অধিনায়ক ৰোহিত শৰ্মাই একেৰাহে দ্বাদশ এদিনীয়া খেলত টছত পৰাজিত হৈ অভিলেখ গঢ়িলেও একেটা বৰ্ষতেই দখল কৰিলে আই চি চিৰ দ্বিতীয়টো খিতাপ । কিৱি বাহিনীয়ে ৫০ অভাৰত বান্ধি দিয়া ২৫২ ৰাণৰ লক্ষ্য় ভাৰতে ৪৯ অভাৰতেই সংগ্ৰহ কৰিবলৈ সক্ষম হয় ।

ডুবাইৰ শ্ল' পিটছত নিউজীলেণ্ডৰ অধিনায়ক মিচেল চেণ্টনাৰে টছত জয়ী হৈ প্ৰথমে বেটিং কৰাৰ সিদ্ধান্ত গ্ৰহণ কৰে । ভাৰতীয় দলটোৰ বলিং আক্ৰমণত তিষ্ঠিব নোৱাৰি ২৫২ ৰাণতেই ইনিংছ সামৰে । নিউজীলেণ্ডে প্ৰথম ৬ অভাৰত ৪৬ ৰাণ সংগ্ৰহ কৰিবলৈ সক্ষম হয় ।

ক্ৰিজত অপেনাৰ ৰাচিন ৰবীন্দ্ৰনে পুনৰ আক্ৰমণাত্মক ৰূপ লয় যদিও দলটোৱে ভাৰতীয় স্পীন বলিঙৰ সন্মুখত তিষ্ঠিবই নোৱাৰিলে । ভাৰতৰ হৈ বৰুণ চক্ৰৱৰ্তী আৰু কুলদীপ যাদৱে দুটাকৈ উইকেট দখল কৰে । জাডেজাই লাভ কৰে এটা উইকেট ।

ভাৰতে ইনিংছ আৰম্ভ কৰিয়েই কিৱিৰ বলাৰৰ বিৰুদ্ধে আক্ৰমণাত্মক ৰূপ লয় । প্ৰথমটো অভাৰতেই ভাৰতীয় অপেনাৰ তথা অধিনায়ক ৰোহিত শৰ্মাই ছয় কোবায় আৰম্ভ কৰে ভাৰতৰ বিজয় ৰথৰ গতি ।

ভাৰতে প্ৰথম উইকেটক যুটীত সংগ্ৰহ কৰে ১০৫ ৰাণ । গীল ৩১ ৰাণত আউট হ'লেও ৰোহিত শৰ্মাই ৮৩টা বলত সংগ্ৰহ কৰে ৭৬ ৰাণ । বিৰাট কোহলি ১ ৰাণত আউট হোৱাৰ পিচত শ্ৰেয়াস আয়াৰে ৬২ টা বলত সংগ্ৰহ কৰে ৪৮ ৰাণ ।

উইকেটকীপাৰ বেটাৰ কে এল ৰাহুলে অপৰাজিত ৩৪ ৰাণ সংগ্ৰহ কৰিবলৈ সক্ষম হয় । ইনিংছৰ শেষৰ ফালে হাৰ্ডিক পাণ্ডিয়াই এটা চাৰি আৰু সমসংখ্য়ক ছয় কোবাই ভাৰতৰ বিজয়ৰ পথ প্ৰশস্ত কৰি তোলে । ৰবীন্দ্ৰ জাডেজাই অপৰাজিত ৯ ৰাণ সংগ্ৰহ কৰে ।

চূড়ান্ত মেচত নিউজিলেণ্ডে টছত জয়ী হৈ বেটিং কৰাৰ সিদ্ধান্ত লয় । অপেনাৰ উইল ইয়ং আৰু ৰাচিন ৰবীন্দ্ৰই প্ৰথম উইকেটৰ বাবে ৫৭ ৰাণ সংগ্ৰহ কৰা সময়তেই উইল ইয়ংক স্পীনাৰ বৰুণ চক্ৰৱৰ্তীয়ে ১৫ ৰাণত আউট কৰে । বৰুণ চক্ৰৱৰ্তী, ৰবীন্দ্ৰ জাদেজা, কুলদীপ যাদৱ আৰু অক্ষৰ পেটেলে সুন্দৰ বলিং কৰাৰ ফলত কম সময়ৰ ভিতৰতে ৫৭/১ ৰ পৰা দলীয় স্ক'ৰ ১০৮/৪ হয় ।

ইয়াৰ পিছত ডেৰিল মিচেল আৰু গ্লেন ফিলিপছে (৩৪) পঞ্চম উইকেটত ৫৭ ৰাণ যোগ কৰে । মিচেলে ৬৩ ৰাণৰ সংগ্ৰহ কৰি আউট হয় । মাইকেল ব্ৰেছৱেলে অন্তিম অভাৰত দ্ৰুত অৰ্ধশতক অৰ্জন কৰি নিউজিলেণ্ডক মুঠ ২৫১/৭ ৰাণ কৰাত সহায় কৰে । তেওঁৰ অৰ্ধশতকে নিউজিলেণ্ডৰ দলটোক ডুবাই আন্তঃৰাষ্ট্ৰীয় ষ্টেডিয়ামত ২৫০ ৰাণৰ সীমা অতিক্ৰম কৰাত সহায় কৰে ।

উল্লেখ্য় যে ভাৰতৰ এয়া তৃতীয় চেম্পিয়নছ ট্ৰফী খিতাপ দখল । ইয়াৰ পূৰ্বে 2002 চনত শ্ৰীলংকাৰ সৈতে যুটীয়াভাৱে আৰু 2013 চনত বিজয়ী হৈছিল । এই বিজয়ৰ পিছতেই ভাৰতীয় দলটোক প্ৰধানমন্ত্ৰী নৰেন্দ্ৰ মোদী, কেন্দ্ৰীয় মন্ত্ৰী সৰ্বনন্দ সোণোৱালে X'ত শুভেচ্ছা জ্ঞাপন কৰে ।