নতুন দিল্লী : অহা ২০ জুনৰ পৰা ইংলেণ্ডৰ সৈতে পাঁচখন খেলৰ টেষ্ট শৃংখলা খেলিবলৈ ওলাইছে ভাৰতীয় ক্ৰিকেট দলটোৱে । এই শৃংখলা আৰম্ভ হোৱাৰ পূৰ্বে সকলো ক্ৰিকেট অনুৰাগীৰ মনত প্ৰশ্নটো হ’ব যে ৰোহিত শৰ্মাই টেষ্ট ক্ৰিকেটৰ পৰা অৱসৰ লোৱাৰ পিছত এতিয়া কোনে ভাৰতৰ হৈ ইনিংছ মুকলি কৰিব ?
ৰোহিতৰ ঠাইত ভাৰতীয় দলৰ হৈ মুকলি হ’বলৈ ৩ জন মূল প্ৰতিদ্বন্দ্বী ওলাইছে যদিও এই তিনিজন খেলুৱৈৰ এজনৰ নাম প্ৰায় নিশ্চিত যেন লাগিছে । গতিকে আজি আমি আপোনালোকক ক'ম যশস্বী জয়ছৱালৰ সৈতে ইনিংছ আৰম্ভ কৰা দ্বিতীয় অ'পেনাৰৰ বিষয়ে ।
১) কে এল ৰাহুল : ইংলেণ্ডৰ বিৰুদ্ধে টেষ্ট শৃংখলাত ৰোহিত শৰ্মাৰ ঠাইত যশস্বীৰ সৈতে ভাৰতৰ অভিজ্ঞ সোঁহাতৰ বেটছমেন কে এল ৰাহুলে ইনিংছ মুকলি কৰিব পাৰে । বৰ্তমান ইংলেণ্ড লায়ন্সৰ বিৰুদ্ধে ইণ্ডিয়া এৰ হৈ ইনিংছ মুকলি কৰি আছে ৰাহুলে । এনে পৰিস্থিতিত অষ্ট্ৰেলিয়াৰ বিৰুদ্ধে বৰ্ডাৰ গাভাস্কাৰ ট্ৰফীত ৰোহিতৰ ঠাইত ইনিংছ খুলিবলৈও তেওঁ নিৰ্বাচিত হোৱাটো সম্ভৱ ।
ভাৰতৰ হৈ অ’পেনাৰ হিচাপে ৫৩খন মেচত ২৮০৩ ৰাণ সংগ্ৰহ কৰিছে ৰাহুলে । এই সময়ছোৱাত তেওঁ ৭টা শতক আৰু ১৪টা অৰ্ধশতক অৰ্জন কৰিছে । মুঠতে ৫৮খন টেষ্ট মেচৰ ১০১ ইনিংছত ৮টা শতক আৰু ১৭টা অৰ্ধশতকৰে ৩২৫৭ ৰাণ সংগ্ৰহ কৰিছে ।
২) শুভমন গিল : ভাৰতীয় ক্ৰিকেট দলৰ অধিনায়ক শুভমন গিলো ৰোহিত শৰ্মাৰ ঠাইত ইনিংছ মুকলি কৰাৰ শক্তিশালী প্ৰতিদ্বন্দ্বী । গিলে টীম ইণ্ডিয়াৰ হৈ টেষ্ট কেৰিয়াৰ আৰম্ভ কৰিছিল অ’পেনাৰ হিচাপে ।
যেতিয়া পূজাৰক দলৰ পৰা বাদ দিয়া হৈছিল, তেতিয়া গিলে তেওঁৰ ঠাইত ৩ নম্বৰত খেলিছিল । এতিয়া গিলে ৰোহিতৰ ঠাইত যশস্বী জয়ছৱালৰ সৈতে পুনৰবাৰ টীম ইণ্ডিয়াৰ হৈ ইনিংছ মুকলি কৰাৰ সুযোগ পাব ।
ভাৰতৰ হৈ অ’পেনাৰ হিচাপে ১৭খন মেচত ৮৭৪ ৰাণ সংগ্ৰহ কৰিছে গিলে । এই সময়ছোৱাত তেওঁ ২টা শতক আৰু ৪টা অৰ্ধশতক অৰ্জন কৰিছে । সামগ্ৰিকভাৱে ভাৰতৰ হৈ ২৩খন টেষ্ট মেচৰ ৫৯ ইনিংছত ৫টা শতক আৰু ৭টা অৰ্ধশতকৰে ১৮৯৩ ৰাণ সংগ্ৰহ কৰিছে ।
৩) অভিমন্যু ঈশ্বৰন : ৰোহিত শৰ্মাৰ ঠাইত যশস্বী জয়ছৱালৰ সৈতে ইনিংছ মুকলি কৰিব পৰাকৈ সোঁহাতীয়া অভিমন্যু ঈশ্বৰনো বিকল্প হ’ব । ভাৰতৰ হৈ এতিয়াও টেষ্টত অভিষেক ঘটাব পৰা নাই ঈশ্বৰনে ।
অষ্ট্ৰেলিয়াত খেলা বৰ্ডাৰ গাভাস্কাৰ ট্ৰফীৰ অংশ আছিল যদিও প্লেয়িং-১১ত খেলাৰ সুযোগ নাপালে । ঈশ্বৰনে অ’পেনাৰ হিচাপে প্ৰথম শ্ৰেণীৰ ক্ৰিকেট খেলে । ইংলেণ্ড লায়ন্সৰ সৈতে খেলি থকা মেচসমূহতো তেওঁ ইণ্ডিয়া এৰ অধিনায়ক হিচাপে আছে । ৰাহুলৰ আগত তেওঁ যশস্বীৰ সৈতে ইনিংছ মুকলি কৰে ।
প্ৰথম শ্ৰেণীৰ ক্ৰিকেটত ১০২খন খেলৰ ১৭৫খন ইনিংছত ৭৭৫০ ৰাণ আৰু তালিকা এক ক্ৰিকেটত ৮৯খন খেলৰ ৮৭খন ইনিংছত ৩৮৫৭ ৰাণ সংগ্ৰহ কৰিবলৈ সক্ষম হৈছে অভিমন্যু ঈশ্বৰনে ।
