ইতিহাস ৰচি বিশ্ব দবা চেম্পিয়নশ্বিপৰ নতুন সম্ৰাট ডি গুকেশ

স্প’ৰ্টছ ডেস্ক: দবা জগতৰ বাবে এক সুখবৰ ৷ বৃহস্পতিবাৰে বিশ্ব দবা চেম্পিয়নশ্বিপৰ (ডব্লিউ চি চি) 14 নং খেলখনত চীনৰ ডিং লিৰেনক পৰাস্ত কৰি ভাৰতৰ গ্ৰেণ্ডমাষ্টাৰ ডোমৰাজু গুকেশে সৰ্বকনিষ্ঠ বিশ্ব দবা চেম্পিয়নৰ খিতাপ অৰ্জন কৰে ৷

মাত্ৰ 18 বছৰ বয়সতে ভাৰতৰ ডি গুকেশে চতুৰ্দশ তথা অন্তিমখন খেলত চীনৰ ডিং লিৰেনক পৰাস্ত কৰি ইতিহাস সৃষ্টি কৰিছে । 6.5-6.5 পইণ্টৰে আৰম্ভ হোৱা খেলখন অন্তিম পৰ্যায়ত অমীমাংসিত হোৱাৰ দিশে গতি কৰা যেন হৈছিল যদিও গুকেশে শেষ হাঁহি মাৰিবলৈ সক্ষম হয় । চীনা খেলুৱৈ ডিং লিৰেনৰ এটা ভুলৰ বাবেই গুকেশে খেলখনত জয়লাভ কৰে ।

2012 চনত বিশ্বনাথন আনন্দৰ পিছত বিশ্ব দবা চেম্পিয়নৰ খিতাপ দখল কৰা প্ৰথমগৰাকী ভাৰতীয়ত পৰিণত হৈছে গুকেশ । দেশৰ দবাক্ষেত্ৰৰ লগতে গুকেশৰ বাবেও এই বছৰটো আছিল এটা সাফল্যমণ্ডিত বছৰ ৷ চলিত বছৰতে প্ৰাৰ্থীগৰাকীয়ে দবা অলিম্পিয়াডত স্বৰ্ণ জয় কৰিছিল ।

গুকেশ এই অবিশ্বাস্য কৃতিত্ব অৰ্জন কৰা দ্বিতীয়গৰাকী ভাৰতীয় ৷ ভাৰতৰ কিংবদন্তী দবা খেলুৱৈ তথা প্ৰাক্তন গ্ৰেণ্ডমাষ্টাৰ বিশ্বনাথন আনন্দ এই অভিজাত তালিকাৰ অংশ হোৱা একমাত্ৰ ভাৰতীয় । আনন্দে 5 বাৰকৈ বিশ্ব দবা চেম্পিয়নশ্বিপৰ আকাংক্ষিত খিতাপ জয় কৰিছে ।

বিশ্ব দবা চেম্পিয়নশ্বিপৰ খিতাপ দবা খেলৰ আটাইতকৈ সন্মানীয় সাফল্য । 1886 চনৰ পৰা মাত্ৰ 17 গৰাকী খেলুৱৈয়ে বিশ্ব দবা চেম্পিয়নৰ এই আকাংক্ষিত খিতাপ দখল কৰিছে । এই তালিকাত স্থান লাভ কৰা গুকেশ সম্প্ৰতি 18 নং বিশ্ব দবা চেম্পিয়নত পৰিণত হৈছে ।

লগতে পঢ়ক: 17 বছৰীয়া ডি গুকেশৰ শিৰত বিশ্ব চেম্পিয়নৰ খিতাপ - FIDE Candidates 2024