লক্ষ্ণৌক ৩৭ ৰাণত পৰাস্ত কৰি পইণ্ট তালিকাৰ দ্বিতীয় স্থানত পঞ্জাৱ

ধৰ্মশালা : আই পি এল ২০২৫ৰ ৫৪ সংখ্যক মেচত পঞ্জাব কিংছে লক্ষ্ণৌ ছুপাৰ জায়েন্টছক ৩৭ ৰাণত পৰাস্ত কৰে ৷ ধৰমশালাৰ হিমাচল প্ৰদেশ ক্ৰিকেট এছ’চিয়েশ্যন ষ্টেডিয়ামত অনুষ্ঠিত খেলখনত প্ৰভসীমৰণ সিঙৰ ধুমুহাময় ইনিংছ আৰু আৰ্শদীপ সিঙৰ চোকা বলিঙে পঞ্জাৱক ৩৭ ৰাণত এক দৰ্শনীয় জয় প্ৰদান কৰে । এই জয়ৰ জৰিয়তে পঞ্জাব কিংছে পইণ্ট তালিকাৰ দ্বিতীয় স্থান দখল কৰিছে ৷

এই মেচখনত প্ৰভসীমৰণ সিঙৰ উজ্জ্বল ৯১ ৰাণৰ বাবেই পি বি কে এছে নিৰ্ধাৰিত অভাৰত ৫ উইকেট হেৰুৱাই ২৩৬ ৰ বিশাল স্ক’ৰ কৰে ৷ ইয়াৰ পিছত আৰ্শদীপে এডেন মাৰ্ক্ৰাম, মিচেল মাৰ্ছ আৰু নিকোলাছ পুৰাণক পাৱাৰ প্লেত আউট কৰি মেচখন পি বি কে এছৰ সপক্ষে আনে ৷ লক্ষ্ণৌৰ হৈ ষষ্ঠ উইকেটৰ বাবে আয়ুষ বদোনিয়ে ৪০টা বলত ৫টা চাৰি আৰু ৫টা ছয়ৰে ৭৪ ৰাণ আৰু আব্দুল ছামাদে ২৪টা বলত ২টা চাৰি আৰু ৪ টা ছয়ৰে ৮১ ৰাণৰ অংশীদাৰিত্ব আগবঢ়ায় যদিও এল এছ জিয়ে ২০ অভাৰত ৭ উইকেট হেৰুৱাই মাত্ৰ ১৯৯ ৰাণহে সংগ্ৰহ কৰিবলৈ সক্ষম হয় আৰু মেচখনত ৩৭ ৰাণত পৰাস্ত হয় ।

লক্ষ্ণৌৰ হৈ অধিনায়ক ঋষভ পণ্টে ১৭টা বলত ৩ টা চাৰিৰ সহায়ত ১৮ ৰাণ সংগ্ৰহ কৰে আৰু অষ্টম অভাৰত আজমাতুল্লাহ উমৰজাৰ বলত ডেভিদ মিলাৰে তেওঁৰ কেছ ধৰে ৷ পঞ্জাৱৰ হৈ আৰ্শদীপ সিঙে ৪ অভাৰত ১৬ ৰাণত ৩ উইকেট আৰু আজমতুল্লাহ উমৰজাই ২ উইকেট দখল কৰে ৷

ইয়াৰ পূৰ্বে পঞ্জাৱৰ হৈ প্ৰভসীমৰণ সিঙে ৪৮টা বলত ৯১ ৰাণৰ ইনিংছ খেলিছিল য’ত ৬টা চাৰি আৰু ৭টা ছয় আছিল ৷ অধিনায়ক আয়াৰে ২৫টা বলত ৪টা চাৰি আৰু ২টা ছয়ৰে ৪৫ ৰাণ সংগ্ৰহ কৰে ৷ জোছ ইংলিছে ৩০ ৰাণ আৰু শশাংক সিঙে ৩৩ ৰাণ আগবঢ়ায় ৷ লক্ষ্ণৌৰ হৈ দিগবেশ ৰাথী আৰু আকাশ সিঙে ২টাকৈ উইকেট দখল কৰে ৷ লক্ষ্য খেদি ফুৰাৰ সময়ত লক্ষ্ণৌ দলে ১৫ অভাৰত ১৪৫ ৰাণত ৫ উইকেট হৰুৱায় ৷