নতুন দিল্লী : ভাৰতৰ সোঁহাতৰ তাৰকা বেটছমেন বিৰাট কোহলিয়ে টেষ্ট ক্ৰিকেটৰ পৰা অৱসৰ গ্ৰহণ কৰাৰ কথা ঘোষণা কৰিলে । যাৰ ফলত ভাৰতীয় দলত এক ডাঙৰ শূন্যতাৰ সৃষ্টি হৈছে ।ইংলেণ্ড ভ্ৰমণৰ লগে লগে টীম ইণ্ডিয়াই বৃহৎ প্ৰত্যাহ্বানৰ সন্মুখীন হ’ব পাৰে । সকলোৰে দৃষ্টি থাকিব কোহলীৰ ঠাইত টেষ্ট দলত অহা খেলুৱৈগৰাকীৰ ওপৰত ।
বিদেশ ভ্ৰমণৰ আটাইতকৈ নিৰ্ভৰযোগ্য বেটছমেন বিৰাট কোহলীৰ টেষ্ট ক্ৰিকেটৰ পৰা অৱসৰ ভাৰতৰ বাবে অতি গুৰুত্বপূৰ্ণ । যোৱা সপ্তাহত ৰোহিত শৰ্মাই আটাইতকৈ দীঘলীয়া ফৰ্মেটৰ পৰা অৱসৰ লোৱাৰ পিছতে দলটো নতুন অধিনায়কৰ সন্ধানত আছিল আৰু এতিয়া নিৰ্বাচকসকলে দলত কোহলীৰ ঠাই ল’ব পৰা খেলুৱৈ বিচাৰিব লাগিব ।
ভাৰতীয় প্রাক্তন অধিনায়ক কিং কোহলীয়ে ২০১৩ চনৰ পৰা প্রতিটো ইংলেণ্ড ভ্ৰমণলৈ আহিছে যদিও এইবাৰ তেওঁ নাথাকিব আৰু তেওঁৰ অভিজ্ঞতা নিশ্চিতভাৱে ভাৰতীয় দলটোৱে হেৰুৱাব ৷ তেওঁৰ সলনি দলত আন এজনক বিচাৰি উলিওৱাটো নিৰ্বাচকসকলৰ বাবে এক ডাঙৰ প্ৰত্যাহ্বান হ’ব । এই সন্দৰ্ভত এই কাহিনীৰ জৰিয়তে আমি আপোনালোকক ক'বলৈ ওলাইছো এনে ৩ জন খেলুৱৈৰ বিষয়ে যিয়ে ভাৰতৰ টেষ্ট দলত নিজৰ স্থান ল'ব পাৰে ।
- ইংলেণ্ড ভ্ৰমণত ভাৰতৰ টেষ্ট দলত বিৰাট কোহলীৰ ঠাইত খেলিব পৰা ৩জন সম্ভাব্য খেলুৱৈ:-
১) কৰুণ নায়াৰ
বিদৰ্ভৰ হৈ নায়াৰে মিডল অৰ্ডাৰত বেটিং কৰিছিল আৰু টেষ্ট ক্ৰিকেটতো তেওঁৰ ট্ৰিপল চেঞ্চুৰী প্ৰায় ৯ বছৰ পূৰ্বে ইংলেণ্ডৰ বিৰুদ্ধেও আহিছিল । বিৰাট কোহলীয়ে টেষ্টৰ পৰা অৱসৰ লোৱাৰ পাছত ভাৰতৰ টেষ্ট দললৈ ঘূৰি অহাৰ সম্ভাৱনা নায়াৰৰ । ঘৰুৱা ক্ৰিকেটত ধাৰাবাহিক প্ৰদৰ্শনৰ পিছত তেওঁক নিৰ্বাচকসকলে নিৰ্বাচিত কৰাৰ সম্ভাৱনা আছে ।
২) সাই সুদৰ্শন
যুৱ বাওঁহাতৰ বেটছমেন সাই সুদৰ্শনৰ কম্পেক্ট টেকনিকে তেওঁক অহা মাহত ইংলেণ্ড ভ্ৰমণৰ অন্যতম প্ৰিয় খেলুৱৈ হিচাপে গঢ়ি তুলিছে । ২০২৫ চনৰ আই পি এলত তেওঁৰ উজ্জ্বল বেটিঙে ঢৌ তুলিছে আৰু কাউন্টি ক্ৰিকেটত ছাৰেৰ হৈ খেলাৰ অভিজ্ঞতাও আছে ।
যোৱা ৰঞ্জি ট্ৰফী ছিজনত তেওঁ মাত্ৰ ৪ ইনিংছত ৩০৪ ৰাণ সংগ্ৰহ কৰিছিল, য’ত ডাবল চেঞ্চুৰীও আছিল । সুদৰ্শনে টেষ্ট দলত স্থান পোৱাৰ সম্ভাৱনা বেছি আৰু সুযোগ পালে হয়তো মিডল অৰ্ডাৰত বেটিং কৰিব লাগিব ।
৩) শ্ৰেয়াছ আয়াৰ
ভাৰতৰ সোঁহাতৰ তাৰকা বেটছমেন শ্ৰেয়াছ আয়েৰে এদিনীয়া আৰু আই পি এলত যিদৰে উজ্জ্বল প্ৰদৰ্শন আগবঢ়াইছে তাৰ পিছত টেষ্ট দললৈ ঘূৰি অহাৰ সকলো সম্ভাৱনা আছে । ঘৰুৱা ক্ৰিকেটত তেওঁ যি ধৰণৰ ট্ৰফী লাভ কৰিছে সেই কথা বিবেচনা কৰিলে তেওঁ পৰৱৰ্তী অধিনায়ক হোৱাৰ দৌৰতো আছে ।
২০২৫ চনৰ আই পি এলত পঞ্জাব কিংছকো ভাল নেতৃত্ব দিছিল আৰু বিৰাট কোহলীৰ টেষ্ট অৱসৰৰ পিছত ৰাষ্ট্ৰীয় টেষ্ট দললৈ ঘূৰি অহাৰ বাবে তেওঁ এজন ভাল প্ৰতিদ্বন্দ্বী । আয়াৰে এতিয়ালৈকে ১৪খন টেষ্ট খেলিছে আৰু গড়ে ৩৬.৮৬ ৰাণত ৮১১ ৰাণ সংগ্ৰহ কৰিছে, ১ শতক আৰু ৫টা অৰ্ধশতক ।
