ৰাষ্ট্ৰীয় স্বয়ংসেৱক সংঘৰ আন্দোলন ৰাজীৱ ভৱনলৈ বিস্তাৰিত হওক: মুখ্যমন্ত্রী - Himanta Biswa Sarma

গুৱাহাটী, 4 আগষ্ট : বিজেপি এৰি কংগ্ৰেছলৈ গ'লে বেয়া নাপায় মুখ্যমন্ত্ৰীয়ে ৷ আনকি বিজেপিৰ পৰা CPI M, AIUDFলৈও বিজেপিৰ কার্যকর্তা যোৱাটো বিচাৰে মুখ্যমন্ত্ৰীয়ে ৷ কলাক্ষেত্ৰত দেওবাৰে অনুষ্ঠিত হোৱা ৰাজ্যিক বিজেপিৰ কাৰ্যনিৰ্বাহক সভাত অংশগ্ৰহণ কৰি এইদৰে প্ৰতিক্ৰিয়া ব্যক্ত কৰে মুখ্যমন্ত্ৰী ড৹ হিমন্ত বিশ্ব শৰ্মাই ৷ মুখ্যমন্ত্ৰী ড৹ শৰ্মাই কয়, "দুই-এজন আমাৰ বন্ধু কংগ্ৰেছ দলত যোগদান কৰিছে, মই ভাল পাইছো ৷ ৰাষ্ট্ৰীয় স্বয়ংসেৱক সংঘৰ আন্দোলন ৰাজীৱ ভৱনলৈ বিস্তাৰিত হওক তাক মই নিশ্চয়কৈ কামনা কৰিছো ৷ আমাৰ কামেই হৈছে সমাজৰ প্ৰতিটো স্তৰতে বিস্তাৰ কৰা ৷"

মুখ্যমন্ত্ৰীগৰাকীয়ে পুনৰ কয়, "আমাৰ সংঘৰ স্বয়ং সেৱক এজনে যদি কাইলৈ ৰাজীৱ ভৱনত গৈ সিংহৰ দৰে আৰ্তনাদ কৰিব পাৰে আমাতকৈ সুখী কোনো হ’ব নোৱাৰে ৷ কাৰণ ৰাষ্ট্ৰীয় স্বয়ং সেৱক সংঘৰ লক্ষ্য বিজেপি নিৰ্মাণ কৰা নহয় ৷ ইয়াৰ লক্ষ্য সমাজ-ৰাষ্ট্ৰ নিৰ্মাণ কৰা ৷ ৰাজীৱ ভৱনলৈ যিমানেই হিন্দুক বিশ্বাস কৰা ব্যক্তি যায় সিমানেই আমাৰ বাবে বিজয় বুলি আমি অনুভৱ কৰিব লাগিব ৷" মুখ্যমন্ত্ৰী ড৹ শৰ্মাই আৰু কয়, " কংগ্ৰেছত থাকি খিলঞ্জীয়া লোকৰ হৈ কাম কৰাৰ যদি সুযোগ পালোহেঁতেন তেন্তে কেতিয়াও কংগ্ৰেছৰ পৰা ওলাই নাহিলোহেঁতেন ৷ তেওঁলোকে যদি ৰাজীৱ ভৱনত গৈ যদি অসমৰ হিন্দুৰ বাবে, খিলঞ্জীয়া লোকৰ বাবে কাম কৰাৰ পৰিৱেশ নিৰ্মাণ কৰে তেন্তে তেওঁলোক আমাৰ বাবে আদৰ্শ, প্ৰেৰণা হৈ ৰ’ব ৷ দুই এজন চি পি এমকো আৰ এছ এছ কৰি দিব লাগে ৷ পাৰিলে দুই এজন এ আই ইউ ডি এফো যাব লাগে আৰু গৰু খোৱা বন্ধ কৰিব লাগে ৷"

আনহাতে ৰাজ্যিক কার্যনিৰ্বাহকত কংগ্ৰেছৰ বিৰুদ্ধে আক্ৰমণাত্মক ৰূপ লয় মুখ্যমন্ত্ৰীয়ে ৷ কংগ্ৰেছক আক্ৰমণৰ লক্ষ্য কৰি লৈ তেওঁ কয়,'পগলা কুকুৰক জোকাই নল'ব ৷ যিমানে জোকাব তাতকৈ বেছিকৈ জোকাৰি যাম ৷ আপোনালোকৰ ইতিহাস তুষ্টিকৰণৰ ইতিহাস ৷ এক লাখ নিযুক্তত নিকা নিযুক্তি হৈছে আৰু খিলঞ্জীয়াই চাকৰি পাইছে ৷ কংগ্ৰেছৰ দিনত তুষ্টিকৰণত নিযুক্তি হৈছিল ৷ কংগ্ৰেছৰ দিনত অসম পুলিচত 30 শতাংশ বিশেষ সম্প্ৰদায়ৰ লোকক কনিষ্টবলত নিযুক্তি দিয়া হৈছিল ৷ সেই ইতিহাস আমি পৰিৱৰ্তন কৰিছো ৷"

লোকসভা নিৰ্বাচনৰ আসন লাভক লৈয়ো কংগ্ৰেছক সমালোচনা কৰে মুখ্যমন্ত্ৰীয়ে ৷ কংগ্ৰেছে তিনিখন আসন জিকি এভাৰেষ্ট জয় কৰা যেন অনুভৱ কৰিছে ৷ কংগ্ৰেছে 14 খন আসনৰ 3 খন আসন লাভ কৰিয়ে সন্তুষ্ট ৷ তেওঁলোকে এবাৰো অনুভৱ কৰা নাই 5 খনৰ পৰা যে 2 খন হ্ৰাস পালে ৷ স্বাধীনতাৰ সময়ৰ পৰা জৱাহৰলাল নেহৰু আৰু মনমোহন সিঙলৈকে চৰাইদেউ মৈদামক স্বীকৃতি দিব নোৱাৰিলে বুলিও কংগ্ৰেছক সমালোচনা কৰে তেওঁ ৷ তেওঁ লগতে কয় যে, প্ৰধানমন্ত্ৰী মোদীৰ নেতৃত্বত অসমে ছেমি কণ্ডাক্টৰৰ দৰে উদ্যোগ পালে ৷ বিজেপি চৰকাৰে যি কাম কৰিবলৈ সক্ষম হৈছে পূৰ্ব কোনো চৰকাৰে তাৰ কাষেৰে যাবলৈয়ো সক্ষম নহয় বুলি মন্তব্য কৰে তেওঁ ৷

লগতে পঢ়ক : মুখ্যমন্ত্ৰী ড৹ শৰ্মাই জনালে কেবাখনো নতুন আইনৰ বিষয়ে : কি কি ? - Assam Land Sale Policy