নৰেন্দ্ৰ মোদীৰ আত্মসমৰ্পণ ! ৰাহুলৰ মন্তব্য়ই জুই জ্বলাইছে বিজেপি-কংগ্ৰেছৰ মাজত

নতুন দিল্লী: অপাৰেশ্যন সেন্দূৰৰ পটভূমিত ভাৰত-পাকিস্তানৰ মাজত হোৱা যুদ্ধবিৰতিত আমেৰিকাৰ ৰাষ্ট্ৰপতি ড’নাল্ড ট্ৰাম্প জড়িত থকা সন্দৰ্ভত বিৰোধী দলপতি ৰাহুল গান্ধীয়ে দেশৰ প্ৰধানমন্ত্ৰীক ‘নৰেন্দ্ৰ মোদীৰ আত্মসমৰ্পণ’ বুলি কটাক্ষ কৰিছিল ৷ ইয়াকে লৈ বুধবাৰে বিজেপি আৰু কংগ্ৰেছে বাকযুদ্ধত লিপ্ত হয় ।

মঙলবাৰে ভূপালত কংগ্ৰেছৰ এক অনুষ্ঠানত ৰাহুলে ভাৰত-পাকিস্তানৰ সামৰিক সংঘাতৰ সময়ত ট্ৰাম্পৰ ফোনত প্ৰধানমন্ত্ৰী মোদীয়ে আত্মসমৰ্পণ কৰা বুলি কোৱাৰ লগে লগে বিতৰ্কৰ সূচনা হয় ।

"ট্ৰাম্পে ফোনযোগে ক'লে, ‘মোদীজী, আপুনি কি কৰি আছে ? নৰেন্দ্ৰ… আত্মসমৰ্পণ কৰক’ আৰু প্ৰধানমন্ত্ৰী মোদীয়েও ইয়াকে অনুসৰণ কৰিলে… ইতিহাস সাক্ষী, এয়াই বিজেপি-আৰ এছ এছৰ চৰিত্ৰ, তেওঁলোকে সদায় শিৰ নত কৰে’’ বুলি ৰাহুল গান্ধীয়ে মঙলবাৰে কৈছিল ৷

এই মন্তব্যই বুধবাৰে বিজেপিত ব্যাপক বিতৰ্কৰ সৃষ্টি কৰে আৰু ৰাহুলে সশস্ত্ৰ বাহিনীক অপমান কৰাৰ অভিযোগ উত্থাপন কৰি বিজেপিয়ে কয় যে ই অপাৰেশ্যন সেন্দূৰৰ সফলতাক ক্ষতিগ্ৰস্ত কৰাৰ সমান । গেৰুৱা দলটোৱে লগতে কয় যে গান্ধীৰ এই মন্তব্যই সন্দেহৰ সৃষ্টি কৰিছে ৷ কিজানি তেওঁ চীন আৰু পাকিস্তানৰ “পেইড এজেণ্ট” ৰ দৰে কাম কৰে ।

বিজেপিৰ ৰাষ্ট্ৰীয় মুখপাত্ৰ সুধাংশু ত্ৰিবেদীয়ে কয় ‘‘কংগ্ৰেছ নেতাগৰাকীয়ে চুবুৰীয়া দেশখনৰ সমৰ্থনত ভাষণ দি পাকিস্তানী সেনা প্ৰধান, চিৰবৈৰী দেশখনৰ প্ৰধানমন্ত্ৰী আৰু সন্ত্ৰাসবাদীসকলৰ মাষ্টাৰ মাইণ্ডকো অতিক্ৰম কৰিছে ৷ লগতে অভিযোগ কৰে যে তেওঁৰ এই মন্তব্য়ই এটা অস্বাস্থ্যকৰ আৰু বিপজ্জনক মানসিকতা প্ৰতিফলিত কৰিছে ।

মঙলবাৰে এক বৈঠকত মিলিত হৈ অপাৰেশ্যন সেন্দূৰৰ পিছত সংসদৰ বিশেষ অধিৱেশনৰ দাবী জনোৱা বিৰোধী দল ইণ্ডিয়া ব্লকৰ বিভিন্ন নেতাৰ বিতৰ্কিত মন্তব্যৰ কথা উল্লেখ কৰি তেওঁ দাবী কৰে যে ইয়াৰ মুখা খুলি দিয়া হৈছে । ত্ৰিবেদীয়ে লগতে কয় যে ভাৰত তেওঁলোকৰ নামত আছে কিন্তু পাকিস্তান তেওঁলোকৰ হৃদয়ত আছে । গান্ধীৰ মন্তব্যই প্ৰমাণ কৰিছে যে বিৰোধী নেতাসকলৰ পৰা আশা কৰা ধৰণে পৰিপক্কতা আৰু গুৰুত্বৰ অভাৱ আছে ।

ত্ৰিবেদীয়ে কয়- ‘‘ভাৰত-পাকিস্তানৰ মাজত মধ্যস্থতা কৰি দুয়োপক্ষৰ সামৰিক কাৰ্যকলাপ বন্ধ কৰাৰ ক্ষেত্ৰত ট্ৰাম্পৰ দাবী ইতিমধ্যে ভাৰত চৰকাৰে নাকচ কৰিছে ।’’ বিজেপিৰ মুখপাত্ৰগৰাকীয়ে ট্ৰাম্পে ২০২০ চনত আমেৰিকাৰ পূৰ্বৰ ৰাষ্ট্ৰপতি জ’ বাইডেনক হত্যা কৰি তাৰ ঠাইত ৰবটিক ক্ল’ন স্থাপন কৰা বুলি ষড়যন্ত্ৰমূলক তত্ত্ব পোষ্ট কৰাৰ কথা উল্লেখ কৰে ।

ভাৰতৰ প্ৰতিপত্তি আৰু সশস্ত্ৰ বাহিনীৰ বীৰত্বক ক্ষতিগ্ৰস্ত কৰাৰ অভিযোগত পাকিস্তানী সেনাপ্ৰধান আৰু প্ৰধানমন্ত্ৰীৰ উপাধি ব্যৱহাৰ কৰি ত্ৰিবেদীয়ে গান্ধীক "ৰাহুল মুনীৰ" আৰু "ৰাহুল শ্বৰীফ" বুলি অভিহিত কৰে ।

ইফালে বিজেপিৰ সাংসদ তথা ৰাষ্ট্ৰীয় মুখপাত্ৰ সম্বিত পাত্ৰই কয় যে গান্ধীয়ে নিজৰ মন্তব্যৰে অপাৰেশ্যন সেন্দূৰ, সশস্ত্ৰ বাহিনী আৰু দেশক অপমান কৰিছিল । পাত্ৰই অভিযোগ কৰি কয় ‘‘ৰাহুল গান্ধীয়ে যি ধৰণৰ ভাষা ব্যৱহাৰ কৰিছে, ৰাহুল গান্ধীয়ে বাৰে বাৰে যি ধৰণৰ প্ৰশ্ন কৰিছে, মোৰ সম্পূৰ্ণ সন্দেহ আছে যে তেওঁ চীন বা পাকিস্তানৰ পেইড এজেণ্ট ।’’

উভতি ধৰিলে কংগ্ৰেছে

ইফালে কংগ্ৰেছে বিজেপিক প্ৰত্যুত্তৰ দি কয় যে গেৰুৱা দলটোৱে ১১ বছৰ ধৰি "মুকদ্দৰ কা চিকন্দৰ" শীৰ্ষক ছবি এখনৰ সৈতে মিল থকা শক্তিৰ আখ্যান তৈয়াৰ কৰিছিল ৷ যাৰ মাথোঁ ইয়াৰ অন্ত পৰিল "নৰেন্দ্ৰ মোদীৰ আত্মসমৰ্পণ" ৰে ।

‘‘যোৱা ১১ বছৰে বিজেপিৰ নেতা-কৰ্মীসকলে এখন ছবি নিৰ্মাণ কৰি আছিল ৷ যাৰ নাম 'মুকদ্দৰ কা চিকন্দৰ' ৷ কিন্তু যেতিয়া ছবিখন সাজু হ'ল, তেতিয়া 'নৰেন্দ্ৰ মোদীৰ আত্মসমৰ্পণ' ৰূপেহে প্ৰকাশ হ’ল ৷ আচলতে সাহসৰ কোনো প্ৰতিষেধক নাই, কিন্তু ই এজন ব্যক্তিৰ চৰিত্ৰত আছে যিটো আমি বৰ্তমান দেখিবলৈ পাইছো’’ কংগ্ৰেছৰ মুখপাত্ৰ পৱন খেৰাই এইদৰে কয় ।

"যেতিয়া সাহসী ভাৰতীয় সেনাই পাকিস্তানক আঁঠু কাঢ়িবলৈ বাধ্য কৰাইছিল, তেতিয়া ট্ৰাম্পে ফোন কৰিছিল আৰু নৰেন্দ্ৰ মোদীয়ে আত্মসমৰ্পণ কৰিছিল । ট্ৰাম্পে বহুবাৰ কৈছিল যে তেওঁলোকে বাণিজ্যৰ ভাবুকি দি যুদ্ধবিৰতি সম্পন্ন কৰিলে ৷ কিন্তু নৰেন্দ্ৰ মোদীয়ে আজিলৈকে ট্ৰাম্পক কোনো উত্তৰ দিয়া নাই । তেওঁ উত্তৰো নিদিয়ে ৷ কাৰণ নাম নৰেন্দ্ৰ, কাম হৈছে আত্মসমৰ্পণ – এইটোৱেই বাস্তৱ আৰু সত্য’’ বুলি খেৰাই লগতে কয় ৷

ইণ্ডিয়া ব্লকে বিচাৰিছে বিশেষ অধিবেশন: খাৰ্গে

২২ এপ্ৰিলৰ পহলগাম আক্ৰমণৰ পিছত ভাৰত-পাকিস্তানৰ উত্তেজনা বৃদ্ধিৰ বিষয়ে আলোচনা কৰিবলৈ পুনৰবাৰ সংসদৰ বিশেষ অধিৱেশনৰ দাবী কৰে কংগ্ৰেছৰ ৰাষ্ট্ৰীয় সভাপতি মল্লিকাৰ্জুন খাৰ্গেই ।

‘‘আমি ভাৰতৰ নেতাসকলে ২০২৫ চনৰ ২২ এপ্ৰিলত পহলগামত সংঘটিত হোৱা সন্ত্ৰাসবাদী আক্ৰমণৰ পিছত সংসদৰ বিশেষ অধিৱেশন আহ্বান কৰিবলৈ আমাৰ সামূহিক আৰু জৰুৰী অনুৰোধ পুনৰবাৰ প্ৰকাশ কৰিছো । সন্ত্ৰাসবাদী আক্ৰমণ, পুঞ্চ, উৰি আৰু ৰাজৌৰীত সাধাৰণ নাগৰিকক হত্যা কৰা, যুদ্ধবিৰতি ঘোষণা আৰু আমাৰ ৰাষ্ট্ৰীয় নিৰাপত্তা আৰু বিদেশৰ ওপৰত ইয়াৰ প্ৰভাৱ সন্দৰ্ভত জাতিটোৰ সন্মুখত গুৰুতৰ প্ৰশ্ন উত্থাপন হৈছে ৷ ভাৰতৰ স্থিতিৰ বিষয়ে আন্তঃৰাষ্ট্ৰীয় সমাজৰ সৈতে জড়িত হোৱাৰ চৰকাৰৰ প্ৰচেষ্টাক সমৰ্থন জনাইছো ৷ কিন্তু সংসদক নহয়, যিয়ে ভাৰতৰ জনসাধাৰণ আৰু তেওঁলোকৰ নিৰ্বাচিত প্ৰতিনিধিসকলক আন্ধাৰত ৰাখিছে’’ বুলি খাৰ্গেই কয় ৷

লগতে পঢ়ক: গৌৰৱ গগৈয়ে দায়িত্বভাৰ লোৱাৰ দিনাই চৰ্চাত এটা বিশেষ ৱাটছএপ মেছেজ : কি সেই মেছেজ !