নগাঁও: সাংসদ ৰকিবুল হুছেইনৰ ওপৰত সংঘটিত আক্ৰমণৰ ঘটনাৰ অন্যতম অভিযুক্ত কাছেম আলীক আটক । নগাঁৱৰ ৰূপহীহাট থানাৰ আৰক্ষীয়ে অভিযুক্ত কাছেম আলীক আটক কৰে ।
আনহাতে, ধৃত কাছেমৰ বিৰুদ্ধে একাধিক গুৰুতৰ অভিযোগ উত্থাপিত হৈছে । উল্লেখ্য যে যোৱা ২০ ফেব্ৰুৱাৰীত ৰূপহীহাটৰ নতুন বজাৰত সাংসদ ৰকিবুল হুছেইনৰ ওপৰত সংঘটিত আক্ৰমণৰ ঘটনাত কাছেম জড়িত থকাৰ অভিযোগ উত্থাপন কৰিছিল ৰকিবুল হুছেইনে । সাংসদ ৰকিবুল হুছেইনৰ আক্ৰমণৰ ঘটনাৰ অন্যতম মূল অভিযুক্ত বুলি অভিহিত কৰিছিল কংগ্ৰেছেও ।
কেৱল এয়াই নহয়, বিগত ১০ এপ্ৰিলত শিঙিমাৰী উন্নয়ন খণ্ডত পঞ্চায়ত নিৰ্বাচনৰ বাবে এগৰাকী ৱাৰ্ড সদস্যৰ প্ৰাৰ্থীৰ মনোনয়ন-পত্ৰ জমা দিয়াৰ সময়ত মনোনয়ন কাঢ়ি নিয়াৰো অভিযোগ কাছেমৰ বিৰুদ্ধে উত্থাপিত হৈছে । তদুপৰি, ১১ এপ্ৰিলত শিঙিমাৰী উন্নয়ন খণ্ডৰ সমীপৰ বজাৰত কংগ্ৰেছৰ এগৰাকী কৰ্মীৰ ওপৰত আক্ৰমণৰ ঘটনাতো ধৃত কাছেম জড়িত থকাৰ অভিযোগ উত্থাপন হৈছে ।
কেইবাটাও অভিযোগত অভিযুক্ত কাছেমক আটকৰ পিছত ৰূপহীহাট থানালৈ নিয়া হৈছে যদিও পৰৱৰ্তী সময়ত নগাঁও আৰক্ষীয়ে জিম্মাত লৈ সোধা-পোছা অব্যাহত ৰখা বুলি জানিব পৰা গৈছে ।
উল্লেখ্য যে চামগুৰি সমষ্টিৰ বিগত উপ-নিৰ্বাচনতো সংঘটিত কেইবাটাও হিংসাত্মক ঘটনাৰ সৈতে ধৃত কাছেম আলী জড়িত থকা বুলিও উত্থাপন হৈছিল অভিযোগ । আনকি শেহতীয়াকৈ ৰূপহীহাট আৰক্ষীয়ে কৰায়ত্ত কৰা কাছেম আলীৰ বিৰুদ্ধে পূৰ্বে ডকাইতিৰ দৰে ঘটনাত জড়িত থকাৰ অভিযোগত গোচৰ থকা বুলিও আন এক সূত্ৰে জানিব পৰা গৈছে । উল্লেখ্য যে সাংসদ ৰকিবুল হুছেইনৰ ওপৰত আক্ৰমণৰ ঘটনাই ইতিমধ্যে ৰাজ্যৰ ৰাজনৈতিক মহলত প্ৰতিক্ৰিয়াৰ সৃষ্টি কৰিছিল ।
