গৌৰৱ সভাপতি হ’ল, চাৰিওফালৰ পৰা গগৈলৈ বৰষিছে সমালোচনাৰ বাণ

গুৱাহাটী : সাংসদ গৌৰৱ গগৈক অসম প্ৰদেশ কংগ্ৰেছৰ সভাপতি নিযুক্তি দিয়াৰ পিছতে কংগ্ৰেছ শিবিৰত দেকা গৈছে উৎসাহ ৷ আনহাতে গৌৰৱৰ নিযুক্তিৰ লগে লগে বিজেপিৰ মাজত সমালোচনাৰ জোৱাৰ দেখা গৈছে । কংগ্ৰেছ বিৰোধী শাসকীয় বিজেপিৰ শীৰ্ষ নেতৃত্বই প্ৰকাশ কৰিছে ভাগে ভাগে মন্তব্য ৷

মুখ্যমন্ত্ৰী হিমন্ত বিশ্ব শৰ্মাৰ পৰা আৰম্ভ কৰি ৰাজ্যিক বিজেপিৰ সভাপতি দিলীপ শইকীয়া, কেন্দ্ৰীয় মন্ত্ৰী পবিত্ৰ মাৰ্ঘেৰিটালৈকে প্ৰকাশ কৰিছে গৌৰৱ গগৈক লৈ মন্তব্য ৷ তাৰ মাজতে বিজেপিৰ দলীয় নিৰ্দেশনা যে গৌৰৱ গগৈ প্ৰসংগত কোনো বিজেপি মুখপাত্ৰই প্ৰকাশ কৰিব নোৱাৰিব মন্তব্য ।

এক কথাত গৌৰৱ গগৈক এপিচিচিৰ সভাপতি নিযুক্তিয়ে প্ৰতিদ্বন্দ্বী দল বিজেপিক কৰি তুলিছে সজাগ ৷ বিজেপিৰ নেতাসকলৰ গৌৰৱ গগৈক লৈ সোমবাৰৰ পৰা কি কি মন্তব্য সেয়া জানো আহক ৷

1. হিমন্ত বিশ্ব শৰ্মা : কংগ্ৰেছত ভূপেন বৰাই হওক নাইবা হিমন্ত বিশ্ব শৰ্মা বা আন যিকোনোৱেই নহওক - সাধাৰণ ঘৰৰ পৰা অহা মানুহে যে ইয়াত ৰাজনীতি কৰিব নোৱাৰে সেয়া এই নিযুক্তিয়ে প্ৰমাণ কৰিলে ৷
2. পবিত্ৰ মাৰ্ঘেৰিটা : যিটো পৰিয়ালৰ ৪ জন সদস্যৰ ৩ জনেই বিদিশী ৰাষ্ট্ৰ নাগৰিক, তেওঁ আমাক ভাৰত প্ৰেমৰ কি নীতি শিক্ষা দিব ?
3. দিলীপ শইকীয়া : মনটো বেয়া লাগিছে ভূপেন বৰাৰ প্ৰতিহে । কি হ’ব ভপেন বৰাৰ ভৱিষ্যত ? ইমান কষ্ট কৰি দলটো তেওঁ আগবঢ়াই লৈ গৈছিল !

• এপ্ৰিল-মে’ত গৌৰৱ গগৈক সভাপতি পাতিব, জানিছিল মুখ্যমন্ত্ৰী হিমন্ত বিশ্বই :

গৌৰৱ গগৈ পাকিস্তানত আইএছআইৰ প্ৰশিক্ষণ লোৱা এজন পাকিস্তানী এজেণ্ট বুলি মুখ্যমন্ত্ৰী হিমন্ত বিশ্ব শৰ্মাই বিস্ফোৰক অভিযোগ আনি ধাৰাবাহিক আক্ৰমণ কৰি আহিছে গৌৰৱক । সভাপতি নিযুক্তিৰ পিছতেই গৌৰৱ গগৈৰ নিযুক্তিক পৰিয়ালকেন্দ্ৰিক ৰাজনীতিৰ প্ৰতিফলন আখ্যা দিয়ে মুখ্যমন্ত্ৰীৰ শৰ্মাই ৷

শৰ্মাৰ দাবী যে তেওঁ আগতেই জানিছিল এপ্ৰিল-মে’ত ভূপেন বৰাৰ ঠাইত গৌৰৱ গগৈক সভাপতি পতা হ’ব বুলি । গৌৰৱ গগৈক সভাপতি হিচাবে নিযুক্তি দিয়াৰ পাচত হিমন্ত বিশ্ব শৰ্মাই মন্তব্য কৰে, “কংগ্ৰেছৰ এপ্ৰ’ছটোৱেই প্ৰ’ পাকিস্তান । ভাৰততকৈ যে পাকিস্তানৰ লগত কংগ্ৰেছৰ লগত সম্পৰ্ক বেছি এই নিযুক্তিটোৱে তাকেই আকৌ এবাৰ প্ৰমাণ কৰিলে ৷ দ্বিতীয়তে কংগ্ৰেছত ভূপেন বৰাই হওক নাইবা হিমন্ত বিশ্ব শৰ্মা বা আন যিকোনোৱেই নহওক - সাধাৰণ ঘৰৰ পৰা অহা মানুহে যে ইয়াত ৰাজনীতি কৰিব নোৱাৰে, সেয়া এই নিযুক্তিয়ে প্ৰমাণ কৰিলে ৷”

“মই আজিৰ পৰা কেইমাহমান আগতে আমাৰ সভাপতি দিলীপ শইকীয়া, মই আৰু ভূপেন বৰা একেখন ফ্লাইটত । দিলীপ শইকীয়া সাক্ষী আছে, মই তেতিয়া ভূপেন বৰাক কৈছিলো যে তোমাক এপ্ৰিল মাহত সভাপতি ভাঙি দিব ।”

• দলটো ভাল কৰিবলৈহে সাধাৰণ ঘৰৰ মানুহ লাগে কংগ্ৰেছক :

“কংগ্ৰেছত এটা সময় থাকে যেতিয়া পাৰ্টীটো ভাঙি যায়, তেতিয়া ভাল কৰিবৰ কাৰণে আপোনাৰ-মোৰ দৰে সাধাৰণ ঘৰৰ মানুহক ব্যৱহাৰ কৰিব । যেতিয়া ইলেকচন আহে টিকট আদি দিয়াৰ সময় হয় ৷ তেতিয়া তেওঁলোকে এই নীলা তেজৰ মানুহ লগত লয় ।” মুখ্যমন্ত্ৰীৰ মন্তব্য ।

“এতিয়া আমাৰ বাবে এটি কথা ভাল হ’ল যে ১০ ছেপ্টেম্বৰত গৌৰৱ গগৈয়ে যেতিয়া আমাৰ উত্তৰ দিব লাগিলহেঁতেন কেৱল সাংসদ হিচাবে ৷ এতিয়া গোটেই পাৰ্টীটো লৈয়ে ডুবিব ।” এয়া আছিল গৌৰৱক প্ৰদেশ কংগ্ৰেছৰ সভাপতি নিযুক্তিৰ পিছত মুখ্যমন্ত্ৰী হিমন্ত বিশ্ব শৰ্মাই কৰা মন্তব্য ৷

অহা ১০ ছেপ্টেম্বৰত গৌৰৱ গগৈৰ পাকিস্তান লিংক সন্দৰ্ভত কি তথ্য-প্ৰমাণ ৰাজহুৱা কৰে তাৰ বাবে অপেক্ষাৰ বাদে উপায় নাই বুলি কয় মুখ্যমন্ত্ৰী শৰ্মাই ।

• পবিত্ৰ মাৰ্ঘেৰিটাৰ ক্ষোভ

মুখ্যমন্ত্ৰী হিমন্ত বিশ্ব শৰ্মাৰ অন্যতম বিশেষ আস্থাভাজন কেন্দ্ৰীয় মন্ত্ৰী পবিত্ৰ মাৰ্ঘেৰিটায়ো গৌৰৱ গগৈক লৈ কৰে বিশেষ কটাক্ষ ৷ গৌৰৱ গগৈক কংগ্ৰেছৰ সভাপতি নিযুক্তি দলটোৰ বাবে দুৰ্ভাগ্যজনক আখ্যা পবিত্ৰ মাৰ্ঘেৰিটাই উত্থাপন কৰিলে গৌৰৱ গগৈৰ বিদেশী পত্নীৰ পাকিস্তান লিংক প্ৰসংগ ।

সাংসদ গৌৰৱ গগৈক অসম প্ৰদেশ কংগ্ৰেছৰ সভাপতি নিযুক্তি (@GauravGogoiAsm)

“এয়া আমাৰ বাবে নহয়, কংগ্ৰেছৰ বাবে দুৰ্ভাগ্যজনক । কিয়নো যিটো পৰিয়ালৰ ৪ জন সদস্যৰ ৩ জনেই বিদেশী ৰাষ্ট্ৰ নাগৰিক । তেওঁ আমাক ভাৰত প্ৰেমৰ কি নীতি শিক্ষা দিব ? যি মানুহৰ পৰিয়ালৰ সদস্যই বৈৰী ৰাষ্ট্ৰ পাকিস্তানৰ পৰা দৰমহা লয় বুলি কংগ্ৰেছে আনুষ্ঠানিকভাৱে স্বীকাৰ কৰিছে । সেই ব্যক্তিয়ে নিজৰ দলৰ যুৱ প্ৰজন্মৰ কি দায়িত্ব গ্ৰহণ কৰিব ? ১০-১৫ দিন পাকিস্তানত থাকি অহা ব্যক্তিজনে দেশৰ বাবে কি কৰিব ?”

• বোকা-পানী খচিব লাগিব গৌৰৱ গগৈয়ে : দিলীপ শইকীয়াৰ ভূপেন বৰা প্ৰীতি

‘‘গৌৰৱ গগৈ এতিয়া সভাপতি হ’ল । অসমৰ চাৰিওফালে ঘূৰিব লাগিব । বোকা-পানী খচিব লাগিব ৷ কেৱল ধুবুৰী বা গোৱালপাৰাত ঘূৰিলেই নহ’ব । সকলোতে যাওক আশা কৰিম আমি ৷ প্ৰতিযোগিতাত নামিম। গগৈ আৰু শইকীয়াৰ প্ৰতিযোগিতা কি হয় আগন্তুক দিনত কি হয় চাওঁ । আশা কৰো শইকীয়াৰ মনোবাঞ্চা পূৰ্ণ হ’ব ৷”

বিদায়ী সভাপতি ভূপেন বৰাৰ ভৱিষ্যতকলৈহে উদ্বিগ্ন দিলীপ শইকীয়া । শইকীয়াৰ মন্তব্য, “মনটো বেয়া লাগিছে ভূপেন বৰাৰ প্ৰতিহে । কি হ’ব ভূপেন বৰাৰ ভৱিষ্যত ? ইমানোকষ্ট কৰি দলটো তেঁও আগবঢ়াই লৈ গৈছিল ৷ এতিয়া তেঁওৰ চিন্ত-চৰ্চাবোৰ গৌৰৱ গগৈয়ে আগবঢ়াই লৈ যায় নে নাযায় ?”

পিছে শীৰ্ষ নেতাসকলৰ মন্তব্যৰ পিছত গৌৰৱ গগৈ প্ৰসংগত এতিয়া মুখ বন্ধ বিজেপিৰ মুখপাত্ৰসকলৰ । বিজেপিৰ এগৰাকী মুখপাত্ৰৰ তথ্য অনুসৰি, বিজেপিৰ তৰফৰ পৰা মুখপাত্ৰসকলক নিৰ্দেশ দিয়া হৈছে যে গৌৰৱ গগৈ প্ৰসংগত এতিয়া মুখ বন্ধ ৰাখিব লাগে ।

এতিয়া সকলোৰে অপেক্ষা, পৰৱৰ্তী সময়ত ২০২৬ৰ বিধানসভা নিৰ্বাচনত হিমন্ত বিশ্ব শৰ্মা বনাম গৌৰৱ গগৈৰ ৰাজনীতিৰ ৰণখনে কেনে ৰূপ পৰিগ্ৰহ কৰে ? ১০ ছেপ্টেম্বৰত মুখ্যমন্ত্ৰী হিমন্ত বিশ্ব শৰ্মাই গৌৰৱৰ পাকিস্তান লিংকৰ তথ্য কি দাঙি ধৰে ? সেয়াও হ’ব লক্ষণীয় ।