ডিব্ৰুগড় : ৰাজ্যৰ বিৰোধী দলসমূহৰ মাজত নাই নেকি মিলাপ্ৰীতি ? নে ৰাইজক দেখুৱাবলৈ এটা আন ভিতৰি আন এটা সম্পৰ্কহে বজাই ৰাখিছে বিৰোধীয়ে ? - এই প্ৰশ্ন ৰাজ্যৰ সচেতন মহলৰ ৷ কিয়নো বিৰোধী দলসমূহৰ মাজৰ মতানৈক্যৰ বাবেই হয়তো মহিলাৰ বাবে সংৰক্ষিত থকা পঞ্চায়তৰ আসমত কংগ্ৰেছ আৰু অসম জাতীয় পৰিষদে দিলে পুৰুষ প্ৰাৰ্থী ৷
হয়, আপুনি ঠিকেই শুনিছে, মহিলাৰ বাবে সংৰক্ষিত থকা পঞ্চায়তত প্ৰক্ষেপিত কৰা হ’ল পুৰুষ প্ৰাৰ্থী ৷ আচলতে মহিলাৰ বাবে সংৰক্ষিত থকা দিল্লীবাৰী চপাতলী আঞ্চলিক পঞ্চায়তত কংগ্ৰেছ-অজাপই দিলে পুৰুষ প্ৰাৰ্থী । টিংখাং সমষ্টিৰ দিল্লীবাৰী চপাতলী আঞ্চলিক পঞ্চায়ত এইবাৰ মহিলাৰ বাবে সংৰক্ষিত হৈছিল । সেই কথা গমেই নাপালে বিৰোধী দলে ।
বিজেপি মিত্ৰদলে আঞ্চলিক পঞ্চায়তটোত অগপ দলৰ পৰা পূৰ্ণিমা চৰেণক প্ৰাৰ্থিত্ব দিছিল । ইয়াৰ বিপৰীতে বিৰোধী অসম জাতীয় পৰিষদে প্ৰদীপ গগৈ নামৰ এজন ব্যক্তিক প্ৰাৰ্থিত্ব দিছিল । যিহেতু এইবাৰ আঞ্চলিক পঞ্চায়তটো মহিলাৰ বাবে সংৰক্ষিত গতিকে বিৰোধীৰ হৈ পুৰুষ প্ৰাৰ্থীয়ে মনোনয়ন দাখিল কৰাৰ লগে লগে অগপৰ প্ৰাৰ্থী পূৰ্ণিমা চৰেণে বিনা প্ৰতিদ্বন্দ্বিতাৰে জয়লাভ কৰাটো নিশ্চিত হৈ পৰিল ।
এই সম্পৰ্কত অসম জাতীয় পৰিষদৰ জিলা সভাপতি শোভাকৰণ কোহাঞিয়ে কয়, ‘‘আমাৰ এইটো ভুল হৈ গ'ল । ভালদৰে চোৱা নহ'ল, সেয়ে আমি জয়লাভ কৰিব লগা আঞ্চলিক পঞ্চায়ত হেৰুৱালো ।’’
উল্লেখ্য যে, ৰাজ্যত অনুষ্ঠিত হ'বলগা পঞ্চায়ত নিৰ্বাচনক লৈ শাসক বিৰোধী সকলো ৰাজনৈতিক দলৰে তৎপৰতা বৃদ্ধি পাইছে । শুকুৰবাৰে প্ৰথম পৰ্যায়ৰ পঞ্চায়ত নিৰ্বাচনৰ মনোনয়ন দাখিলৰ অন্তিম দিনা প্ৰতিটো দলৰ প্ৰাৰ্থীৰে নিজৰ সমৰ্থকক লৈ মনোনয়ন দাখিল কৰিছিল । ডিব্ৰুগড়ৰ প্ৰতিটো সমষ্টিত শাসক দল বিজেপি মিত্ৰদলৰ সমান্তৰালভাৱে বিৰোধী দলসমূহে একত্ৰিত প্ৰাৰ্থী প্ৰক্ষেপ কৰিছিল ।
এইবাৰ ৰাজ্যত প্ৰথমবাৰলৈ পঞ্চায়ত নিৰ্বাচনত অৱতীৰ্ণ হৈছে অসম জাতীয় পৰিষদে । নাগৰিকত্ব সংশোধনী আইন বিৰোধিতাৰে জন্মলাভ কৰা অসম জাতীয় পৰিষদে প্ৰথমবাৰৰ বাবে পঞ্চায়ত নিৰ্বাচন খেলাৰ বাবে প্ৰস্তুতি চলোৱাৰ লগতে সমষ্টিয়ে সমষ্টিয়ে সাংগঠনিক প্ৰচাৰ আৰম্ভ কৰিছে । ইয়াৰ মাজতে মহিলাৰ বাবে সংৰক্ষিত আসনত পুৰুষ প্ৰাৰ্থীয়ে মনোনয়ন দাখিল কৰা বিষয়টোৱে দলটোৰ ভিতৰচ’ৰাত ব্যাপক প্ৰতিক্ৰিয়া সৃষ্টি কৰিছে ।
