আমাৰ চৰকাৰ আৰু ২০ বছৰলৈ থাকিলে অসম বহু আগুৱাই যাব: মুখ্যমন্ত্ৰী

নলবাৰী: আজি পহিলা ব'হাগ । ৰঙালী বিহুৰ আনন্দত মতলীয়া ৰাজ্যবাসী । পুৱাৰে পৰা ৰাজ্যৰ মঠ-মন্দিৰসমূহত অসমীয়া নৱবৰ্ষৰ সু-মংগল কামনাৰ্থে সকলোৱে সেৱা প্ৰাৰ্থনা জনায় । ৰাজ্যৰ মুখ্যমন্ত্ৰীগৰাকীয়েও পহিলা ব'হাগৰ দিনা বিষ্ণু যজ্ঞত আশিস লৈ ৰাইজৰ মংগল কামনাৰ্থে উপস্থিত হয় নলবাৰীত । মঙলবাৰে দিনৰ ভাগত নলবাৰীত উপস্থিত হৈ মুখ্যমন্ত্ৰী হিমন্ত বিশ্ব শৰ্মাই প্ৰথমে নলবাৰী বিধানসভা সমষ্টিৰ অন্তৰ্গত বাঁহজানী মণ্ডল বিজেপিৰ কাৰ্যালয়টো শুভ উদ্বোধন কৰি পোনে পোনে ৰাওনা হয় জিলাখনৰ বৰনদ্দী বিষ্ণু যজ্ঞলৈ ।

তাত মুখ্যমন্ত্ৰীগৰাকীয়ে আশিস লৈ ৰাইজৰ মংগল কামনা কৰে । উপস্থিত শ শ ভক্তৰ সমাগমত মুখ্যমন্ত্ৰীগৰাকীয়ে সাৰুৱা ভাষণৰে সম্ভাষণ জনায় । উক্ত মন্দিৰ ভাগৰ উন্নয়নৰ বাবে দুটা কিস্তিত তেওঁ সৰ্বমুঠ এক কোটি টকাৰ অনুদান ঘোষণা কৰে । তাৰ পিছতে সংবাদ মাধ্যমৰে বাৰ্তালাপ কৰে মুখ্যমন্ত্ৰী হিমন্ত বিশ্ব শৰ্মাই । পোনতে আজি অসমীয়া নৱবৰ্ষৰ পহিলা ব'হাগ আৰু ৰঙালী বিহুৰ বাবে অসমবাসীক ওলগ জনাই মুখ্যমন্ত্ৰীয়ে ।

আনহাতে বৰপেটা সত্ৰই অসমত পুনৰ হিমন্ত বিশ্ব শৰ্মা মুখ্যমন্ত্ৰী হ'ব বুলি ভৱিষ্যদ্বাণী কৰাক লৈ মুখ্যমন্ত্ৰী হিমন্ত বিশ্ব শৰ্মাই কয়, "অসমৰ ৰাইজৰ বাবে আমি বিজেপি চৰকাৰখনে অক্লান্তভাৱে কাম কৰি আছোঁ । লগতে নৰেন্দ্ৰ মোদীৰ নেতৃত্বত ডাবল ইঞ্জিন চৰকাৰ যদি আৰু ২০ বছৰলৈ থাকে তেন্ত অসম বহু আগুৱাই যাব ।"

ইফালে পহিলা ব'হাগৰ দিনাই ৰাজ্যবাসীক এটা ভাল খবৰ দিয়ে মুখ্যমন্ত্ৰীগৰাকীয়ে । এতিয়াৰে পৰা অসম চৰকাৰে জাৰি কৰা অধিসূচনা অনুসৰি অসমত সকলো চৰকাৰী নিৰ্দেশ, আইন, কানুনৰ নিৰ্দেশনা বাৰ্তা ইংৰাজী ভাষাৰ উপৰিও অসমীয়া ভাষাতো প্ৰকাশ কৰিব । ইয়াৰ সমান্তৰালকৈ বৰাকত বাংলা ভাষা আৰু বড়োলেণ্ডত বড়ো ভাষাত সকলো চৰকাৰী নিৰ্দেশনা প্ৰকাশ পাব বুলি তেওঁ জনায় ।