কোকৰাঝাৰ: দেৱৰগাঁও সমষ্টিত এইবাৰ বি টি চিৰ প্ৰাক্তন মুখ্য কাৰ্যবাহী হাগ্ৰামা মহিলাৰীৰ পৰাজয় নিশ্চিত বুলি দাবী বি টি আৰ প্ৰধান প্ৰমোদ বড়োৰ ।
বি টি চিৰ প্ৰাক্তন মুখ্য কাৰ্যবাহী হাগ্ৰামা মহিলাৰীৰ গৃহ সমষ্টি দেৱৰগাঁৱৰ তিতাগুৰী মাজপাৰাত সোমবাৰে অনুষ্ঠিত হয় ইউ পি পি এল দলৰ এক বৃহৎ হিতাধিকাৰী সন্মিলন আৰু আৰ্থ-সামাজিক সজাগতা সভা ৷ এই সভাত অংশগ্ৰহণ কৰি বি টি আৰ প্ৰধান প্ৰমোদ বড়োৱে দেৱৰগাঁও সমষ্টিত এইবেলি ইউ পি পি এল দলৰ প্ৰাৰ্থীয়ে বিজয় সাব্যস্ত কৰিব বুলি দাবী কৰে ৷
সমষ্টিটোত এইবাৰ ইউ পি পি এল দলৰ পৰা মহিলা প্ৰাৰ্থীয়ে প্ৰাৰ্থিত্ব পোৱাৰ সম্ভাৱনা আছে বুলি মন্তব্য কৰি প্ৰমোদ বড়োৱে কয়- ‘‘১৭ বছৰীয়া শাসনকালত হাগ্ৰামা মহিলাৰীয়ে নিজৰ গৃহ সমষ্টিতে একো উন্নয়নৰ কাম কৰা নাই । যি দুই-চাৰিটা ৰাস্তা-ঘাট নিজৰ মানুহৰ দ্বাৰা বনাইছিল সেয়াও জহি-খহি গৈছে ৷’’
প্ৰমোদ বড়োৱে লগতে কয়- ‘‘১৭ বছৰত হাগ্ৰামা মহিলাৰীয়ে ৭০০ টা প্ৰধানমন্ত্ৰী আৱাস যোজনাৰ ঘৰ নিৰ্মাণ কৰিছিল, কিন্তু ইউ পি পি এলে চাৰে চাৰি বছৰতে ছয় হাজাৰৰো অধিক প্ৰধানমন্ত্ৰী আৱাস যোজনাৰ ঘৰ নিৰ্মাণ কৰিবলৈ সক্ষম হৈছে । তদুপৰি স্বাধীনতাৰ ৭৫ বছৰ পিছতো সমাধান নোহোৱা মাটিৰ সমস্যা সমাধান কৰা হৈছে । ইউ পি পি এলৰ জন্মই হৈছে শান্তি-সম্প্ৰীতি, উন্নয়ন, ন্যায়, নিৰাপত্তা বাহাল ৰখাৰ বাবে আৰু এই ধাৰা অব্যাহত ৰাখিবলৈ ইউ পি পি এল বদ্ধপৰিকৰ ৷’’
হিংসামুক্ত, অস্ত্ৰমুক্ত আৰু বিকশিত বড়োলেণ্ড গঢ়াৰ লক্ষ্যত ইউ পি পি এল দল স্থিৰ বুলি প্ৰমোদ বড়োৱে মন্তব্য কৰি বড়োলেণ্ডখন ছিকিমৰ দৰে শান্তিপূৰ্ণ হৈ থকাৰ আশা প্ৰকাশ কৰে ।
উল্লেখ্য যে, বি টি চিৰ প্ৰাক্তন মুখ্য কাৰ্যবাহী সদস্য হাগ্ৰামা মহিলাৰীৰ গৃহ সমষ্টি দেৱৰগাঁও পৰিষদীয় সমষ্টিৰ পৰাই প্ৰমোদ বড়োৱে বজাই নিৰ্বাচনী ৰণডংকা । বৰ্তমানলৈকে বি টি চি নিৰ্বাচনৰ দিন ঘোষণা কৰা হোৱা নাই যদিও প্ৰায় প্ৰতিটো ৰাজনৈতিক দলে বি টি চিত নিৰ্বাচনী কুচকাৱাজ আৰম্ভ কৰিছে ।
এইক্ষেত্ৰত ইউ পি পি এল দল আগবাঢ়ি আছে আৰু ইতিমধ্যে বৃহৎ বৃহৎ সভা অনুষ্ঠিত কৰি একপ্ৰকাৰ চমক সৃষ্টি কৰিছে । ইপিনে বি টি আৰত নতুনকৈ গাঁও অন্তৰ্ভুক্তিকৰণ সন্দৰ্ভত প্ৰমোদ বড়োৱে সেয়া ঐতিহাসিক বি টি আৰ চুক্তিমৰ্মে হোৱা বুলি প্ৰকাশ কৰে ৷
লগতে পঢ়ক: বিধানসভা চাবলৈ আহিল গৌৰৱ গগৈ: সোণোৱালে ক’লে- কাম নহ’ব
