হায়দৰাবাদ : অহা ২৭ ফেব্ৰুৱাৰীত তেলেংগানাত অনুষ্ঠিত হ'ব বিধান পৰিষদৰ সদস্যৰ নিৰ্বাচন । যাক লৈ প্ৰতিটো দলৰ মাজত ব্যাপক ব্যস্ততা দেখা গৈছে । অৱশ্যে শাসকীয় কংগ্ৰেছৰ লগতে বিৰোধী বিজেপিয়েও প্ৰস্তুতি চলাইছে । তাৰ মাজতে বিজেপি নেতা এন ভি সুভাষে বৃহস্পতিবাৰে কয় যে বিজেপি দলটো আগন্তুক এমএলচি আৰু স্থানীয় সংস্থাৰ নিৰ্বাচনৰ বাবে প্ৰস্তুত আৰু আন ৰাজনৈতিক দলৰ তুলনাত বিজেপি এই দৌৰত আগত আছে । আগন্তুক এমএলচি নিৰ্বাচন সন্দৰ্ভত বিজেপি নেতা এন ভি সুভাষে কয়, "অধিসূচনা জাৰি কৰাৰ পূৰ্বেই আমি এমএলচি প্ৰাৰ্থীৰ নাম ঘোষণা কৰিছিলো । স্থানীয় সংস্থাৰ নিৰ্বাচনৰ বাবেও আমি সাজু হৈছোঁ । আমাৰ এক পৰ্যালোচনা সভাও অনুষ্ঠিত হৈ গৈছে । এইটোৱে দেখুৱায় যে আন ৰাজনৈতিক দলৰ তুলনাত বিজেপি হৈছে আগশাৰীৰ খেলুৱৈ ।"
আঁচনি ৰূপায়ণত ব্যৰ্থ তেলেংগানা চৰকাৰ
বিজেপি নেতাজনে তেলেংগানা চৰকাৰৰ প্ৰাক-নিৰ্বাচনী আঁচনিসমূহক অধিক সমালোচনা কৰে আৰু সেইবোৰক বিফল বুলি অভিহিত কৰে । তেওঁ তেলেংগানা বিধান সভাৰ অধ্যক্ষ গাদ্দাম প্ৰসাদ কুমাৰৰ মন্তব্যৰ কথা উল্লেখ কৰি কয় যে বিত্তীয় সীমাবদ্ধতাৰ বাবে এই আঁচনিসমূহ ৰূপায়ণ কৰাটো সম্ভৱ নহয় । এন ভি সুভাষে বিআৰএছ দলৰ বিৰুদ্ধে ৰাজ্যখনৰ বিত্তীয় সংকট বৃদ্ধি কৰাৰ অভিযোগো উত্থাপন কৰে আৰু দাবী কৰে যে কংগ্ৰেছে ক্ষমতা দখল কৰাৰ পিছৰে পৰা হিতাধিকাৰীসকল বঞ্চিত হৈছে ।
তেওঁ কয়, "ক্ষমতালৈ অহাৰ পূৰ্বে তেলেংগানা চৰকাৰে ঘোষণা কৰা আঁচনিসমূহৰ ৰূপায়ণত সম্পূৰ্ণৰূপে বিফল হৈছে । তেলেংগানা বিধানসভাৰ অধ্যক্ষ গদ্দাম প্ৰসাদ কুমাৰে অতি স্পষ্টকৈ কৈছে যে এই আঁচনিসমূহ কাৰ্যকৰী কৰাটো সম্ভৱ নহয় । আমি সঁচাকৈয়ে ৰাজ্যখনৰ বাজেট আৰু বিত্তীয় সীমাবদ্ধতাৰ প্ৰতি লক্ষ্য ৰাখি হোমৱৰ্ক কৰা উচিত আছিল কিয়নো বিআৰএছ দলে তেলেংগানাৰ বিত্তীয় সংকটত এক ডাঙৰ দাগ পেলাইছিল ।"
তেওঁ লগতে কয়, "যিহেতু কংগ্ৰেছ শাসনলৈ আহিছে, তেওঁলোকে হিতাধিকাৰীসকলক আঁতৰোৱাৰ এক প্ৰকাৰৰ অজুহাত বিচাৰি পাইছে । এইটো অতি স্পষ্ট যে অধ্যক্ষ গাদ্দাম প্ৰসাদে কৈছে যে এইবোৰে কংগ্ৰেছ দলৰ বিত্তীয় প্ৰভাৱ আৰু বিফলতা প্ৰদৰ্শন কৰে ।"
এমএলচি নিৰ্বাচন
উল্লেখ্য যে ভাৰতীয় নিৰ্বাচন আয়োগে ২৭ ফেব্ৰুৱাৰীত তেলেংগানা আৰু অন্ধ্ৰপ্ৰদেশত পুৱা ৮ বজাৰ পৰা আবেলি ৪ বজালৈ এমএলচি নিৰ্বাচন অনুষ্ঠিত কৰাৰ সিদ্ধান্ত লৈছে । আনহাতে ভোটগণনা ৩ মাৰ্চত অনুষ্ঠিত হ'ব । মনোনয়ন দাখিলৰ অন্তিম তাৰিখ হৈছে ১০ ফেব্ৰুৱাৰী । আনহাতে মনোনয়ন প্ৰত্যাহাৰৰ অন্তিম তাৰিখ হৈছে ১৩ ফেব্ৰুৱাৰী ।
