ডিব্ৰুগড়: পঞ্চায়ত নিৰ্বাচনক লৈ ৰাজ্যত ব্যাপক উচাহ আৰম্ভ হৈছে ৰাজনৈতিক দলৰ নেতাৰ-কৰ্মীসকলৰ মাজত । ৰাজ্যৰ বিভিন্ন জিলাৰ দৰে ডিব্ৰুগড় জিলাতো উৎসৱমুখৰ পৰিৱেশ । ডিব্ৰুগড় জিলাৰ প্ৰতিটো সমষ্টিত মন্ত্ৰী-বিধায়কসকলে মিত্ৰজোঁটৰ প্ৰাৰ্থীসকলক মনোনয়ন পত্ৰ দাখিলত সহযোগিতা আগবঢ়াইছে । ইয়াৰ বিপৰীতে ডিব্ৰুগড় জিলাৰ প্ৰতিটো সমষ্টিত বিৰোধী দলসমূহৰ মাজত বিশেষ উৎসাহৰ পৰিৱেশ পৰিলক্ষিত হোৱা নাই ।
দলীয় কৰ্মী-সমৰ্থকৰ বিশাল ৰেলীৰে পঞ্চায়ত নিৰ্বাচনৰ মনোনয়ন পত্ৰ দাখিলৰ অন্তিম দিনা মৰাণত শক্তি প্ৰদৰ্শন কৰিলে শাসকীয় বিজেপি মিত্ৰজোঁটে । মন্ত্ৰী বিমল বড়াৰ নেতৃত্বত টিংখাং সমষ্টিৰ অন্তৰ্গত মৰাণ মণ্ডলৰ ৬ টা আৰু লেঙেৰী মণ্ডলৰ ২ টা গাঁও পঞ্চায়তৰ বিজেপি আৰু মিত্ৰদলৰ প্ৰাৰ্থীসকলে শুকুৰবাৰে মৰাণৰ তিলৈনগৰস্থিত খোৱাং উন্নয়ন খণ্ডৰ কাৰ্যালয়ত মনোনয়ন পত্ৰ দাখিল কৰে ।
ইয়াৰ পূৰ্ৱে তিলৈনগৰ গ্ৰাম্য বজাৰ প্ৰেক্ষাগৃহত সহস্ৰাধিক দলীয় কৰ্মীৰ উপস্থিতিত মন্ত্ৰী বিমল বড়া আৰু ডিব্ৰুগড় জিলা বিজেপিৰ সভাপতি দুলাল বড়াই দলীয় প্ৰাৰ্থীসকলক শুভেচ্ছা জ্ঞাপন কৰে । তাৰ পাছতে কেইবাহাজাৰ দলীয় কৰ্মী-সমৰ্থকৰ সৈতে সমদল কৰি আহি খোৱাং উন্নয়ন খণ্ডৰ কাৰ্যালয়ত মনোনয়ন দাখিল কৰে প্ৰাৰ্থীসকলে । সমদলত অংশগ্ৰহণ কৰি মন্ত্ৰী বিমল বড়াই সমষ্টিৰ আটাইকেইটা পঞ্চায়ত, আঞ্চলিক পঞ্চায়ত আৰু জিলা পৰিষদ বিজেপি আৰু মিত্ৰদল অগপই দখল কৰিব বুলি দাবী কৰে । আনহাতে জিলা বিজেপিৰ সভাপতি দুলাল বড়াই ডিব্ৰুগড় জিলাখনত পঞ্চায়ত নিৰ্বাচনত বিৰোধী শূন্য হ'ব বুলি দাবী কৰে ।
অগপৰ বিধায়ক পোনাকণ বৰুৱাৰ নেতৃত্বত মনোনয়ন দাখিল:
ডিব্ৰুগড় জিলাৰ নৱ-গঠিত চাবুৱা-লাহোৱাল সমষ্টিত অসম গণ পৰিষদ আৰু বিজেপিয়ে মিত্ৰতাৰে পঞ্চায়ত নিৰ্বাচন খেলাৰ সিদ্ধান্ত চূড়ান্ত কৰিছে । ইয়াৰে দুখন জিলা পৰিষদৰ বাবে বিধায়ক পোনাকণ বৰুৱাৰ নেতৃত্বত প্ৰাৰ্থীসকলে মনোনয়ন দাখিল কৰে । সমষ্টিটোৰ চাৰিখন জিলা পৰিষদৰ দুখন আসনত বিজেপিয়ে আৰু দুখন আসনত অগপই প্ৰতিদ্বন্দিতা কৰিব । সেয়ে শুকুৰবাৰে অগপৰ বিধায়কগৰাকীৰ নেতৃত্বত দিনজয় আৰু মদাৰখাট জিলা পৰিষদত অগপৰ প্ৰাৰ্থীসকলে দাখিল কৰে মনোনয়ন ।
বিধায়ক চক্ৰধৰ গগৈৰ নেতৃত্বত খোৱাঙত মনোনয়ন দাখিল:
খোৱাং সমজিলা আয়ুক্তৰ কাৰ্যালয়ত বিধায়ক চক্ৰধৰ গগৈৰ নেতৃত্বত দুগৰাকী বিজেপি প্ৰাৰ্থীয়ে শুকুৰবাৰে মনোনয়ন দাখিল কৰে । লৰুৱা মৌজাৰ প্ৰাৰ্থী দুগৰাকীয়ে শতাধিক লোকক লগত লৈ ঢোলে-দগৰে দাখিল কৰে মনোনয়ন । মনোনয়ন দাখিল কৰি দুই প্ৰাৰ্থীয়ে উন্নয়নৰ বাৰ্তা লৈ ৰাইজৰ ওচৰলৈ যোৱাৰ পোষকতা কৰে ।
