গুৱাহাটী: ব'হাগ বিহুৰ মাজতেই পঞ্চায়ত নিৰ্বাচন অনুষ্ঠিত হোৱাৰ কথাই বিশেষ চৰ্চা লাভ কৰি থকাৰ মাজতে অসম ৰাজ্যিক নিৰ্বাচন আয়োগে বুধবাৰে ঘোষণা কৰে পঞ্চায়ত নিৰ্বাচনৰ অধিসূচনা । বিহুৰ পিছতেই অনুষ্ঠিত হ'ব পঞ্চায়ত নিৰ্বাচন । বুধবাৰৰ বিয়লিৰ পৰা ৰাজ্যত জাৰি কৰা হৈছে পঞ্চায়ত নিৰ্বাচনৰ অধিসূচনা । অসমত দুটা পৰ্যায়ত হ'ব পঞ্চায়ত নিৰ্বাচন ।
উজনি অসম, বৰাক উপত্যকা আৰু নামনি অসমত দুটা পৰ্যায়ত অনুষ্ঠিত হ'ব পঞ্চায়ত নিৰ্বাচন । উজনি অসম বৰাক উপত্যকাত ২ মে'ত আৰু নামনি অসমত ৭ মে' ত পঞ্চায়ত নিবাচনৰ ভোটদান অনুষ্ঠিত হ'ব । অহা ১১ মে'ত ভোট গণনা অনুষ্ঠিত হ'ব ।
বুধবাৰে গুৱাহাটীত সংবাদমেল সম্বোধন কৰি অসম ৰাজ্যিক নিৰ্বাচন আয়ুক্ত আলোক কুমাৰে পঞ্চায়ত নিৰ্বাচনৰ দিন ঘোষণা কৰি কয়,"পঞ্চায়ত নিৰ্বাচনৰ বাবে অসম ৰাজ্যিক নিৰ্বাচনী বিভাগে সকলো প্ৰস্তুতি গ্ৰহণ কৰিছে । ২ মে'ত তিনিচুকীয়া, ডিব্ৰুগড়, চৰাইদেউ, শিৱসাগৰ, মাজুলী, যোৰহাট, গোলাঘাট, ধেমাজি, লখিমপুৰ, শোণিতপুৰ, বিশ্বনাথ, কাছাৰ , হাইলাকান্দি, শ্ৰীভূমিত প্ৰথম পৰ্যায়ত পঞ্চায়ত নিৰ্বাচন অনুষ্ঠিত হ'ব ।"
তেওঁ লগতে কয়, "আকৌ ৭ মে'ত ধুবুৰী, দক্ষিণ শালমাৰা, মানকাছাৰ, গোৱালপাৰা, বঙাইগাঁও, বৰপেটা, বজালি, নলবাৰী, কামৰূপ, কামৰূপ মহানগৰ, হোজাই, নগাঁও, মৰিগাঁও, দৰং জিলাত দ্বিতীয় পৰ্যায়ত পঞ্চায়ত নিৰ্বাচন অনুষ্ঠিত হ'ব ।"
১,৮০,৩৬,৬৮২ গৰাকী ভোটাৰে ভোটদান কৰিব :
ৰাজ্যিক নিৰ্বাচন আয়ুক্তগৰাকীয়ে জনাই যে এইবাৰ পঞ্চায়ত নিৰ্বাচনত ১,৮০,৩৬,৬৮২ গৰাকী ভোটাৰে ভোটদান কৰিব । ইয়াৰে ৯০,৭১,২৬৪ গৰাকী পুৰুষ, ৮৯,৬৫,০১০ গৰাকী মহিলা আৰু ৪০৮ গৰাকী তৃতীয় লিংগৰ ভোটাৰ । উল্লেখ যে ২০১৮ চনত পঞ্চায়ত নিৰ্বাচনত মুঠ ভোটাৰ আছিল ১,৫৬,৪১,৪৫৬ গৰাকী । এইবাৰ পূৰ্বৰ তুলনাত ১৩.২৭ শতাংশ ভোটাৰ বৃদ্ধি পাইছে ।
কিহৰ ভিত্তিত প্ৰস্তুত কৰা হৈছে ভোটাৰ তালিকা:
আলোক কুমাৰে কয়, "যোৱা এক জানুৱাৰীলৈ আবেদন কৰাৰ ভিত্তিত এই ভোটাৰ তালিকা প্ৰস্তুত কৰা হৈছে । প্ৰাৰ্থীয়ে মনোয়ন দাখিল কৰাৰ শেষ তাৰিখলৈকে ভোটাৰ তালিকা উন্নীত কৰা হ'ব । এইবাৰ ভোটাৰ তালিকা অনলাইনত ৰাজহুৱাকৈ চাব পৰা ব্যৱস্থা কৰা হৈছে । ১৭ এপিলত প্ৰাৰ্থীৰ তালিকা চূড়ান্ত হ'ব । দুয়োটা পৰ্যায়তে মনোনয়ন দাখিলৰ দিন কাইলৈৰ পৰা আৰম্ভ হ'ব । মনোনয়ন দাখিলৰ অন্তিম দিন ১১ এপ্ৰিল কৰা হৈছে । ১২ এপ্ৰিলত প্ৰাৰ্থীৰ তালিকা প্ৰকাশ কৰা হ'ব । ১৭ এপ্ৰিললৈকে মনোনয়ন প্ৰত্যাহাৰ কৰিব পাৰিব ।"
তেওঁ লগতে কয়, "তাৰপিছত ১৭ এপ্ৰিলতে প্ৰতিদ্বন্দ্বিতা কৰিব বিচৰা প্ৰাৰ্থীৰ তালিকা প্ৰকাশ কৰা হ'ব । এইবাৰ গাঁও পঞ্চায়তৰ সদস্যৰ ২১,৯২০ টা পদত, গাঁও পঞ্চায়তৰ সভাপতিৰ ২,১৯২ টা পদত, গাঁও পঞ্চায়তৰ উপ-সভাপতিৰ ২,১৯২ টা পদত, আঞ্চলিক পঞ্চায়তৰ সদস্যৰ ২,১৯২ পদত, আঞ্চলিক পঞ্চায়তৰ সভাপতি আৰু উপ-সভাপতিৰ ক্ৰমে ১৮১ পদত আৰু জিলা পৰিষদৰ সদস্যৰ ৩৯৭ পদত নিৰ্বাচন অনুষ্ঠিত হ'ব । ইপিনে ২৫,০০৭ টা ভোটগ্ৰহণ কেন্দ্ৰত ভোটদান অনুষ্ঠিত হ'ব । এইবাৰ পূৰ্বৰ তুলনাত ৬ শতাংশ ভোটগ্ৰহণ কেন্দ্ৰ বৃদ্ধি পাইছে ।"
বেলটযোগে অনুষ্ঠিত হ'ব পঞ্চায়ত নিৰ্বাচন:
সংবাদমেলত আলোক কুমাৰে কয়, "এইবাৰ পঞ্চায়ত নিবাচনৰ ভোটগ্ৰহণ বেলটযোগে অনুষ্ঠিত হ'ব । কাৰণ পঞ্চায়ত নিবাচনৰ বাবে পৰ্যাপ্ত ই ভি এম পোৱা নাযাব । গাঁও পঞ্চায়তৰ সদস্যৰ পদত, গাঁও পঞ্চায়তৰ সভাপতিৰ পদত, গাঁও পঞ্চায়তৰ উপ-সভাপতিৰ পদত ৰাজনৈতিক দলৰ নাম আৰু প্ৰতীক লৈ নিৰ্বাচন খেলিব নোৱাৰিব । গাঁও পঞ্চায়ত পৰ্যায়ত নিবাচন মুকলি হ'ব । কিন্তু আঞ্চলিক পঞ্চায়তৰ সদস্যৰ, আঞ্চলিক পঞ্চায়তৰ সভাপতি আৰু উপ-সভাপতিৰ আৰু জিলা পৰিষদৰ সদস্যৰ দলৰ নাম আৰু প্ৰতীক লৈ নিৰ্বাচন খেলিব পাৰিব । দুটাতকৈ অধিক সন্তান থকাসকলে পঞ্চায়ত নিৰ্বাচনত প্ৰতিদ্বন্দ্বিতা কৰিব নোৱাৰিব ৷"
ইয়াৰোপৰি অসম ৰাজ্যিক নিৰ্বাচন আয়ুক্তগৰাকীয়ে কয়, "এইবাৰ আই টি প্ৰযুক্তিৰ সহায় লৈছো । ডিজিটেল অনলাইন ইলেক্ট্ৰৰেল ৰোল কৰিছো । ভোটাৰ তালিকা অনলাইন কৰা হৈছে । ১০ লাখে এতিয়ালৈকে চাইছে । এইবাৰ Election management commission গঠন কৰিছো । গাঁও পঞ্চায়তৰ বাহিৰে সকলো প্ৰাৰ্থীৰ সবিশেষ অনলাইনত চাব পাৰিব । জিলা পৰ্যায়ত অভিযোগ দিয়াৰ বাবে টোল ফ্ৰী নম্বৰ দিয়া হ'ব । অসমত ৮৮ গৰাকী পৰ্যবেক্ষক নিয়োগ কৰা হৈছে ।"
