কংগ্ৰেছত অব্যাহত খহনীয়া, কেবাজনো নেতাই এৰিছে দল - Assam congress leaders join BJP
Assam congress leaders join BJP : মঙলবাৰে কংগ্রেছ এৰি গেৰুৱা বসন পৰিধান কৰিলে সহস্রাধিক কংগ্রেছ নেতা-কৰ্মীয়ে । গৌৰৱ গগৈৰ ঘনিষ্ঠ মাজুলীৰ জ্যেষ্ঠ কংগ্ৰেছ নেতা শংকৰজ্যোতি হাজৰিকায়ো ত্যাগ কৰিলে কংগ্ৰেছ ৷ বিজেপিত যোগদানৰ সম্ভাৱনা ৷
Published : April 9, 2024 at 2:27 PM IST
মাজুলী/লখিমপুৰ, 9 এপ্রিল : নিৰ্বাচনৰ প্ৰাকক্ষণত কংগ্রেছত মোক্ষম আঘাত । লখিমপুৰত দুই দলীয় বিষয়ববীয়াসহ সহস্রাধিক কংগ্রেছ কৰ্মীয়ে পিন্ধিলে গেৰুৱা বসন । সমাগত লোকসভা নিৰ্বাচনৰ প্ৰথম পৰ্যায়ৰ ভোটগ্ৰহণৰ বাবে মাজত মাথো 9 দিন বাকী । শাসক-বিৰোধী সকলোৱে তুংগত কৰি তুলিছে দলীয় প্ৰচাৰ ৷
এনে প্ৰস্তুতি অব্যাহত থকাৰ সময়তে লখিমপুৰ তথা অসম প্ৰদেশ কংগ্রেছ দল সন্মুখীন হৈছে এক মোক্ষম আঘাতৰ । মংগলবাৰৰ দুপৰীয়া প্ৰদেশ কংগ্রেছৰ সাধাৰণ সম্পাদক পদ্মলোচন দলে, মহিম হাজৰিকাৰ নেতৃত্বত সহস্রাধিক কংগ্রেছ নেতা-কৰ্মীয়ে বিজেপি দলত যোগদান কৰে । বিজেপিৰ জিলা কাৰ্যালয়ত আটাইকেইজনে গেৰুৱা বসন পৰিধান কৰে ।
মন্ত্রী ৰণোজ পেগু, বিজেপিৰ লখিমপুৰ সমষ্টিৰ প্ৰাৰ্থী প্ৰদান বৰুৱা, জিলা বিজেপিৰ সভাপতি ফণীধৰ বৰুৱাৰ উপস্থিতিত কংগ্রেছৰ নেতা-কৰ্মীসকলে বিজেপিত যোগদান কৰে । নৱাগতসকলক আদৰণি জনাই মন্ত্রী ৰণোজ পেগু, প্ৰদান বৰুৱা আদি বিজেপিৰ শীৰ্ষ নেতাসকলে কংগ্রেছ কৰ্মীৰ আগমনে বিজেপিক অধিক শক্তিশালী কৰা বুলি কয় ।
বিজেপিৰ শীৰ্ষ নেতাসকলে দলত্যাগী পদ্মলোচন দলে, মহিম হাজৰিকা আদিয়ে কংগ্রেছ দলৰ ভিতৰচ’ৰাৰ বেমেজালিত অতিষ্ঠ হৈ দল এৰিবলৈ বাধ্য হোৱা বুলি তেওঁলোকে কয় । সমান্তৰালভাৱে অসম বিজেপিৰ শীৰ্ষ নেতৃত্বই প্ৰদেশ কংগ্রেছৰ সভাপতি ভূপেন বৰাকো সমালোচনা কৰে । নিৰ্বাচনৰ প্ৰাকক্ষণত কংগ্রেছ দলৰ বাবে এয়া এক চৰম ক্ষতি বুলি বিবেচিত হৈছে ।
উল্লেখ কৰা প্ৰয়োজন যে মংগলবাৰৰ দুপৰীয়া দুই বজাৰ পৰা লখিমপুৰৰ চুকুলীভৰীয়াত গৃহমন্ত্ৰী অমিত শ্বাহৰ উপস্থিতিত বিজেপিৰ এখন বিশাল নিৰ্বাচনী প্ৰচাৰ সভা অনুষ্ঠিত হ’ব । এই সভা অনুষ্ঠিত হোৱাৰ পূৰ্বে বিজেপিৰ জিলা কাৰ্যালয়ত এই বৃহৎ যোগদান কাৰ্যসূচী সম্পন্ন হয় । আনহাতে, মাজুলীৰ জ্যেষ্ঠ কংগ্ৰেছ নেতা শংকৰজ্যোতি হাজৰিকাই ত্যাগ কৰিলে কংগ্ৰেছ ।
আজি বিজেপিত যোগদান কৰাৰ সম্ভাৱনা হাজৰিকাৰ ৷ গৌৰৱ গগৈৰ ঘনিষ্ঠ আছিল এইজন প্ৰাক্তন কংগ্ৰেছ নেতা ৷ দুদিনমান পূৰ্বে গৌৰৱ গগৈ মাজুলীলৈ আহিবৰ সময়ত গৌৰৱ গগৈক সংগ দিয়াৰ লগতে গৌৰৱ গগৈৰ হৈ প্রচাৰ চলাইছিল শংকৰজ্যোতি হাজৰিকাই ।
দুপৰীয়া বনগাঁৱত মন্ত্ৰী পীযুষ হাজৰীকাৰ উপস্থিতিত এখন সভাত দলটোত হাজৰিকাই যোগদান কৰিব বুলি জানিব পৰা গৈছে । এইগৰাকী নেতাৰ লগতে বহু পুৰণি কংগ্ৰেছ কৰ্মীয়ে আজি বিজেপি দলত যোগদানৰ সম্ভাৱনা আছে । নিৰ্বাচনৰ প্ৰাকক্ষণত আৰু অমিত শ্বাহৰ নিৰ্বাচনী প্ৰচাৰ সভাৰ আগমুহূর্তত বিজেপিত যোগদান আৰু কংগ্রেছত খহনীয়া হোৱা এই ঘটনাই বিশেষ তাৎপর্য বহন কৰিছে ।
লগতে পঢ়ক: মানস বৰাৰ কংগ্ৰেছ ত্যাগ প্ৰসংগত বিমল বড়াৰ প্ৰতিক্ৰিয়া - Assam Congress Leader Joins BJP
