কোনে কি ভাও ল’বা আহা সময় যে তাকৰ...মন্ত্ৰিত্ব লাভৰ আনন্দত গীত জুৰিলে প্ৰশান্ত ফুকনে

মৰাণ: বহু চৰ্চাৰ অন্তত ৭ ডিচেম্বৰত দিনৰ ১২ বজাত অসম চৰকাৰৰ মন্ত্ৰীসভাৰ চাৰিগৰাকী নতুন মন্ত্ৰীয়ে শপত ল’ব বুলি ঘোষণা কৰিছে মুখ্যমন্ত্ৰী হিমন্ত বিশ্ব শৰ্মাই । কোন কোন বিধায়কে মন্ত্ৰীসভাত স্থান লাভ কৰিব সেই কথাও ঘোষণা কৰিলে মুখ্যমন্ত্ৰীয়ে । হিমন্ত বিশ্ব শৰ্মাৰ মন্ত্ৰীসভাত অন্তৰ্ভুক্ত হ’ব ৪ বিধায়ক ৷ সামাজিক মাধ্যমত মুখ্যমন্ত্ৰী হিমন্ত বিশ্ব শৰ্মাই সদৰী কৰিলে ৪ জন নতুন মন্ত্ৰীৰ নাম । এইবাৰ মুখ্যমন্ত্ৰী হিমন্ত বিশ্ব শৰ্মাৰ মন্ত্ৰীসভাত মন্ত্ৰিত্ব লাভ কৰিব বিজেপিৰ জ্যেষ্ঠ বিধায়ক প্ৰশান্ত ফুকনৰ লগতে ডুমডুমাৰ বিধায়ক ৰূপেশ গোৱালা, পাথাৰকান্দিৰ বিধায়ক কৃষ্ণেন্দু পাল আৰু লক্ষীপুৰৰ বিধায়ক কৌশিক ৰায়ে ।

২০০৬ চনৰ পৰা একেৰাহে চাৰিবাৰ ডিব্ৰুগড় সমষ্টিৰ বিধায়ক হিচাপে অসম বিধানসভালৈ নিৰ্বাচিত হৈ আহিছে বিধায়ক প্ৰশান্ত ফুকন । উজনিৰ অতি শক্তিশালী বিজেপি নেতা প্ৰশান্ত ফুকনে বিগত কংগ্ৰেছ চৰকাৰৰ দিনত বিজেপিৰ হৈ কংগ্ৰেছ চৰকাৰৰ কাম-কাজক কঠোৰ ভাষাৰে সমালোচনা কৰিছিল । বিধায়কগৰাকীক পূৰ্বৰ সৰ্বানন্দ সোণোৱাল চৰকাৰৰ দিনতেই মন্ত্ৰিত্ব দিবলৈ ডিব্ৰুগড়ৰ ৰাইজে দাবী জনাই আহিছিল । কিন্তু তেতিয়া মন্ত্ৰিত্ব লাভ নকৰিলেও অৱশেষত ভাল খবৰ লাভ কৰিলে ডিব্ৰুগড় সমষ্টিৰ বিধায়কগৰাকীৰ লগতে ৰাইজে ।

আজি সামাজিক মাধ্যমত মুখ্যমন্ত্ৰী হিমন্ত শৰ্মাই মন্ত্ৰীসভাত অন্তৰ্ভুক্ত হ'বলগা বিধায়কৰ নাম ঘোষণা কৰা পাছতেই ডিব্ৰুগড়ৰ বিধায়ক প্ৰশান্ত ফুকনৰ বাসগৃহত দলীয় কৰ্মীয়ে আনন্দ-উল্লাস কৰা পৰিলক্ষিত হয় ।

ডিব্ৰুগড়ত আবতৰীয়া দেৱালী পাতিলে বিজেপি কৰ্মীসকলে:

২০০৬ চনৰ পৰা একেৰাহে চাৰিবাৰ ডিব্ৰুগড় সমষ্টিৰ বিধায়ক হিচাপে অসম বিধানসভালৈ নিৰ্বাচিত হোৱা বিধায়ক প্ৰশান্ত ফুকনক মুখ্যমন্ত্ৰী হিমন্ত বিশ্ব শৰ্মাই নিজৰ মন্ত্ৰীসভাত অৰ্ন্তভুক্ত কৰাৰ খবৰত উৎফুল্লিত হৈছে বিধায়কগৰাকীৰ সমৰ্থকসকল । দলীয় কৰ্মী-সমৰ্থকসকলে বিধায়কগৰাকীক গামোচা পিন্ধাই ফটকা ফুটাই আৱতৰীয়া দেৱালী উদযাপন কৰে ।

মুখ্যমন্ত্ৰীক ধন্যবাদ জনালে প্ৰশান্ত ফুকনে:

সাংবাদিকৰ আগত বিধায়কগৰাকীয়ে কয়, ‘‘মুখ্যমন্ত্ৰীক বহুত বহুত ধন্যবাদ জ্ঞাপন কৰিছো । ক্ৰমাগতভাৱে ২০ বছৰ বিধায়ক হিচাপে থাকি মই যিখিনি কাম কৰিছো, সেইখিনি আগত ৰাখি মুখ্যমন্ত্ৰীয়ে যি দায়িত্ব দিব তাক চলাই যোৱাৰ বাবে মই প্ৰয়াস কৰিম । পূৰ্বে যিদৰে ডিব্ৰুগড়ৰ ৰাইজক সময় দিছিলো তেনেকৈয়ে দিবলৈ চেষ্টা কৰিম । ডিব্ৰুগড়ৰ ৰাইজ মোৰ বাবে ভগৱান । সেয়ে ভগৱানক পূজা কৰাত মই কেতিয়াও হেমাহী নকৰো । মুখ্যমন্ত্ৰীয়ে যি বিভাগৰ দায়িত্ব দিব তাকে নিষ্ঠাৰে পালন কৰিবলৈ চেষ্টা কৰি মুখ্যমন্ত্ৰীৰ কেবিনেট সতীৰ্থ হিচাপে তেওঁক সহযোগিতা কৰি যাম । আজি ডিব্ৰুগড়ৰ ৰাইজৰ বাবে এটা ডাঙৰ কথা, বিগত ৪০ বছৰে ডিব্ৰুগড় সমষ্টিৰ পৰা কোনো বিধায়কে মন্ত্ৰিত্ব পোৱা নাছিল । কিন্তু মুখ্যমন্ত্ৰীয়ে ৪০ বছৰীয়া বান্ধোন ছিঙি মোক মন্ত্ৰিত্ব দিয়াত তেওঁক ধন্যবাদ জনাইছো । মুখ্যমন্ত্ৰীয়ে যি বিভাগতে কাম কৰিবলৈ দিব মই তাতে কাম কৰি যাম ।’’

লগতে পঢ়ক: সঞ্জয় কিষাণৰ পদত্যাগ; নতুনকৈ মন্ত্ৰী হ’ব প্ৰশান্ত ফুকন, ৰূপেশ গোৱালা, কৃষ্ণেন্দু পাল, কৌশিক ৰায়