এইবাৰ অপহৰণৰ ষ্টাইলত গ্ৰেপ্তাৰ ৰিতম সিঙক

মৰিগাঁৱৰ সাংবাদিক কিশোৰ ডেকাৰাজাৰ প্ৰতিবেদন : পুনৰ গ্ৰেপ্তাৰ কংগ্ৰেছ নেতা ৰিতম সিঙক । মৰিগাঁও আৰক্ষীয়ে কৰা গ্ৰেপ্তাৰত জামিন লাভৰ পিছত পুনৰ গ্ৰেপ্তাৰ জাগীৰোড আৰক্ষীৰ ।

মৰিগাঁও আৰক্ষীৰ গোচৰত শনিবাৰে জামিন লাভৰ পাছত পুনৰ জাগীৰোড আৰক্ষীয়ে গ্ৰেপ্তাৰ কৰি অপহৰণকাৰীৰ দৰে জে'লৰ সন্মুখৰ পৰাই উঠাই নিয়ে ৰিতম সিঙক । উল্লেখ্য যে লখিমপুৰৰ পৰা মৰিগাঁও আৰক্ষীয়ে ৩ এপ্ৰিলত গ্ৰেপ্তাৰ কৰা কৰা কংগ্ৰেছৰ মুখপাত্ৰ ৰিতম সিঙে শুকুৰবাৰে জামিন লাভ কৰিছিল । কিন্তু জামিনৰ আদেশ পাওঁতে নিশা হৈ যোৱাৰ বাবে জে'লৰ পৰা মুকলি আকাশৰ তললৈ আহিব পৰা নাছিল ৰিতম সিং ।

কিন্তু শনিবাৰে ৰিতম সিঙৰ পিতৃ-মাতৃয়ে তেওঁক লৈ জে'লৰ পৰা ওলাব ধৰোঁতেই পূৰ্বৰ পৰা জে'লৰ গে'টত সষ্টম হৈ থকা জাগীৰোড আৰক্ষীয়ে পুনৰ গে'টৰ মুখতে গ্ৰেপ্তাৰ কৰে ৰিতম সিঙক । ইফালে এই ঘটনাত ৰিতমৰ পিতৃ-মাতৃৰ আৰক্ষীৰ সৈতে জে'লৰ সন্মুখতে টনা-আঁজোৰা লাগে ।

গ্ৰেপ্তাৰৰ সময়ত আৰক্ষীৰে টনা-আঁজোৰা (ETV Bharat Assam)

অৱশেষত চিনেমাৰ কায়দাৰে অসামৰিক পোছাকত ৰৈ থকা আৰক্ষী বাহিনীয়ে অপহৰণ কৰাৰ দৰে ৰিতম সিঙক লৈ যায় । আনহাতে, আৰক্ষীৰ গাড়ীত উঠোৱাৰ সময়ত ৰিতম সিঙে চিঞৰি চিঞৰি কিবা কয় যদিও সেই কথা কোনেও নুশুনিলে । অৱশেষত বিবুধিত পৰি আৰক্ষীৰ গাড়ীৰ সন্মুখতে মাটিত চিট হৈ পৰি ৰিতমৰ পিতৃয়ে বাধা দিয়াৰ চেষ্টা কৰে । কিন্তু তেওঁক গাড়ীৰ সন্মুখৰ পৰা দাঙি আঁতৰাই পিতৃ-মাতৃৰ বুকুৰ মাজৰ পৰা আৰক্ষীয়ে পুনৰ অপহৰণকাৰীৰ দৰে লৈ যায় ৰিতম সিঙক ।

ইফালে ৰিতম সিঙক পুনৰ গ্ৰেপ্তাৰ সন্দৰ্ভত তেওঁৰ পিতৃয়ে কয়, "এটা কেছত উলিওৱাৰ পিছত সিহঁতে নজনোৱাকৈ লৈ গৈছে । এইটোৱে নেকি আইন । পাব্লিকে কি কৰিব । তিনিটা কেছত কালি বেইল হৈছে । কালি উলিয়াব দিয়া নাই । ৰাতি কৈছে আজি লৈ আনক কাগজখন, পুৱা ৮ টা বজাত লৈ যাব । কাগজ আমি আনিলোঁ । তাৰ পিছত এতিয়া এই অৱস্থা ।"

পথৰ মাজত বহি পিতৃৰ প্ৰতিবাদ (ETV Bharat Assam)

আনহাতে, অসহায় মাতৃয়ে সংবাদ মাধ্যমৰ আগত কয়, "এইটো ইলিগেলী কৰি আছে । আমাৰ ল'ৰাক এটাৰ পিছত এটা কেছ বনাই এৰেষ্ট কৰি আছে । আমি অৰ্ডাৰ আনো, ৰিলিজ কৰাওঁ, হাইকোৰ্টে ৰিলিজ কৰে আকৌ তেওঁলোকে বেলেগ ছেকচনত ভৰাই দিয়ে । এইটো ইলিগেল, পলিটিকেল ৰিভেঞ্জ । তেওঁলোকে ভয় খাইছে আকৌ যদি সি কিবা লিখে সেই কাৰণে । এনেকুৱা চিটুৱেচনত আপুনি নিজে ভাবক । আপুনি ইমান ডাঙৰ চৰকাৰ চলাই আছে, এটা ল'ৰাই লিখাত কিয় ভয় কৰিছে ।"

আৰক্ষীৰ বাহনৰ সন্মুখত পথতে শুই দিয়া অৱস্থাত ৰিতম সিঙৰ পিতৃ (ETV Bharat Assam)

উল্লেখ্য যে ৰিতম সিঙক পুনৰ এনেদৰে গ্ৰেপ্তাৰ কৰা সন্দৰ্ভত বৰ্তমানলৈ মুখ খোলা নাই আৰক্ষীয়ে । কি কাৰণত বাবে বাৰে ৰিতমক আৰক্ষীয়ে নতুন নতুন গোছৰ জাপি দি গ্ৰেপ্তাৰ কৰিছে সেয়াও ৰহস্যৰ আৱৰ্তত।