ভূপেন বৰাই ডাঙৰ সিদ্ধান্ত লৈছিল: কি সিদ্ধান্তৰ কথা ক'লে গৌৰৱ গগৈয়ে
বিৰোধী ঐক্যৰ মিত্ৰতা হ'লেও এ আই ইউ ডি এফৰ সৈতে নকৰাৰ ইংগিত গৌৰৱ গগৈৰ । এই মিত্ৰতাৰ বিৰোধিতাক ভূপেন বৰাৰ সফলতা আখ্যা গৌৰৱ গগৈৰ ।
Published : June 2, 2025 at 9:03 PM IST
নগাঁও : ৰাজ্যত বিজেপিক উৎখাত কৰিবলৈ বিৰোধী ঐক্যৰ প্ৰয়োজনীয়তাৰ প্ৰসংগত বিভিন্ন মহলত আলোচনা চলি থকাৰ সমান্তৰালকৈ বিৰোধী ঐক্যত স্থান দখল কৰিবলৈ এ আই ইউ ডি এফেও বিভিন্ন সময়ত চেষ্টা অব্যাহত ৰাখিছে । এ আই ইউ ডি এফক বাদ বিৰোধী ঐক্য সফল নহ’ব বুলি এ আই ইউ ডি এফৰ প্ৰধান বদৰুদ্দিন আজমলে প্ৰায়েই মন্তব্য কৰি আহিছে যদিও শেহতীয়াকৈ অসম প্ৰদেশ কংগ্ৰেছৰ নৱনিযুক্ত সভাপতি গৌৰৱ গগৈৰ নেতৃত্বত এ আই ইউ ডি এফক মিত্ৰতাত গ্ৰহণ নকৰাৰে স্পষ্ট ইংগিত দিলে গৌৰৱ গগৈয়ে ।
২০২১ চনৰ বিধানসভা নিৰ্বাচনত এ আই ইউ ডি এফৰ সৈতে মিত্ৰতা কৰি কংগ্ৰেছে বিপৰ্যয়ৰ সন্মুখীন হোৱা বুলি আৰম্ভ হোৱা চর্চাৰ পাছতেই অসম প্ৰদেশ কংগ্ৰেছৰ সভাপতিৰ দায়িত্ব লৈয়েই এ আই ইউ ডি এফৰ সৈতে মিত্ৰতা ভংগ কৰিছিল কংগ্ৰেছে । আনকি এ আই ইউ ডি এফৰ সৈতে কংগ্ৰেছৰ মিত্ৰতাৰ তীব্ৰ বিৰোধিতা কৰিছিল ভূপেন বৰাই ।
আনহাতে, ২০২৬ চনৰ বিধানসভা নিৰ্বাচনৰ পূৰ্বেও সংখ্যালঘু অধ্যুষিত এলেকাত সাংগঠনিক শক্তি বৃদ্ধি কৰাৰ পৰিকল্পনা ৰচনা কৰা এ আই ইউ ডি এফ দলে এইবেলিও কংগ্ৰেছৰ সৈতে মিত্ৰতাৰ পোষকতা কৰি বিভিন্ন সময়ত দলটোৰ নেতৃত্বই মন্তব্য কৰি আহিছে যদিও এ আই ইউ ডি এফৰ এনে পৰিকল্পনাত গৌৰৱ গগৈৰ নেতৃত্বত চেঁচাপানী ঢলাৰ সম্ভাৱনাই একপ্ৰকাৰ নিশ্চিত হৈ পৰিছে গৌৰৱ গগৈৰ এক মন্তব্যত ।
অসম প্ৰদেশ কংগ্ৰেছৰ সভাপতিৰ দায়িত্ব গ্ৰহণ কৰিয়ে উজনি অসমৰ পাছত সোমবাৰে নগাঁৱত উপস্থিত হোৱা প্ৰদেশ কংগ্ৰেছৰ নৱনিযুক্ত সভাপতি গৌৰৱ গগৈয়ে এ আই ইউ ডি এফৰ সৈতে মিত্ৰতা নকৰাৰ ইংগিত প্ৰদান কৰিছে সংবাদ মাধ্যমৰ সন্মুখত ।
২০২১ চনৰ বিধানসভা নিৰ্বাচনৰ পাছত ভূপেন বৰাই অসম প্ৰদেশ কংগ্ৰেছৰ সভাপতিৰ দায়িত্ব লৈয়েই এ আই ইউ ডি এফৰ সৈতে মিত্ৰতাৰ বিৰোধিতা কৰাটো ভূপেন বৰাৰ ডাঙৰ সিদ্ধান্ত আছিল বুলি মন্তব্য কৰি ভূপেন বৰাৰ এনে সিদ্ধান্তক সফলতা হিচাপে লোৱা বুলি স্পষ্টকৈ উল্লেখ কৰে প্ৰদেশ কংগ্ৰেছৰ সভাপতি গৌৰৱ গগৈয়ে ।
ভূপেন বৰাৰ কি কি সফলতা দেখিলে গৌৰৱ গগৈয়ে ?
এ আই ইউ ডি এফৰ সৈতে মিত্ৰতাৰ বিৰোধিতা কৰাটো ভূপেন বৰাৰ ডাঙৰ সিদ্ধান্ত আৰু ইয়াক সফলতা হিচাপে লোৱা গৌৰৱ গগৈয়ে যেন গৌৰৱ গগৈৰ নেতৃত্বত এ আই ইউ ডি এফৰ সৈতে মিত্ৰতা সম্ভৱ নোহোৱাটোকে স্পষ্টকৈ বুজাই দিলে । প্ৰদেশ কংগ্ৰেছৰ সদ্য প্ৰাক্তন সভাপতি ভূপেন বৰাৰ নেতৃত্বক লৈ সোমবাৰে নগাঁৱত মন্তব্য কৰে নৱ নিযুক্ত সভাপতি গৌৰৱ গগৈয়ে ।
সংবাদ মাধ্যমৰ সন্মুখত ভূপেন বৰাৰ দুটা সফলতাৰ কথা উল্লেখ কৰি গৌৰৱ গগৈয়ে কয়, “ভূপেন বৰাৰ মই সফলতা দেখিছো । দলটোৰ অসমৰ দায়িত্ব লৈয়েই ভূপেন বৰাৰ ডাঙৰ সিদ্ধান্তটো আছিল এ আই ইউ ডি এফৰ সৈতে মিত্ৰতাৰ বিৰোধিতা । ইয়াৰ উপৰি ৰাহুল গান্ধীৰ ভাৰত জোড়ো যাত্ৰাতো ভূপেন বৰাৰ নেতৃত্বত অসমত সফলতা লাভ কৰিছিল ।”
গৌৰৱ গগৈৰ এনে স্পষ্ট ইংগিতৰ পাছত বিৰোধী ঐক্য কিম্বা কংগ্ৰেছৰ সৈতে মিত্ৰতা কৰিবলৈ এ আই ইউ ডি এফে দিল্লীৰ শৰণাপন্ন হ’ব নে 'একলা চলোঁ' নীতিৰে আগন্তুক ২০২৬ৰ বৈতৰণী পাৰ কৰিবলৈ চেষ্টা চলাব সেয়া অৱশ্যে পৰৱৰ্তী সময়ত ৰাজ্যৰ ৰাজনীতিত লক্ষণীয় হ’ব ।
