বিবাহৰ পিছত পুৰুষ-মহিলাৰ শৰীৰত বহু পৰিৱৰ্তন ঘটে ৷ বিশেষকৈ পুৰুষৰ ওজন বিয়াৰ পিছত সোনকালে বাঢ়িবলৈ আৰম্ভ কৰে ৷ এই কথা সকলোৱে নিশ্চয় লক্ষ্য কৰিছে ৷ কাৰণ প্ৰায় সকলো পুৰুষেই একে পৰিস্থিতিৰ সন্মুখীন হয় ৷ বিয়াৰ পিছত বহুতে পেটৰ চৰ্বি আৰু মেদবহুলতাৰ সমস্যাৰ সন্মুখীন হয় ৷ কিন্তু কিছুমান মানুহে বিয়াৰ পিছত মেদবহুলতাকো ঠাট্টা কৰি কয় যে, সেয়া নিজৰ পত্নীৰ হাতৰ মৰমেৰে ৰন্ধা খাদ্য খোৱাৰ ফল ৷ কিন্তু দৰাচলতে গৱেষকসকলে কয় যে এইটো সৰু সমস্যা নহয়, ই এক ডাঙৰ সমস্যা ৷
পোলেণ্ডৰ ৱাৰ্ছ’ত কৰা এক অধ্যয়নত দেখা গৈছে যে অবিবাহিত পুৰুষতকৈ বিবাহিত পুৰুষৰ মেদবহুলতাৰ সম্ভাৱনা ৬২ শতাংশ বেছি ৷ একে সময়তে চিকিৎসা বিশেষজ্ঞসকলে কয় যে, এই বৃদ্ধি ৩৯ শতাংশ মহিলাৰ ক্ষেত্ৰত দেখা গৈছে ৷
দুহেজাৰতকৈ অধিক লোকৰ ওপৰত কৰা অধ্যয়ন
পোলেণ্ডৰ নেশ্যনেল ইনষ্টিটিউট অৱ কাৰ্ডিঅ’লজিৰ গৱেষকসকলে ২৪০৫ গৰাকী লোকৰ তথ্য বিশ্লেষণ কৰে, যাৰ অধিকাংশৰে বয়স ৫০ বছৰৰ উৰ্ধৰ ৷ ইয়াৰে ৩৫.৩ শতাংশৰ ওজন স্বাভাৱিক, ৩৮.৩ শতাংশ অতিৰিক্ত ওজন আৰু ২৬.৪ শতাংশ মেদবহুল ৷ গৱেষণাৰ পৰা দেখা গৈছে যে পুৰুষৰ মেদবহুলতাৰ সম্ভাৱনা বিবাহৰ পিছত তিনিগুণ বৃদ্ধি পায় ৷ কিন্তু মহিলাৰ ক্ষেত্ৰত এই প্ৰভাৱ কম দেখা গৈছিল ৷
মেদবহুলতা আৰু বয়সৰ সম্পৰ্কৰ
অধ্যয়নতো দেখা গৈছে যে, বয়স বৃদ্ধিৰ লগে লগে ওজন বৃদ্ধিৰ সম্ভাৱনা বৃদ্ধি পায় ৷ বয়স বৃদ্ধিৰ লগে লগে প্ৰতি বছৰে পুৰুষৰ ওজন বৃদ্ধিৰ সম্ভাৱনা ৩% আৰু মহিলাৰ ৪% বৃদ্ধি পায় ৷ একে সময়তে পুৰুষৰ ক্ষেত্ৰত ৪ শতাংশ আৰু মহিলাৰ ক্ষেত্ৰত ৬ শতাংশ মেদবহুলতাৰ সম্ভাৱনা বৃদ্ধি পায় ৷
বিবাহ আৰু মেদবহুলতাৰ মাজৰ সম্পৰ্ক
বহু বিশেষজ্ঞই কয় যে, বিবাহৰ পিছত পুৰুষৰ ওজন বৃদ্ধিৰ মূল কাৰণ হ’ল অত্যধিক খাদ্য গ্ৰহণ, সামাজিক উৎসৱ-পাৰ্ৱণৰ খাদ্যাভ্যাস আৰু শাৰীৰিক কাৰ্যকলাপৰ অভাৱ ৷ এই সন্দৰ্ভত অবেচিটি হেল্থ এলায়েন্সৰ সঞ্চালিকা কেথেৰিন জেনাৰে কয় যে, মেদবহুলতা কেনেদৰে কেৱল ব্যক্তিগত পছন্দৰ ফল নহয়, সামাজিক, মানসিক আৰু পৰিৱেশগত কাৰকৰ সমন্বয়, তাৰ আন এক উদাহৰণ এই অধ্যয়ন ৷
বিশেষজ্ঞসকলে কি ক’লে
বিশেষজ্ঞসকলে কয় যে, বিবাহৰ পিছত পুৰুষৰ জীৱনশৈলী সলনি হয়, যাৰ ফলত তেওঁলোকৰ ওজনত খুবেই প্ৰভাৱ পৰে ৷ কিন্তু বিশেষকৈ তেওঁলোকৰ খাদ্যাভ্যাস আৰু জীৱনশৈলীৰ কথা বিবেচনা কৰিবলৈ গ’লে এই সমস্যাৰ সৈতে মোকাবিলা কৰিবলৈ পুৰুষৰ স্বাস্থ্যৰ প্ৰতি সচেতন হোৱাৰ লগতে নিজৰ শৰীৰক লৈ অধিক গুৰুত্ব দিয়াৰ প্ৰয়োজন ৷ ইয়াৰ বাবে প্ৰথমে চৰ্বিযুক্ত খাদ্য গ্ৰহণ কৰাৰ অভ্যাস নিয়ন্ত্ৰণ কৰিব লাগিব ৷ তাৰ পিছত খাদ্যাভ্যাসতো নিয়ন্ত্ৰণ অনাৰ লগতে সুষম খাদ্য, ব্যায়াম আৰু পৰ্যাপ্ত টোপনিৰ দ্বাৰা এই সমস্যাৰ সমাধান কৰিব পাৰি ৷
উৎস:-https://www.sciencedirect.com/science/article/abs/pii/S0277953617303349
(সতৰ্কীকৰণ: এই প্ৰতিবেদনত আপোনাক দিয়া সকলো স্বাস্থ্য তথা জীৱনশৈলী সম্পৰ্কীয় যিকোনো তথ্য আৰু পৰামৰ্শ কেৱল আপোনাৰ সাধাৰণ তথ্যৰ বাবেহে আগবঢ়োৱা হৈছে । আমি এই তথ্য বৈজ্ঞানিক গৱেষণা, অধ্যয়ন, চিকিৎসা আৰু স্বাস্থ্য পেছাদাৰী পৰামৰ্শৰ ভিত্তিত প্ৰদান কৰিছো । আপুনি এই উপায় বা পদ্ধতি অনুসৰণ কৰাৰ আগতে এই বিষয়ে বিতংভাৱে জনাটো উচিত তথা আপোনাৰ ব্যক্তিগত চিকিৎসকৰ পৰামৰ্শ গ্ৰহণ কৰাটো উচিত ।)
লগতে পঢ়ক
