শীতকালত ছালৰ ৰুক্ষ ভাৱ দূৰ কৰিবলৈ অনুসৰণ কৰিব পাৰে মালা মহন্তই দিয়া এই উপায়

শীতকালৰ এই সময়ছোৱাত যিহেতু বহুতৰে হাত ভৰিৰ ছাল সমূহ খহতা হোৱা দেখা যায় ৷ ঘৰুৱা পদ্ধতিৰে আপুনি আপোনাৰ এই সমস্যাৰ পৰা পৰিত্ৰাণ পাব পাৰে ৷ বৰ্তমান সময়ৰ সকলোৰে ঘৰৰ নাৰিকল, খিচমিছকে ধৰি ভিন্ন ড্ৰাই ফ্ৰুটছ আদিকে ধৰি ভিন্ন ধৰণৰ বিহুৰ আপ্যায়নৰ সামগ্ৰী আছে, এই সামগ্ৰীসমূহৰে আপোনাৰ ছালখনৰ যতন ল'ব পাৰিব ৷

1. ইয়াৰ বাবে আপোনাক লাগিব এবটি মান ৰুকি লোৱা নাৰিকল,লগতে ১০-১৫ টা মান খিচমিচ(খিচমিচ কেইটা পানীত তিয়াই ল'ব লাগিব) আৰু লগতে লাগিব ৪ চামুচ চুজি ৷
2. প্ৰথমে এই গোটেই কেইটা সামগ্ৰী অৰ্থাৎ ৰুকি লোৱা নাৰিকল, তিয়াই থোৱা খিচমিচ আৰু চুজি এই খিনি খুব ভালদৰে মিহলাই ল'ব লাগিব ৷ খিচমিচ খিনি ভালদৰে হাতেৰে পিটিকি দিব পাৰিব ৷
3. মিহলাই লৈ তাৰ লগত অকমান নাৰিকলৰ তেল মিহলাই ল'ব ৷ যাৰ ফলত এটা সুন্দৰ পেষ্ট তৈয়াৰ হ'ব, সেই পেষ্টত অকমান কেঁচা গাখীৰ মিহলাই ল'ব পাৰে ৷
4. তাৰ পাছত এই পেষ্টটো আপোনাৰ মুখ, ডিঙি আৰু হাত-ভৰিৰ ছালত ভাল দৰে লগাব ৷ এই পেষ্টটো লগাই ১৫ মিনিট মান সময় ৰৈ দিব ৷
5. তাৰ পাছত আঙুলিৰে ঘূৰাই ঘূৰাই ঘহি ল'ব ৷
6. তাৰ পাছত কুহুমীয়া পানীৰে গাটো ধুই ল'ব ৷

সপ্তাহত অন্তত এদিনকৈ যদি এনেদৰে কৰিব পাৰে তেন্তে আপোনালোকৰ ছালখনৰ উজ্জ্বলতা যথেষ্ট বৃদ্ধি হ'ব ৷ মৃতকোষবোৰ নাইকীয়া হোৱাৰ বাবে ছালখন যথেষ্ট উজ্জ্বল দেখাব ৷ লগতে ছালৰ খহতা ভাৱটোও নাইকীয়া হ'ব ৷ উল্লেখযোগ্য যে, নাৰিকলৰ এনে এক গুণ আছে যিয়ে আমাৰ ছালখন উজ্জ্বল আৰু বগা দেখাই আৰু নাৰিকলৰ তেলত ছালৰ শুকান ভাব নাইকিয়া কৰাৰ গুণ আছে, লগতে খিচমিচেও ছালখন উজ্জ্বল কৰে ৷ কাৰণ খিচমিচত যথেষ্ট পৰিমাণৰে ভিটামিন C, ভিটামিন E আৰু ভিটামিন A থাকে ৷

(সতৰ্কীকৰণ: এই প্ৰতিবেদনত আপোনাক দিয়া সকলো স্বাস্থ্য তথা জীৱনশৈলী সম্পৰ্কীয় যিকোনো তথ্য আৰু পৰামৰ্শ কেৱল আপোনাৰ সাধাৰণ তথ্যৰ বাবেহে আগবঢ়োৱা হৈছে । আমি এই তথ্য বৈজ্ঞানিক গৱেষণা, অধ্যয়ন, চিকিৎসা আৰু স্বাস্থ্য পেছাদাৰী পৰামৰ্শৰ ভিত্তিত প্ৰদান কৰিছো । আপুনি এই উপায় বা পদ্ধতি অনুসৰণ কৰাৰ আগতে এই বিষয়ে বিতংভাৱে জনাটো উচিত তথা আপোনাৰ ব্যক্তিগত চিকিৎসকৰ পৰামৰ্শ গ্ৰহণ কৰাটো উচিত ।)

লগতে পঢ়ক