বজাৰৰ কেমিকেলযুক্ত ৰং বাদ দি ঘৰতে এনেদৰে প্ৰস্তুত কৰক ফাকুৱাৰ ৰং

সমাগত ৰঙৰ উৎসৱ ফাকুৱা ৷ ফাকুৱা বা হোলী হৈছে প্ৰেম, একতা আৰু বসন্তৰ আগমনৰ এক আনন্দময় উৎসৱ ৷ এই উৎসৱ সৰু-বৰ সকলোয়ে মিলি উদযাপন কৰে ৷ ৰঙীন হৈ পৰে আকাশ-বতাহ ৷ কিন্তু ফাকুৱাৰ নামত দুটা দিন আনন্দ-উল্লাস কৰাৰ পাছত অধিকাংশ লোকেই অনুশোচনাত ভুগে ৷ ফাকুৱা উদযাপনৰ পাছতে ৰুগীয়া হৈ পৰে বহু লোক ৷

হয়, আগৰ দিনত ফুল, হালধি, বিভিন্ন ফল, ঔষধি গুণযুক্ত গছৰ পাত শুকুৱাই ফাকুৰ গুৰি তৈয়াৰ কৰা হৈছিল ৷ যিবোৰৰ একো পাৰ্শ্বক্ৰিয়া নাছিল ৷ বৰঞ্চ, সেই গুৰি ছাল-চকুৰ সংস্পৰ্শলৈ অহাৰ ফলত আমাৰ স্বাস্থ্যৰ উপকাৰহে হৈছিল ৷ কিন্তু, আজিকালি ঔদ্যোগিক ৰং বা অক্সিডাইজড ধাতুৰ সৈতে কৃত্ৰিমভাৱে ৰং সৃষ্টি কৰা হয় ৷ লীড অক্সাইড, ক্ৰমিয়াম আয়োডাইড, কপাৰ ছালফেট, পাৰা ছালফাইট আৰু এলুমিনিয়াম ব্ৰমাইডৰ দৰে ক্ষতিকাৰক ৰাসায়নিক পদাৰ্থবোৰ ফাকুৰ গুৰিত বহুলভাৱে ব্যৱহাৰ কৰা হয় ৷ যাৰ ফলত ছালৰ সমস্যা, শ্বাসনলীৰ সংক্ৰমণ, কনজাংটিভাইটিছ, কৰ্ণিয়া বিভ্ৰান্তিৰ লগতে বহু স্বাস্থ্য সমস্যাৰ উদ্ভৱ হয় ৷ বিশেষকৈ, এই ক্ষতিকাৰক ৰাসায়নিক পদাৰ্থই এতিয়া সকলোৰে জীৱনলৈ ভাবুলি কঢ়িয়াইছে ৷

ফাকুৱাৰ ৰঙৰ ক্ষতিকাৰক প্ৰভাৱ

ছালৰ জ্বলা-পোৰা, এলাৰ্জি

ৰাসায়নিক পদাৰ্থযুক্ত ফাকুৰ বাবে ছালৰ জ্বলা-পোৰা, ৰঙা পৰা, খজুৱতি হ'ব পাৰে ৷ সংবেদনশীল ছালৰ অধিকাৰীৰ এই সমস্যা অধিক হয় ৷

চকুৰ সমস্যা

এনে ৰঙৰ সংস্পৰ্শলৈ অহাৰ ফলত চকুৰ জ্বলা-পোৰা, ৰঙা পৰা, চকুৰ পৰা পানী ওলোৱা, আনকি চকুত সোমাই গ'লে চকুৰে নেদেখাও হ'ব পাৰে ৷

কৰ্কট ৰোগ

ফাকুৱাৰ ৰঙত ব্যৱহৃত কিছুমান ৰাসায়নিক পদাৰ্থ, যেনে সীহ আৰু ক্ৰমিয়াম, কাৰ্চিনোজেনিকৰ সংস্পৰ্শলৈ অহাৰ ফলত কৰ্কট ৰোগৰ আশংকা বৃদ্ধি হয় ৷

গৰ্ভৱতী মহিলাৰ সমস্যা

প্ৰসূতি আৰু স্ত্ৰীৰোগ বিশেষজ্ঞৰ মতে, হোলীৰ ৰঙে গৰ্ভৱতী মহিলাসকলৰ বাবে শ্বাস-প্ৰশ্বাসকে ধৰি গুৰুতৰ স্বাস্থ্য সমস্যা সৃষ্টি কৰিব পাৰে ৷ বহুতো ৰাসায়নিক পদাৰ্থযুক্ত ৰঙত সীহ, পাৰা, ক্ৰমিয়াম আৰু এমোনিয়াৰ দৰে বিষাক্ত পদাৰ্থ থাকে, যি ছালৰ মাজৰে শৰীৰত প্ৰৱেশ কৰিলে গুৰুতৰ স্বাস্থ্য সমস্যা সৃষ্টি কৰিব পাৰে ৷ বিশেষকৈ, গৰ্ভৱতী মহিলা আৰু তেওঁলোকৰ বিকাশশীল ভ্ৰূণৰ বাবে এইসমূহ অত্যন্ত ক্ষতিকাৰক ৷ এই বিষাক্ত পদাৰ্থবোৰৰ সংস্পৰ্শলৈ আহিলে গৰ্ভধাৰণৰ সময়ত ভ্ৰণৰ বিকাশৰ অস্বাভাৱিকতা আৰু অন্যান্য জটিলতা হ'ব পাৰে ৷

শ্বাস-প্ৰশ্বাসৰ সমস্যা

ফাকুৱা উদযাপনৰ সময়ত ৰাসায়নিক পদাৰ্থযুক্ত ৰঙৰ সূক্ষ্ম কণাবোৰ নাক-মুখৰে শৰীৰলৈ সোমালে শ্বাস-প্ৰশ্বাসৰ সমস্যা যেনে, কাহ, হাঁচি, উশাহ লোৱাত অসুবিধা, আৰু হাপানীৰ দৰে ৰোগ হয় ৷

পাৰিপাৰ্শ্বিক প্ৰদূষণ

ৰাসায়নিক পদাৰ্থযুক্ত ৰঙে কেৱল মানুহৰ স্বাস্থ্যৰে নহয়, পৰিৱেশতো বিৰূপ প্ৰভাৱ পেলায় ৷ এইবোৰে জলাশয়, মাটি আৰু গছ-গছনি দূষিত কৰিব পাৰে, যাৰ ফলত পাৰিপাৰ্শ্বিক ক্ষতি তথা জৈৱ বৈচিত্ৰ্যৰ বাবে দীৰ্ঘম্যাদী বিপদাশংকা সৃষ্টি হ'ব পাৰে ৷

সুৰক্ষিত হৈ কিদৰে উদযাপন কৰিব পাৰি এই উৎসৱ

• এই বিপদাশংকাবোৰ হ্ৰাস কৰিবলৈ উদ্ভিদ-আধাৰিত উৎস যেনে হালধি, বীটৰুট, পালেং শাক আৰু ফুলৰ পৰা তৈয়াৰ কৰা প্ৰাকৃতিক আৰু পৰিৱেশ-অনুকূল ৰং ব্যৱহাৰ কৰিব ৷
• হোলী খেলাৰ আগতে আপোনাৰ ছালত নাৰিকল তেল বা ময়েশ্চাৰাইজাৰ প্ৰয়োগ কৰিব ৷
• হাত, চকু আৰু চুলিৰ ৰঙৰ পৰা সুৰক্ষিত কৰিবলৈ হাত মোজা, ছানগ্লাছ, আৰু টুপী বা স্কার্ফ পিন্ধিব ৷
• ফাকুৱা খেলি থকাৰ সময়ত চকু আৰু মুখ সংস্পৰ্শ নকৰিব ৷
• ফাকুৱা খেলাৰ পিছত আপোনাৰ চুলি আৰু শৰীৰ পৰিস্কাৰ পানীৰে ভালদৰে ধুব ৷
• যদি আপুনি ছালৰ কোনো জ্বলা-পোৰা, ৰঙা পৰা বা উশাহ-নিশাহৰ সমস্যা অনুভৱ কৰে, লগে লগে চিকিৎসকৰ পৰামৰ্শ ল'ব ৷

ঘৰতে তৈয়াৰ কৰিব পাৰি ফাকুৱাৰ ৰং

এইবাৰ ফাকুৱাই যে আৰু অধিক স্বাস্থ্য সমস্যাৰ সৃষ্টি কৰিব, সেয়া প্ৰায় নিশ্চিত ৷ কিয়নো, বিগত কেইমাহৰ পৰা সমগ্ৰ অসমতে বায়ু প্ৰদূষণে ভয়াৱহ ৰূপ ধাৰণ কৰিছে ৷ চৌদিশে সৃষ্টি হোৱা ধূলিময় পৰিৱেশৰ ফলত ইতিমধ্যেই অধিকাংশ লোক চকু-ছাল, শ্বাস-প্ৰশ্বাসকে ধৰি বহু স্বাস্থ্য সমস্যাত ভূগিছে ৷ বহু লোকৰ বসন্তও ওলাইছে ৷ সেয়েহে, এইবাৰ ফাকুৱা উদযাপনত সকলোয়ে বিশেষ সাৱধানতা অৱলম্বন কৰাটো অত্যন্ত জৰুৰী হৈ পৰিছে ৷ নিজৰ স্বাস্থ্যৰ প্ৰতি সতৰ্কতা অৱলম্বন কৰি আপুনি সমাগত ফাকুৱাত বজাৰৰ পৰা অনা ৰঙৰে ফাকুৱা নেখেলিব ৷ ইয়াৰ পৰিৱৰ্তে খুব সহজ উপায়ৰে ঘৰতে ফাকুৱাৰ ৰং তৈয়াৰ কৰিব পাৰিব ৷ হয়, ঘৰতে কিদৰে ফাকুৱাৰ ৰং তৈয়াৰ কৰিব পাৰি আজি জানি লওঁক-

• হালধীয়া ৰং: ময়দাৰ সৈতে হালধি মিহলি কৰি আপুনি কোমল হালধীয়া ৰং তৈয়াৰ কৰিব পাৰে ৷
• গুলপীয়া ৰং: বীট আৰু শুকান জৱা ফুলৰ পাহি পিছিলেই গুলপীয়া ৰং তৈয়াৰ হয় ৷
• সেউজীয়া ৰং: সেউজীয়া ৰঙৰ বাবে শুকান নিম পাত আৰু শুকান জেতুকা পাত মিহলি কৰিব ৷
• ৰঙা ৰং: ডালিমৰ বাকলি শুকুৱাই এইসমূহ পিছি ৰঙা ৰং তৈয়াৰ কৰিব পাৰে ৷

(সতৰ্কীকৰণ: এই প্ৰতিবেদনত আপোনাক দিয়া সকলো স্বাস্থ্য তথা জীৱনশৈলী সম্পৰ্কীয় যিকোনো তথ্য আৰু পৰামৰ্শ কেৱল আপোনাৰ সাধাৰণ তথ্যৰ বাবেহে আগবঢ়োৱা হৈছে । আমি এই তথ্য বৈজ্ঞানিক গৱেষণা, অধ্যয়ন, চিকিৎসা আৰু স্বাস্থ্য পেছাদাৰী পৰামৰ্শৰ ভিত্তিত প্ৰদান কৰিছো । আপুনি এই উপায় বা পদ্ধতি অনুসৰণ কৰাৰ আগতে এই বিষয়ে বিতংভাৱে জনাটো উচিত তথা আপোনাৰ ব্যক্তিগত চিকিৎসকৰ পৰামৰ্শ গ্ৰহণ কৰাটো উচিত ।)

লগতে পঢ়ক