নিউয়ৰ্ক/ৱাশ্বিংটন: আমেৰিকাই ভাৰত ভ্ৰমণকাৰী নাগৰিকসকলৰ বাবে এক পৰামৰ্শ জাৰি কৰি বৰ্ধিত অপৰাধ আৰু ধৰ্ষণৰ সংখ্যাৰ বাবে অধিক পৰিমাণে সাৱধানতা অৱলম্বন কৰিবলৈ আহ্বান জনাইছে ৷ তদুপৰি সন্ত্ৰাসবাদৰ বাবে দেশৰ মধ্য আৰু পূব অংশৰ একাংশ অঞ্চললৈ যাত্ৰা নকৰিবলৈ নাগৰিকসকলক পৰামৰ্শ আগবঢ়াইছে ।
যোৱা সপ্তাহত জাৰি কৰা ভ্ৰমণ সম্পৰ্কীয় নিৰ্দেশনাত কোৱা হৈছে যে “ধৰ্ষণ ভাৰতৰ অন্যতম দ্ৰুতগতিত বৃদ্ধি পোৱা অপৰাধ” আৰু যৌন নিৰ্যাতনকে ধৰি অন্যান্য হিংসাত্মক অপৰাধসমূহ পৰ্যটন স্থান আৰু অন্যান্য স্থানত সংঘটিত হয় । লগতে কোৱা হৈছে যে পৰ্যটনৰ স্থান, পৰিবহণ কেন্দ্ৰ, বজাৰ বা শ্বপিং মল আৰু চৰকাৰী সুবিধাসমূহক লক্ষ্য কৰি লোৱা সন্ত্ৰাসবাদীয়ে কোনো সতৰ্কবাণী নোহোৱাকৈ আক্ৰমণ কৰিব পাৰে ।
১৬ জুনত জাৰি কৰা নিৰ্দেশনাটোত পুনৰ কোৱা হৈছে যে পূব মহাৰাষ্ট্ৰ আৰু উত্তৰ তেলেংগানাৰ পৰা পশ্চিম পশ্চিমবংগৰ মাজেৰে বিস্তৃত গ্ৰাম্য অঞ্চলত আমেৰিকা চৰকাৰৰ নাগৰিকসকলক জৰুৰীকালীন সেৱা প্ৰদান কৰাৰ ক্ষমতা সীমিত । এই পৰামৰ্শত আমেৰিকাৰ নাগৰিকসকলক সন্ত্ৰাসবাদৰ বাবে মধ্য আৰু পূব ভাৰতৰ কিছু অংশলৈ যাত্ৰা নকৰাৰো পৰামৰ্শ আগবঢ়োৱা হৈছে ৷
ভ্ৰমণ সম্পৰ্কীয় নিৰ্দেশনাটোত এনেদৰেও উল্লেখ আছে ‘‘পূব মহাৰাষ্ট্ৰ আৰু উত্তৰ তেলেংগানাৰ পৰা পশ্চিম পশ্চিমবংগলৈকে বিস্তৃত ভাৰতৰ এক বৃহৎ অঞ্চলত মাওবাদী গোট বা নক্সালবাদী সক্ৰিয় হৈ আছে । তেলেংগানা, অন্ধ্ৰপ্ৰদেশ, মহাৰাষ্ট্ৰ, মধ্যপ্ৰদেশ, উত্তৰ প্ৰদেশ, বিহাৰ, পশ্চিমবংগ আৰু ওড়িশাৰ সীমান্তৱৰ্তী ছত্তীশগড় আৰু ঝাৰখণ্ডৰ গ্ৰামাঞ্চলত ভাৰত চৰকাৰৰ বিষয়াসকলৰ বিৰুদ্ধে আক্ৰমণ বিক্ষিপ্তভাৱে সংঘটিত হৈয়েই আছে । ওড়িশাৰ দক্ষিণ-পশ্চিম অঞ্চলসমূহো এই সমস্যাত জৰ্জৰিত ৷’’
ভাৰতত কৰ্মৰত আমেৰিকা চৰকাৰৰ কৰ্মচাৰীয়ে বিহাৰ, ঝাৰখণ্ড, ছত্তীশগড়, পশ্চিমবংগ, মেঘালয়, ওড়িশা ৰাজ্যৰ অধিকাংশ অঞ্চললৈ যোৱাৰ পূৰ্বে অনুমতি ল’ব লাগিব । ইয়াত কোৱা হৈছে যে এই ৰাজ্যসমূহৰ ৰাজধানীৰ বাবে অনুমতিৰ প্ৰয়োজন নাই । ‘‘ভাৰতত কৰ্মৰত আমেৰিকা চৰকাৰৰ কৰ্মচাৰীসকলক মহাৰাষ্ট্ৰৰ পূব অঞ্চল আৰু মধ্যপ্ৰদেশৰ পূব অঞ্চললৈ যাবলৈ অনুমোদনৰ প্ৰয়োজন’’ বুলি নিৰ্দেশনাটোত উল্লেখ কৰা হৈছে ৷
আমেৰিকাৰ নাগৰিকসকলক মণিপুৰলৈ যোৱাৰ ক্ষেত্ৰতো বাধা আৰোপ কৰা হৈছে ৷ ভাৰতত কৰ্মৰত আমেৰিকা চৰকাৰৰ কৰ্মচাৰীসকলে মণিপুৰ ভ্ৰমণৰ পূৰ্বে আগতীয়া অনুমোদনৰ প্ৰয়োজন বুলি উল্লেখ কৰা নিৰ্দেশনাটোত এনেদৰে আছে ‘‘জাতিভিত্তিক সংঘাত চলি থকাৰ ফলত ব্যাপক হিংসা আৰু লোকসকলৰ পলায়নৰ খবৰ আহিছে ।’’
ইয়াৰ উপৰিও সন্ত্ৰাসবাদ আৰু অশান্তিৰ বাবে পূব লাডাখ অঞ্চল আৰু লেহ ভ্ৰমণৰ বাহিৰে কেন্দ্ৰীয় শাসিত অঞ্চল জম্মু-কাশ্মীৰলৈ যাত্ৰা নকৰিবলৈও আমেৰিকাৰ নাগৰিকসকলক পৰামৰ্শ দিয়া হৈছে ৷
লগতে পঢ়ক: ইৰাণৰ ফৰ্ড' পাৰমাণৱিক ঘাটিত আঘাত কৰা বাংকাৰ বাষ্টাৰ বোমা আচলতে কি ?
