ৱাশ্বিংটন: আমেৰিকাই নিজৰ পাৰমাণৱিক কাৰ্যসূচীৰ চুক্তিৰ বাবে ইৰাণৰ সৈতে প্ৰত্যক্ষ আলোচনা আৰম্ভ কৰিবলৈ ওলাইছে । ইজৰাইলৰ প্ৰধানমন্ত্ৰী বেঞ্জামিন নেতান্যাহুৰ সৈতে হোৱাইট হাউছৰ বৈঠকত আমেৰিকাৰ ৰাষ্ট্ৰপতি ডোনাল্ড ট্ৰাম্পে এই আচৰিত ঘোষণা কৰে ৷ ৭ এপ্ৰিল সোমবাৰে অ’ভেল অফিচত ভাষণ দি ট্ৰাম্পে কয় যে তেওঁ তেহৰাণৰ সৈতে চুক্তিত উপনীত হোৱাৰ আশা কৰিছে । কিন্তু তেওঁ লগতে সকীয়াই দিয়ে যে আলোচনা বিফল হ’লে ইছলামিক ৰিপাব্লিক “বৃহৎ বিপদ”ত পৰিব ।
ইজৰাইলৰ প্ৰধানমন্ত্ৰী বেঞ্জামিন নেতানিয়াহুৰ সৈতে সাক্ষাৎ কৰাৰ পিছত সাংবাদিকৰ আগত দিয়া মন্তব্যত ৰাষ্ট্ৰপতিগৰাকীয়ে কয় যে শনিবাৰৰ পৰা আলোচনা আৰম্ভ হ’ব । তেওঁ জোৰ দি কয় যে তেহৰানে পাৰমাণৱিক অস্ত্ৰ লাভ কৰিব নোৱাৰে । "আমি তেওঁলোকৰ সৈতে পোনপটীয়াকৈ লেনদেন কৰিছো আৰু হয়তো চুক্তি হ’ব ।" ট্ৰাম্পে কয় । তেওঁ লগতে কয় যে “স্পষ্ট কামটো কৰাতকৈ চুক্তি কৰাটো ভাল হ’ব ।”
তেওঁৰ আলোচনাপন্থীসকলে তেহৰাণৰ সৈতে সহমতত উপনীত হ’ব নোৱাৰিলে ইৰাণৰ বিৰুদ্ধে সামৰিক ব্যৱস্থা গ্ৰহণৰ প্ৰতিশ্ৰুতি দিব নেকি বুলি সোধাত ট্ৰাম্পে উত্তৰ দিয়ে যে “ইৰাণ ডাঙৰ বিপদত পৰিব আৰু মই এই কথা ক’বলৈ ঘৃণা কৰো ।” ট্ৰাম্পে কয় যে যদি আলোচনা সফল নহয় তেন্তে ইৰাণৰ বাবে এইটো অতি বেয়া দিন হ’ব বুলি মই ভাবো ।
ৰাষ্ট্ৰসংঘত সোমবাৰে ইৰাণৰ মিছনে কোনো তাৎক্ষণিক মন্তব্য প্ৰকাশ কৰা নাই । শেহতীয়াকৈ ট্ৰাম্পে ইৰাণৰ সৰ্বোচ্চ নেতা ৮৫ বছৰীয়া আয়াতুল্লাহ আলী খামেনেইলৈ এখন পত্ৰ প্ৰেৰণ কৰি দ্ৰুতগতিত সম্প্ৰসাৰিত হোৱা পাৰমাণৱিক কাৰ্যসূচীক লৈ আমেৰিকাৰ সৈতে প্ৰত্যক্ষ আলোচনা কৰিবলৈ আহ্বান জনাইছিল । কিন্তু ইৰাণৰ ৰাষ্ট্ৰপতি মাছুদ পেজেস্কিয়ানে যোৱা মাহৰ শেষৰ ফালে কয় যে ইৰাণে ট্ৰাম্পৰ অনুৰোধ নাকচ কৰা স্বত্ত্বেও ৱাশ্বিংটনৰ সৈতে পৰোক্ষ আলোচনাৰ বাট মুকলি ৰাখিছে । কিন্তু ইৰাণ, গাজাত হামাছ, লেবাননত হিজবুল্লাহ আৰু য়েমেনত হুথী উগ্ৰপন্থীৰ সন্ত্ৰাসবাদী কাৰ্যকলাপৰ মূল পৃষ্ঠপোষক হোৱাৰ বাবে ট্ৰাম্পে দেশখনক নিজৰ পাৰমাণৱিক কাৰ্যসূচী প্ৰত্যাহাৰ কৰিবলৈ অন্যথা ইয়াৰ বাবে কঠোৰ পৰিণতিৰ সন্মুখীন হ’ব লাগিব বুলি ধাৰাবাহিকভাৱে সকীয়নি দি আহিছে ।
মাৰ্চৰ শেষৰ ফালে এন বি চি নিউজৰ আগত ট্ৰাম্পে কয় যে যদি তেওঁলোকে কোনো চুক্তি নকৰে তেন্তে বোমা বিস্ফোৰণ হ’ব । “তেওঁলোকে আগতে কেতিয়াও দেখা নোপোৱা বোমা বিস্ফোৰণ হ'ব ।” ট্ৰাম্পে কয় ৷ ৰাষ্ট্ৰসংঘত তেহৰানৰ মুখ্য দূত ৰাষ্ট্ৰদূত আমিৰ ছাইদ ইৰাভানীয়ে কেইবাখনো পত্ৰযোগে নিৰাপত্তা পৰিষদৰ সদস্যসকলক ট্ৰাম্পে ইৰাণত বোমা বিস্ফোৰণৰ ভাবুকি গৰিহণা দিবলৈ আহ্বান জনাইছে ।
ট্ৰাম্পে হোৱাইট হাউছৰ প্ৰথম কাৰ্যকালত ডেম’ক্ৰেটিক ৰাষ্ট্ৰপতি বাৰাক ওবামাৰ প্ৰশাসনে আলোচনা কৰা ইৰাণৰ সৈতে হোৱা গুৰুত্বপূৰ্ণ পাৰমাণৱিক চুক্তিৰ পৰা আমেৰিকাক প্ৰত্যাহাৰ কৰে ।
ইৰাণৰ সৈতে চুক্তিত উপনীত হ’বলৈ ট্ৰাম্পৰ কূটনৈতিক প্ৰচেষ্টাক সমৰ্থন কৰা বুলি উল্লেখ কৰি নেতান্যাহুৱে কয় যে ইৰাণে পাৰমাণৱিক অস্ত্ৰ নিৰ্মাণ নকৰাটো নিশ্চিত কৰাটোৱে ইজৰাইল আৰু আমেৰিকাৰ লক্ষ্য ।
ইৰাণৰ ওপৰত হকিছ মতামত আৰু সামৰিক হেঁচা প্ৰয়োগৰ বাবে অতীতৰ আহ্বানৰ বাবে পৰিচিত ইজৰাইলৰ নেতাগৰাকীয়ে ২০০৩ চনত আন্তঃৰাষ্ট্ৰীয় সম্প্ৰদায়ৰ সৈতে লিবিয়াই কৰা চুক্তিৰ দৰে কূটনৈতিক চুক্তিক আদৰণি জনাব বুলি কয় । “কিন্তু যিয়েই নহওক, আমি নিশ্চিত হ’ব লাগিব যে ইৰাণৰ হাতত পাৰমাণৱিক অস্ত্ৰ নাথাকে ।” তেওঁ লগতে কয় ৷
ট্ৰাম্পে কয় যে এই আলোচনা “প্ৰায় উচ্চতম পৰ্যায়ত” হ’ব, কিন্তু আলোচনা ক’ত হ’ব বা স্পৰ্শকাতৰ কূটনীতিৰ বাবে কাক প্ৰেৰণ কৰিব সেই কথা ক’বলৈ অস্বীকাৰ কৰে ।
মধ্যপ্ৰাচ্যৰ চুলতানেট ওমান আছিল আমেৰিকা-ইৰাণৰ আলোচনাৰ এক গুৰুত্বপূৰ্ণ মাধ্যম আৰু অতি শেহতীয়াকৈ ট্ৰাম্প আৰু খামেনেইৰ মাজত আলোচনা পুনৰ আৰম্ভ কৰাৰ সন্দৰ্ভত চিঠিৰ আদান-প্ৰদানৰ মধ্যস্থতাকাৰী আছিল ওমান ।
লগতে পঢ়ক: ক্ষুণ্ণ ট্ৰাম্প; ৰাছিয়াৰ ওপৰত নিষেধাজ্ঞা আৰোপৰ ভাবুকি
