ভাৰতে শুল্ক হ্ৰাস কৰিবলৈ সন্মত হৈছে; ড'নাল্ড ট্ৰাম্প

নতুন দিল্লী : ভাৰতৰ শুল্ক ব্যৱস্থাৰ ওপৰত আন এক আক্ৰমণ ট্ৰাম্পৰ । আমেৰিকাৰ ৰাষ্ট্ৰপতি ড'নাল্ড ট্ৰাম্পে শুকুৰবাৰে (স্থানীয় সময় অনুসৰি) কয় যে 'উচ্চ শুল্ক'ৰ বাবে ভাৰতক কিবা এটা বিক্ৰী কৰাটোও অসম্ভৱ । অ'ভেল অফিচৰ পৰা টেলিভিছনত দিয়া ভাষণত ট্ৰাম্পে লগতে কয় যে ভাৰতে অৱশ্যে শুল্ক যথেষ্ট পৰিমাণে হ্ৰাস কৰিবলৈ সন্মত হৈছে ।

"ভাৰতে আমাৰ পৰা বৃহৎ শুল্ক আদায় কৰে । ই অতি বিশাল । আপুনি আনকি ভাৰতত একো বিক্ৰী কৰিব নোৱাৰে... তেওঁলোকে অৱশ্যে সন্মত হৈছে; এতিয়া তেওঁলোকৰ শুল্ক হ্ৰাস কৰিব বিচাৰে । কাৰণ অৱশেষত কোনোবাইতো তেওঁলোকে কৰা কামৰ বাবে নিজকে উদঙাই দিছে ।" ট্ৰাম্পৰ উদ্ধৃতি দি এ এন আয়ে কয় ।

আমেৰিকাই আমেৰিকান সামগ্ৰীৰ ওপৰত উচ্চ শুল্ক আৰোপ কৰা দেশবোৰৰ ওপৰত প্ৰতি শুল্ক প্ৰৱৰ্তন কৰিবলৈ প্ৰস্তুত হোৱাৰ সময়তে এই ঘটনাটো ঘটিছে । ২ এপ্ৰিলত কাৰ্যকৰী হ'বলগীয়া এই প্ৰতি শুল্কসমূহে আমেৰিকাৰ বাণিজ্য নীতিত এক গুৰুত্বপূৰ্ণ পৰিৱৰ্তন চিহ্নিত কৰিব ।

ট্ৰাম্পে গুৰুত্ব আৰোপ কৰিছে যে আমেৰিকাই আন ৰাষ্ট্ৰসমূহৰ দ্বাৰা, বিশেষকৈ ভাৰতকে ধৰি উচ্চ শুল্ক ব্যৱস্থা থকা ৰাষ্ট্ৰসমূহে সুবিধা আদায় কৰাটো আৰু সহ্য নকৰে । লগতে তেওঁ আমেৰিকান সামগ্ৰীৰ ওপৰত উচ্চ শুল্ক আৰোপ কৰাৰ বাবে কানাডা আৰু ইউৰোপীয় ইউনিয়নকে ধৰি একাধিক দেশক সমালোচনা কৰে । তেওঁ দাবী কৰে যে এই ৰাষ্ট্ৰসমূহে বছৰ বছৰ ধৰি আমেৰিকাৰ পৰা সুবিধা গ্ৰহণ কৰিছে আৰু প্ৰতি ব্যৱস্থা প্ৰৱৰ্তনৰ দিশে আগবাঢ়িছে ।

ট্ৰাম্পে বিশেষভাৱে আমেৰিকান দুগ্ধজাত সামগ্ৰীৰ ওপৰত কানাডাই আৰোপ কৰা 250% শুল্কক লক্ষ্য কৰি লয় । তেওঁ ইয়াক অন্যায় বুলি অভিহিত কৰে । আনহাতে, তেওঁ অন্য দেশবোৰতো ইমান পৰিমাণৰ কৰ আৰোপ কৰিবলৈ অংগীকাৰবদ্ধ হৈছে, যিমান পৰিমাণৰ তেওঁলোকে আমেৰিকাৰ ওপৰত কৰ আৰোপ কৰিব ।

"কানাডাই বহু বছৰ ধৰি কাঠ আৰু দুগ্ধজাত সামগ্ৰীৰ ওপৰত শুল্ক আৰোপ কৰি আমাক লুটি আহিছে । দুশ পঞ্চাশ শতাংশ । কোনেও এই বিষয়ত মুখ নোখোলে । দুশ পঞ্চাশ শতাংশ শুল্ক, যাৰ দ্বাৰা আমাৰ কৃষকসকলৰ ওপৰত সুবিধা লৈ আছে । গতিকে এতিয়া আৰু সেইটো নহ'ব । যেতিয়ালৈকে তেওঁলোকে ইয়াক উঠাই নলয়, তেওঁলোকে ঠিক একে ধৰণৰ শুল্ক পৰিশোধ কৰিব লাগিব ।" ট্ৰাম্পে কয় ।

ট্ৰাম্পে ইউৰোপীয় ইউনিয়নকো সমালোচনা কৰি অভিযোগ কৰে যে এই সংগঠনটোক আমেৰিকাৰ ওপৰত সুবিধা ল'বলৈ গঠন কৰা হৈছিল । "ইউৰোপীয় ইউনিয়ন দেশখনৰ বাবে এক ভয়ানক উৎপীড়ক হৈ আহিছে । মই বুজাইছোঁ যে আমেৰিকাৰ সুবিধা লোৱাৰ বাবে ইউৰোপীয় ইউনিয়ন প্ৰস্তুত কৰা হৈছিল ।" তেওঁ কয় ।