পাক-আফগান সীমান্তত তীব্ৰ সংঘৰ্ষত ২৩ জন পাকিস্তানী সৈনিক আৰু ২০০ৰো অধিক তালিবান যোদ্ধা নিহত

ইছলামবাদ : পাকিস্তান-আফগানিস্তান সীমান্তত নিশাৰ ভিতৰতে হোৱা ভয়াৱহ সংঘৰ্ষত কমেও ২৩ জন পাকিস্তানী সৈনিক আৰু ২০০ৰো অধিক তালিবান আৰু মিত্ৰশক্তিৰ সন্ত্ৰাসবাদী নিহত হোৱা বুলি দেওবাৰে পাকিস্তান সেনাই প্ৰকাশ কৰিছে ৷ চুবুৰীয়া দেশ দুখনৰ মাজত উত্তেজনা আৰু পাৰস্পৰিক অভিযোগ উত্থাপন হোৱাৰ সময়তে এই সংঘৰ্ষৰ সূত্ৰপাত হৈছে ৷

পাকিস্তান সেনাই এক বিবৃতিত কয় যে ১১-১২ অক্টোবৰৰ নিশা আফগান তালিবান আৰু তেহৰিক-ই-তালিবান পাকিস্তানে পাকিস্তানৰ ওপৰত ‘অপ্ৰত্যাশিত আক্ৰমণ’ চলাইছিল ৷ সেনাই ইয়াক ‘কাপুৰুষীয়া কার্য’ বুলি অভিহিত কৰি সীমান্ত অঞ্চলসমূহক অস্থিৰ কৰি তোলা আৰু সন্ত্ৰাসবাদক প্ৰসাৰিত কৰাৰ লক্ষ্যৰে কৰা হৈছে বুলি কয় ৷

পাকিস্তানী সেনাই এই আক্ৰমণ সম্পূৰ্ণৰূপে বন্ধ কৰি দিয়াৰ লগতে তালিবান আৰু টি টি পি সন্ত্ৰাসবাদীৰ যথেষ্ট লোকচান কৰা বুলি জানিবলৈ দিয়ে ৷ আফগানিস্তানৰ তালিবানৰ শিবিৰ, পোষ্ট, প্ৰশিক্ষণ কেন্দ্ৰ আদিতো সেনাই নিৰ্দিষ্ট আকাশী আৰু স্থল আক্ৰমণ চলায় ৷ সংঘৰ্ষৰ সময়ত শত্ৰুৰ ২১টা স্থান অস্থায়ীভাৱে দখল কৰি কেইবাটাও প্ৰশিক্ষণ শিবিৰ নিষ্ক্ৰিয় কৰা হয় ৷

নিশাৰ সংঘৰ্ষত ২৯ জন পাকিস্তানী জোৱানো আহত হয় ৷ পাকিস্তানী সেনাই কয় যে সাধাৰণ লোকৰ হতাহতিৰ পৰা হাত সাৰিবলৈ সকলো সম্ভৱপৰ ব্যৱস্থা গ্ৰহণ কৰা হৈছে ৷

সুৰক্ষা বাহিনীৰ সূত্ৰৰ মতে, পাকিস্তানী বাহিনীয়ে আফগান ভূখণ্ডত থকা তালিবানৰ এটা টেংক প’ষ্ট আৰু দ্বিতীয় বেটেলিয়নৰ মুখ্য কাৰ্যালয়কো লক্ষ্য কৰি লৈ তালিবান আৰু টি টি পিক যথেষ্ট ক্ষতিসাধন কৰে ৷ সীমান্ত অতিক্ৰম কৰি সন্ত্ৰাসবাদী কাৰ্যকলাপৰ কেন্দ্ৰবিন্দু ২ নং দুৰ্ৰাণী কেম্পো ধ্বংস কৰা হয় ৷

পাকিস্তানৰ ৰাষ্ট্ৰপতি আছিফ আলী জাৰ্দাৰী আৰু প্ৰধানমন্ত্ৰী শ্বাহবাজ শ্বৰীফে দেশৰ সাৰ্বভৌমত্বৰ ক্ষেত্ৰত কোনো আপোচ নহ’ব বুলি উল্লেখ কৰে ৷ তেওঁলোকে সামৰিক বাহিনীৰ এই কাৰ্যক প্ৰশংসা কৰি কয় যে প্ৰতিটো প্ৰত্যাহ্বানৰ সন্মুখীন হ’ব নিখুঁত আৰু ফলপ্ৰসূ সঁহাৰি ৷

তালিবান চৰকাৰৰ মুখপাত্ৰ জাবিহুল্লাহ মুজাহিদে দাবী কৰিছে যে ৫৮ জন পাকিস্তানী জোৱান নিহত আৰু ৩০ জন আহত হৈছে ৷ তেওঁ কয় যে আফগান সৈন্যই সীমান্তৰ সিপাৰে প্ৰতিশোধ লোৱাৰ ফলত ৯ জন আফগান সৈনিকৰ মৃত্যু হয় ৷

সামৰিক বিশেষজ্ঞসকলৰ মতে, টি টি পিয়ে আফগানৰ ভূখণ্ড ব্যৱহাৰ কৰি পাকিস্তানৰ ভূখণ্ডত সন্ত্ৰাসবাদী আক্ৰমণ চলোৱা কাৰ্যই শেহতীয়া সংঘাতৰ ইন্ধন যোগাইছিল ৷ তদুপৰি শেহতীয়াকৈ খাইবাৰ পখতুনখোৱাৰ ওৰাকজাই জিলাত সংঘটিত আক্ৰমণত ১১ জন জোৱান নিহত হৈছিল ৷

পাকিস্তানৰ স্বৰাজ মন্ত্ৰী মহছিন নাকভিয়ে তালিবানৰ আক্ৰমণক ‘অপ্ৰত্যাশিত’ বুলি অভিহিত কৰি কয় যে পাকিস্তানী সেনাই সম্পূৰ্ণ সষ্টম হৈ আছে আৰু আক্ৰমণৰ প্ৰত্যুত্তৰ দিব ৷

লগতে পঢ়ক : পাকিস্তানৰ ওপৰত প্ৰতিশোধমূলক আক্ৰমণ আৰম্ভ তালিবানৰ; সংযমৰ আহ্বান ইৰাণৰ