প্ৰলয়ংকৰী বান আৰু খহনীয়াত নেপালত শতাধিক লোকৰ মৃত্যু - Nepal Flood
Nepal natural disaster: নেপালত প্ৰকৃতিৰ ৰোষৰ বলি হৈছে বিস্তীৰ্ণ অঞ্চল ৷ ভয়াৱহ বান আৰু খহনীয়াৰ ফলত দেশখনত অতি কমেও এশ লোকে প্ৰাণ হেৰুওৱাৰ লগতে সন্ধানহীন হৈ আছে অৰ্ধশতাধিক ৷
Published : September 29, 2024 at 2:10 PM IST
নিউজ ডেস্ক, 29 ছেপ্টেম্বৰ: দেওবাৰে সমগ্ৰ নেপালত বৰষুণৰ ফলত হোৱা বান আৰু ভূমিস্খলনত মৃত্যু হোৱা লোকৰ সংখ্যা ১০২ লৈ বৃদ্ধি পাইছে । নেপালৰ আৰক্ষী সূত্ৰই প্ৰকাশ কৰিছে এই তথ্য ৷ শুকুৰবাৰৰ পৰা পূব আৰু মধ্য নেপালৰ বৃহৎ অঞ্চল বানত প্লাৱিত হোৱাৰ লগতে দেশখনৰ কিছু অংশত ক্ষন্তেকীয়া বানৰো সৃষ্টি হৈছে ।
সশস্ত্ৰ আৰক্ষী বাহিনীৰ সূত্ৰ অনুসৰি বান আৰু ভূমিস্খলনত ৬৪ জন লোক নিৰুদ্দেশ হোৱাৰ বিপৰীতে ৪৫ জন লোক আহত হৈছে । কাঠমাণ্ডু উপত্যকাত সৰ্বাধিক ৪৮ জন লোকৰ মৃত্যু হৈছে ।
কমেও ১৯৫ টা ঘৰ আৰু ৮ খন দলং ক্ষতিগ্ৰস্ত হয় । প্ৰায় ৩১০০ লোকক উদ্ধাৰ কৰিছে নিৰাপত্তাৰক্ষীয়ে । প্ৰত্যক্ষদৰ্শীয়ে কয় যে কাঠমাণ্ডু উপত্যকাত ৪০-৪৫ বছৰত ইমান বিধ্বংসী বান কেতিয়াও দেখা নাই ।
সশস্ত্ৰ আৰক্ষী বাহিনীয়ে এক বিবৃতিত প্ৰকাশ কৰিছে যে মৃতকৰ সংখ্যা ১০২ জন হৈছেগৈ । আন্তঃৰাষ্ট্ৰীয় সংহত পৰ্বত উন্নয়ন কেন্দ্ৰৰ জলবায়ু আৰু পৰিৱেশ বিশেষজ্ঞ অৰুণ ভক্ত শ্ৰেষ্ঠই কয় যে কাঠমাণ্ডুত এই পৰিসৰৰ বান আগতে কেতিয়াও দেখা নাই ।
শনিবাৰে ICIMOD ই প্ৰকাশ কৰা এক প্ৰতিবেদনত কোৱা হৈছে যে শুকুৰবাৰ আৰু শনিবাৰে পূব আৰু মধ্য নেপালৰ বহু অংশত অবিৰত বৰষুণৰ ফলত কাঠমাণ্ডুৰ মূল নদী বাগমতি বিপদ সীমাৰ ওপৰেৰে বৈ আছে । বংগোপসাগৰত নিম্ন চাপ আৰু উত্তৰ দিশলৈ প্ৰবাহিত মৌচুমী বতাহ প্ৰবল বৰষুণৰ আঁৰৰ কাৰণ বুলিও কোৱা হৈছে ।
বিজ্ঞানীসকলে কয় যে জলবায়ু পৰিৱৰ্তনে সমগ্ৰ এছিয়াত বৰষুণৰ পৰিমাণ আৰু সময় সলনি কৰিছে যদিও বানৰ প্ৰভাৱ বৃদ্ধিৰ এটা মূল কাৰণ হৈছে নিৰ্মাণৰ পৰিৱেশ, বিশেষকৈ বান প্ৰৱল সমভূমিত অপৰিকল্পিত নিৰ্মাণকে ধৰি নিৰ্মাণ পৰিৱেশ, যাৰ ফলত পানী ধৰি ৰখা আৰু নিষ্কাশনৰ বাবে অপৰ্যাপ্ত অঞ্চল বাচি থাকে ৷
বান আৰু ভূমিস্খলনে দেশখনৰ বহু ঠাইত মানুহৰ স্বাভাৱিক জীৱন যাত্ৰাৰ সলনি কৰি পেলাইছে, বহু ঘাইপথ আৰু পথৰ অংশ ক্ষতিগ্ৰস্ত হৈছে, শ শ ঘৰ আৰু দলং পোত গৈছে বা ঢলে উটুৱাই লৈ গৈছে, শ শ পৰিয়াল গৃহহাৰা হৈছে । পথ ক্ষতিগ্ৰস্ত হোৱাৰ বাবে বিভিন্ন স্থানত আবদ্ধ হৈ পৰিছে হাজাৰ হাজাৰ যাত্ৰী ।
