ৱাশ্বিংটন : শনিবাৰে নিশা আমেৰিকাই ইৰাণৰ তিনিটা পাৰমাণৱিক কেন্দ্ৰত বি-২ বোমাৰু(B-2 bomber)ৰে বোমা বিস্ফোৰণ কৰে ৷ আমেৰিকাই ইয়াৰ নাম অপাৰেশ্যন মিডনাইট হামাৰ দিয়ে, য’ত ১২৫খনতকৈও অধিক বিমান নিয়োগ কৰা হৈছিল । সম্পূৰ্ণ অপাৰেশ্যন ২৫ মিনিটত সম্পূৰ্ণ হোৱাৰ লগতে ইৰাণৰ এয়াৰ ডিফেন্স চিষ্টেমে এই আক্ৰমণসমূহ ৰোধ কৰাত সম্পূৰ্ণৰূপে ব্যৰ্থ হয় ।
আমেৰিকাৰ যুটীয়া মুখ্য কৰ্মচাৰীৰ অধ্যক্ষ জেনেৰেল ডেন কেনে এক সংবাদমেলত কয়, ‘‘ইৰাণৰ পাৰমাণৱিক স্থানত হোৱা আক্রমণত ৭খন বি-২ বোমাৰু বিমান জড়িত হৈ আছে ৷ বি-২ বোমাৰু বিমানে ইৰাণৰ দুটা পাৰমাণৱিক কেন্দ্ৰ ফৰ্ডো আৰু নাটাঞ্জত ৩০ হাজাৰ পাউণ্ড (প্ৰায় ১৩,৬০৮ কিলোগ্ৰাম) ওজনৰ এক ডজনতকৈও অধিক মেছিভ অৰ্ডানেন্স পেনেট্ৰেটৰ বোমা নিক্ষেপ কৰে আৰু ইছফাহান পাৰমাণৱিক স্থানত টমাহক ক্ষেপণাস্ত্ৰ নিক্ষেপ কৰা হৈছিল ।’’
কেনে কয়, ‘‘বোমাৰু বিমানে সন্ধিয়া ৬.৪০ বজাৰ পৰা (ইটি) ফৰ্ডো, নাটানজ আৰু ইছফাহান পাৰমাণৱিক স্থানত আক্ৰমণ চলাইছিল আৰু সন্ধিয়া ৭.০৫ বজাৰ ভিতৰত ইৰাণৰ আকাশমাৰ্গ এৰি থৈ গৈছিল । মিছৌৰীৰ এটা বিমান ঘাটিৰ পৰা বোমাৰু বিমানসমূহে উৰা মাৰিছিল আৰু ২০০১ চনৰ ১১ ছেপ্টেম্বৰৰ আক্ৰমণৰ পিছত এইটোৱেই আছিল আটাইতকৈ দীঘলীয়া বি-২ অপাৰেশ্যন ।’’
VIDEO | Virginia: Briefing the media on America's strikes on Iranian nuclear facilities, Joint Chiefs of Staff chairperson General Dan Caine says, " at midnight friday into saturday morning, a large b-2 strike package comprised of bombers launched from the continental united… pic.twitter.com/eKFUIsyYw0
— Press Trust of India (@PTI_News) June 22, 2025
জেনেৰেল ডেন কেনে কয়, ‘‘ইৰাণৰ ওপৰত কৰা আক্ৰমণত ১৪টা বাংকাৰ-বাষ্টাৰ বোমা, দুডজনৰো অধিক টমাহক মিছাইল আৰু ১২৫টাতকৈও অধিক সামৰিক বিমান অন্তৰ্ভুক্ত কৰা হৈছে । মূল আক্ৰমণত সাতখন বি-২ স্পিৰিট বোমাৰু বিমান জড়িত আছিল, প্ৰতিখনতে দুজন ক্ৰু মেম্বাৰ আছিল, যিবোৰে ১৮ ঘণ্টীয়া বিমানখনৰ সময়ত নূন্যতম যোগাযোগৰ সৈতে নীৰৱে পূব দিশলৈ গতি কৰিছিল ৷’’
ইজৰাইল আৰু ইৰাণৰ মাজত ৯ দিনৰ সংঘৰ্ষৰ অন্তত শনিবাৰে আমেৰিকাও এই যুঁজত যোগদান কৰে । অৱশ্যে আমেৰিকাৰ ৰাষ্ট্ৰপতি ড’নাল্ড ট্ৰাম্পে আগন্তুক দুসপ্তাহৰ ভিতৰত সিদ্ধান্ত ল’ব বুলি কৈছিল যে আমেৰিকাই ইৰাণৰ আক্ৰমণত ইজৰাইলক সমৰ্থন কৰিব নে নকৰে । কিন্তু, দুদিন পিছত হোৱাইট হাউছৰ চিচুৱেশ্যন ৰুমৰ পৰা মিছনটো নিৰীক্ষণ কৰি থকাৰ সময়তে তেওঁ ইৰাণৰ পাৰমাণৱিক স্থানসমূহত আক্ৰমণৰ নিৰ্দেশ দিয়ে ।
বি-২ বোমাৰু বিমানবোৰ কেনেকৈ লক্ষ্যৰ ফালে আগবাঢ়িল ?
আমেৰিকাৰ সামৰিক বিষয়া কেনে বি-২ বোমাৰু বিমানখনে কেনেকৈ নিজৰ লক্ষ্যৰ দিশে আগবাঢ়িল সেই বিষয়ে ব্যাখ্যা কৰে । তেওঁ কয়, "শুকুৰবাৰে মাজনিশাৰ পৰা শনিবাৰে পুৱালৈকে আমেৰিকাৰ পৰা বোমাৰু বিমানেৰে এটা বৃহৎ বি-২ আক্ৰমণৰ পেকেজ নিক্ষেপ কৰা হৈছিল । গোপনীয়তা বজাই ৰখাৰ পৰিকল্পনাৰ অংশ হিচাপে প্ৰতাৰণা কৰাৰ উদ্দেশ্যে পেকেজটোৰ এটা অংশ পশ্চিম দিশলৈ আৰু আনটো প্ৰশান্ত মহাসাগৰৰ ফালে আগবাঢ়িছিল, যিটো ৱাশ্বিংটন আৰু টাম্পাৰ অতি কম সংখ্যক পৰিকল্পনাকাৰী আৰু মূল নেতাইহে চিনি পাইছিল ।"
প্ৰায় ৫ বজাত (ইটি), ইৰাণৰ ইছফাহান পাৰমাণৱিক স্থানত পৃষ্ঠ আন্তঃগাঁথনিৰ মূল লক্ষ্যৰ বিৰুদ্ধে আমেৰিকাৰ এখন চাবমেৰিনে দুডজনতকৈও অধিক টমাহক লেণ্ড এটেক ক্ৰুজ মিছাইল নিক্ষেপ কৰে বুলি কেনে কয় । প্ৰমুখ বি-২ বোমাৰু বিমানখনে ৬.৪০ বজাত ফৰ্ডো পাৰমাণৱিক স্থানত দুটা বৃহৎ বাংকাৰ-বাষ্টাৰ বোমা নিক্ষেপ কৰে আৰু অন্যান্য বোমাৰু বিমানে তাৰ পিছত নিজ নিজ লক্ষ্যত আঘাত কৰে ।’’
